കൊടകരയിലെ കള്ളപ്പണം ; ബിജെപിക്ക് ബന്ധമില്ലെന്ന് തൃശൂർ ജില്ല പ്രസിഡന്‍റ്

'തെരഞ്ഞെടുപ്പ് ഫണ്ട് ബിജെപി  നൽകുന്നത് അക്കൗണ്ട് വഴിയാണ്. ഇതിന് കൃത്യമായ കണക്കുണ്ട്. ദുഷ്പ്രചാരണം നടത്തുന്ന സിപിഎമ്മിനെതിരെ നിയമനടപടി സ്വീകരിക്കും'

തൃശൂർ: കൊടകരയിൽ നിന്നും തട്ടിയെടുത്തെന്ന് പറയുന്ന കുഴൽപ്പണവുമായി ബിജെപിക്ക് യാതൊരു ബന്ധവുമി ല്ലെന്ന് തൃശൂർ ജില്ല പ്രസിഡന്‍റ് അഡ്വ. കെകെ അനീഷ് കുമാർ. കേസിൽ ബിജെപിയെ കൂട്ടിക്കെട്ടുന്നത് സിപിഎമ്മിന്‍റെ ഗൂഢാലോചനയാണ്. തെരഞ്ഞെടുപ്പ് ഫണ്ട് ബിജെപി നൽകുന്നത് അക്കൗണ്ട് വഴിയാണ്. ഇതിന് കൃത്യമായ കണക്കുണ്ട്. ദുഷ്പ്രചാരണം നടത്തുന്ന സിപിഎമ്മിനെതിരെ നിയമനടപടി സ്വീകരിക്കുമെന്നും അനീഷ് കുമാർ വ്യക്തമാക്കി.

പാർട്ടി നൽകുന്ന പണം കൂടാതെ ബാക്കി ചെലവിനാവശ്യമായ പണം പൊതുജനങ്ങളിൽ നിന്ന് പിരിവെടുത്താണ് സമാഹരിക്കുന്നത്. കണക്കുകളെല്ലാം സുതാര്യമായി കൈകാര്യം ചെയ്യുകയും കൃത്യമായി തെരഞ്ഞെടുപ്പ് കമ്മിഷന് നൽകുകയും ചെയ്യുന്ന പാർട്ടിയാണ് ബിജെപി. തെരഞ്ഞെടുപ്പ് ഫണ്ട് കൈകാര്യം ചെയ്യുന്നത് ഉത്തരവാദപ്പെട്ട ഭാരവാഹികളാണ്. വസ്തുതകൾക്ക് വിരുദ്ധമായി ബിജെപിയെ അപകീർത്തിപ്പെടുത്താനുള്ള ബോധപൂർവ്വമായ ശ്രമമാണ് നടക്കുന്നതെന്നും അനീഷ് കുമാർ ആരോപിച്ചു.

read more: വാക്‌സിനേഷന്‍ കേന്ദ്രങ്ങളില്‍ കൂടുതല്‍ ഡോസ് ലഭ്യമാക്കണമെന്ന് മുഖ്യമന്ത്രി

അതേസമയം കുഴൽപ്പണം ഏത് പാർട്ടിക്ക് വേണ്ടി കൊണ്ടുവന്നതാണെന്ന് വ്യക്തമായിട്ടില്ലെന്നാണ് ഡിജിപി ലോക്നാഥ് ബെഹ്റ ഇന്നലെ തെരഞ്ഞെടുപ്പ് കമ്മിഷന് നൽകിയ റിപ്പോർട്ടിൽ പറയുന്നത്. സംഭവത്തിൽ അന്വേഷണം തുടരുകയാണെന്നും, ചോദ്യം ചെയ്യൽ നടക്കുന്നതായും ഡിജിപി വിശദീകരിക്കുന്നു. തൃശൂർ എസ്‍പിയുടെ റിപ്പോർട്ടും തെരഞ്ഞെടുപ്പ് കമ്മിഷന് ഡിജിപി കൈമാറിയിട്ടുണ്ട്.

വ്യാപാര ആവശ്യത്തിനായുള്ള 25 ലക്ഷം രൂപയും കാറും കവർന്നുവെന്നാണ് കോഴിക്കോട് സ്വദേശി ധർമരാജന്‍റെ പരാതി. എന്നാൽ കാറിൽ മൂന്നരക്കോടി രൂപയുണ്ടായിരുന്നെന്നും ഇത് തെരഞ്ഞെടുപ്പ് അട്ടിമറിക്കാൻ ഒരു ദേശീയ പാർട്ടിക്ക് വേണ്ടി കൊണ്ടുപോയ പണമാണെന്നുമാണ് ആരോപണം. ക്വട്ടേഷൻ സംഘത്തിൽ പ്രവർത്തിക്കുന്ന കണ്ണൂർ, തൃശൂര്‍ സ്വദേശികളായ ഒൻപത് പേരാണ് കേസുമായി ബന്ധപ്പെട്ട് ഇതേവരെ കസ്റ്റഡിയിലായിട്ടുള്ളത്.

ഇവരെ ചോദ്യം ചെയ്ത് വരികയാണെന്നും കൂടുതൽ വിവരങ്ങൾ പിന്നീട് വെളിപ്പെടുത്തുമെന്നുമാണ് റൂറൽ എസ്.പി ജി പൂങ്കുഴലി പറഞ്ഞത്. എറണാകുളത്തെ ഒളിസങ്കേതത്തിൽ നിന്നും പിടികൂടിയവരെ ചോദ്യം ചെയ്താൽ കൂടുതൽ വ്യക്തത വരുമെന്നാണ് പൊലീസ് കരുതുന്നത്. വാഹനത്തിൽ പണം കൊണ്ടുപോകുന്ന വിവരം എങ്ങനെ ചോർന്നു കിട്ടിയെന്നും പണം എവിടെയാണ് സൂക്ഷിച്ചിരിക്കുന്നതെന്നുമുള്ള വിവരങ്ങളാണ് പൊലീസ് അന്വേഷിക്കുന്നത്. സംഭവത്തിലെ പ്രധാന പ്രതിയെന്ന് കരുതുന്ന രഞ്ജിത്തിനെ പിടികൂടാനുള്ള ശ്രമവും തുടരുകയാണ്.