തൃശ്ശൂര്‍: ചേർപ്പിൽ യുവാവ് സഹോദരനെ കൊന്നു കുഴിച്ചു മൂടിയ കേസില്‍ അമ്മയേയും പ്രതി ചേർത്തു. മൃതദേഹം മറവ് ചെയ്‌തത് അമ്മയുടെ സഹായത്തോടെയാണെന്ന സാബുവിന്‍റെ മൊഴിയുടെ അടിസ്ഥാനത്തിലാണ് അമ്മ പത്മാവതിയേയും പ്രതി ചേർത്തത്. പത്മാവതി നിലവിൽ ആശുപത്രിയിൽ ചികിത്സയിലാണ്.
പത്മാവതിയെ ആശുപത്രിയില്‍ നിന്ന് ഡിസ്‌ചാര്‍ജ് ചെയ്യുന്ന അവസരിത്തില്‍ അവരെ കസ്റ്റഡിയിലെടുത്ത് ചോദ്യം ചെയ്യുമെന്ന് പൊലീസ് പറഞ്ഞു. ചേർപ്പ് മുത്തുള്ളിയാൽ സ്വദേശി കെ.ജെ ബാബുവാണ് കഴിഞ്ഞ ശനിയാഴ്‌ച്ച കൊല്ലപ്പെട്ടത്. ബാബു സ്ഥിരമായി മദ്യപിച്ചു വീട്ടില്‍ വഴക്കുണ്ടാക്കുന്ന സ്വഭാവക്കാരനാണ്. ഇതില്‍ സഹികെട്ടാണ് സഹോദരനെ കൊലപ്പെടുത്തിയതെന്ന് സാബു പോലീസിന് മൊഴി നൽകി.
സാബുവിനെ കൊലപാതകം നടന്ന സ്ഥലത്തെത്തിച്ച് തെളിവെടുപ്പ് നടത്തി. ഇന്നലെ രാവിലെയാണ് ചേര്‍പ്പ് മുത്തുള്ളിയാലിന് സമീപത്തെ പറമ്പില്‍ ബാബുവിന്‍റെ മൃതദേഹം കുഴിച്ചിട്ട നിലയില്‍ നാട്ടുകാര്‍ കണ്ടെത്തിയത്. സഹോദരനെ കൊലപ്പെടുത്തി കുഴിച്ചിട്ടതിന് ശേഷം സാബുവും അമ്മ പത്മാവതിയും ചേര്‍ന്ന് ബാബുവിനെ കാണാനില്ലെന്നു കാണിച്ച് ചേര്‍പ്പ് പൊലീസില്‍ പരാതിയും നല്‍കിയിരുന്നു.
ALSO READ: മദ്യപിച്ച് ബഹളമുണ്ടാക്കിയതിന് സഹോദരനെ കൊന്ന് കുഴിച്ചുമൂടി
