തൃശൂർ: കൊടകര കുഴൽപ്പണ കേസിൽ അന്വേഷണം ആവശ്യപ്പെട്ട് സമർപ്പിച്ച ഹർജിയിൽ ഹൈക്കോടതിയിൽ സാവകാശം തേടി എന്‍ഫോഴ്സ്മെന്‍റ് ഡയറക്ടറേറ്റ്. വിശദീകരണം നൽകാൻ ഇ.ഡി കൂടുതൽ സമയം കോടതിയോട് ആവശ്യപ്പെട്ടു. പത്ത് ദിവസത്തിനകം വിശദീകരണം നൽകണമെന്നാണ് ഹൈക്കോടതി നിർദ്ദേശം.
കുഴൽ പണ കേസുമായി ബിജെപിക്ക് യാതൊരുവിധ ബന്ധവുമില്ലെന്നും കേസിൽ ബന്ധമില്ലാത്ത നേതാക്കളെയാണ് പൊലീസ് ചോദ്യം ചെയ്യുന്നതെന്നും ആരോപിച്ച് ബിജെപി സംസ്ഥാന അധ്യക്ഷന്‍ കെ സുരേന്ദ്രൻ രംഗത്ത് വന്നിരുന്നു. ഇതേത്തുടർന്ന് ബിജെപിയുടെ സംസ്ഥാന നേതൃത്വത്തിൽതന്നെ വന്‍ പിളർപ്പാണുണ്ടായിരിക്കുന്നത്. സംസ്ഥാന സർക്കാരിനോടും ഹൈക്കോടതി നിലപാട് തേടിയിട്ടുണ്ട്.
ലോക് താന്ത്രിക് യുവ ജനതാദൾ നേതാവ് സലീം മടവൂരാണ് കുഴൽപ്പണക്കേസിൽ ഇ.ഡി. അന്വേഷണമാവശ്യപ്പെട്ട് ഹൈക്കോടതിയെ സമീപിപ്പിച്ചത്. ബി ജെ പി നേതാക്കൾ ഉൾപ്പെട്ട കേസ് ഇ ഡി അന്വേഷിക്കുന്നില്ലെന്നും നിരവധി തവണ പരാതി നൽകിയെങ്കിലും പരിഗണിച്ചില്ലെന്നുമാണ് പരാതിക്കാരന്‍ പറയുന്നത്. ഇഡി അന്വേഷണത്തിന് ഉത്തരവിടണമെന്നാണ് ഹർജിയിലെ ആവശ്യം. ഇ ഡി ഡയറക്ടറെ എതിർകക്ഷിയാക്കിയാണ് ഹർജി സമർപ്പിച്ചത്.ഇതുവരെ കേസുമായി ബന്ധപ്പെട്ട് 19 പേരെ പൊലീസ് അറസ്റ്റ് ചെയ്‌തിട്ടുണ്ട്.
കൂടുതൽ വായിക്കാന്‍: കൊടകര കുഴൽ പണ കേസുമായി ബിജെപിക്ക് ബന്ധമില്ല: കെ.സുരേന്ദ്രൻ
