ഉയർന്നുപൊങ്ങുന്ന ചെറുവിമാനങ്ങൾ; സമൂഹമാധ്യമങ്ങളിൽ താരമാവുന്ന വൈമാനികൻ ഇവിടെയുണ്ട്...

കുട്ടിക്കാലത്തെ പറക്കാനുള്ള മോഹമാണ് മിഥുൻ എന്ന ചെറുപ്പക്കാരന് പ്രചോദനമായത്. പരിമിതമായ സൗകര്യങ്ങളിൽ വളരെ ഉയരത്തിൽ പറക്കുന്ന പലതരം വിമാനങ്ങളാണ് മിഥുന്‍റെ സാങ്കേതിക സൃഷ്‌ടിയിൽ പിറന്നത്.

തൃശൂർ: അതിരുകളില്ലാതെ ചിറകുവച്ച് പറക്കാനുള്ള മനുഷ്യന്‍റെ ഇച്ഛാശക്തിയുടെ ഫലമാണ് വിമാനവും ഹെലികോപ്‌റ്ററുകളും. മനുഷ്യന്‍റെ ഏറ്റവും മികച്ച കണ്ടുപിടിത്തം...

ചെറിയ സൗകര്യങ്ങളിൽ ചെറുവിമാനങ്ങൾ നിർമിച്ച് ഉയരങ്ങളിലേക്ക് പറത്തി സമൂഹ മാധ്യമങ്ങളില്‍ താരമാവുകയാണ് തൃശൂർ മനക്കൊടി സ്വദേശി മിഥുൻ. അലൂമിനിയം ഫാബ്രിക്കേഷൻ തൊഴിലാളിയായ മിഥുൻ തന്‍റെ ഒഴിവുസമയങ്ങളാണ് വിമാനമുണ്ടാക്കാനായി മാറ്റിവച്ചു തുടങ്ങിയത്.

ഏതൊരു കുട്ടിക്കും ആകാശം മുട്ടെ പോകുന്ന വിമാനത്തോട് തോന്നുന്ന കൗതുകം, അവിടെ നിന്നാണ് മിഥുനിനും പറക്കാനുള്ള മോഹം തുടങ്ങുന്നത്. അത് പിന്നീട് ചെറിയ ഡ്രോണുകൾ പറത്താനുള്ള ഉദ്യമത്തിലേക്കായി.

രണ്ട് വർഷം മുൻപ് ചെറുവിമാനങ്ങൾ ഉണ്ടാക്കാന്‍ തുടങ്ങിയെങ്കിലും ആദ്യ വിമാനം ആകാശം തൊട്ടത് ആറു മാസം മുൻപാണ്‌. ഒന്നും രണ്ടുമല്ല, പല തരത്തിലുള്ള ആറ് വിമാനങ്ങളാണ് തൃശൂർ അരിമ്പൂർ സ്‌കൂൾ ഗ്രൗണ്ടിന് മീതെ ചീറിപ്പാഞ്ഞത്. വ്യത്യസ്‌തമായ നിരവധി വിമാനങ്ങളുടെ വൈമാനികനും ഈ ചെറുപ്പക്കാരൻ തന്നെ.