തിരുവനന്തപുരം: വാഹനങ്ങളിലുണ്ടാകുന്ന തീപിടിത്തം പഠിക്കാന്‍ ഗതാഗത വകുപ്പ്. ഇതിനായി പ്രത്യേക സമിതിയെ ചുമതലപ്പെടുത്തി. രണ്ട് വര്‍ഷത്തിനിടെ ഉണ്ടായ തീപിടിത്തങ്ങള്‍ സംബന്ധിച്ച് ഈ സമിതി വിശദമായി പഠിക്കും. ഗതാഗത മന്ത്രി ആന്‍റണി രാജുവിന്‍റെ അധ്യക്ഷതയില്‍ ചേര്‍ന്ന ഉന്നതതല യോഗത്തിലാണ് തീരുമാനമുണ്ടായത്.
വാഹനങ്ങള്‍ തീപിടിക്കുന്നത് വര്‍ധിച്ച സാഹചര്യത്തിലാണ് സര്‍ക്കാര്‍ ഇക്കാര്യം പരിശോധിക്കാന്‍ തീരുമാനിച്ചത്. ഗതാഗത കമ്മീഷണർ എസ്.ശ്രീജിത്തിന്‍റെ നേതൃത്വത്തിലാകും വിദഗ്‌ധ സമിതി പ്രവര്‍ത്തിക്കുന്നത്. ഓട്ടോമൊബൈല്‍ മേഖലയിലെ വിദഗ്‌ധരും സമിതിയിലുണ്ടാകും. വാഹനങ്ങളില്‍ വരുത്തുന്ന രൂപമാറ്റങ്ങള്‍ ഇത്തരം അപകടങ്ങള്‍ക്ക് കാരണമാകുന്നതായി യോഗം വിലിരുത്തിയിട്ടുണ്ട്.
യാതൊരു മാനദണ്ഡങ്ങളും പാലിക്കാതെയാണ് രൂപമാറ്റങ്ങള്‍ വരുത്തുന്നത്. ഇത്തരം നിയലംഘനങ്ങള്‍ കണ്ടെത്തുന്നതിന് പരിശോധന കര്‍ശനമാക്കും. അപകടകരമായേക്കാവുന്ന രൂപമാറ്റങ്ങള്‍ സംബന്ധിച്ച് പൊതുജനങ്ങള്‍ക്ക് ബോധവത്കരണം നടത്താനും തീരുമാനമായിട്ടുണ്ട്. പുതിയ കാറുകള്‍ അടക്കം സമീപ സമയത്ത് കേരളത്തില്‍ ഓടുന്നതിനിടയില്‍ തീപിടിച്ചിരുന്നു. മറ്റ് സംസ്ഥാനങ്ങളില്‍ ഇത്തരം തീപിടിത്തങ്ങള്‍ കുറവായിട്ടാണ് റിപ്പോര്‍ട്ട് ചെയ്യുന്നത്.
അതിനാലാണ് രൂപമാറ്റം വരുത്തലും അധികമായി അക്‌സസറീസ് ഘടിപ്പിക്കുന്നതും അപകടത്തിന് സാധ്യത വരുത്തുന്നതായി വിലയിരുത്തലുണ്ടായത്. വൈദ്യുത വാഹനങ്ങള്‍ കൂടുതലായി എത്തുന്നതിനാല്‍ ഉദ്യോഗസ്ഥര്‍ക്കടക്കം വാഹനത്തിന്‍റെ സാങ്കേതിക വിദ്യ സംബന്ധിച്ച് പരിശീലനം നല്‍കും. ഇതിനുള്ള നടപടികള്‍ മോട്ടോര്‍ വാഹന വകുപ്പ് ആരംഭിച്ചിട്ടുണ്ട്. ചെന്നൈ ഐഐടിയുടെ സഹായത്തോടെയാകും ഈ പരിശീലനം നടപ്പിലാക്കുക.
നിയമലംഘകര്‍ക്ക് ഇന്‍ഷുറന്‍സ് പ്രീമിയം വര്‍ദ്ധിപ്പിക്കാന്‍ ചര്‍ച്ച: റോഡ്‌ നിയമലംഘനങ്ങള്‍ പതിവാക്കിയവര്‍ക്ക് ഇന്‍ഷുറന്‍സ് പ്രീമിയം വര്‍ധിപ്പിക്കാന്‍ നീക്കവുമായി ഗതാഗത വകുപ്പ്. ഇത് സംബന്ധിച്ച് ഇന്‍ഷുറന്‍സ് കമ്പനികളുമായി ചര്‍ച്ച നടത്താന്‍ ഗതാഗത കമ്മീഷണറെ ഉന്നതതല യോഗം ചുമതലപ്പെടുത്തി. ഐആര്‍ഡിഎ, ജനറല്‍ ഇന്‍ഷുറന്‍സ് തുടങ്ങിയ കമ്പനികളുമായാകും ഗതാഗത കമ്മീഷണർ ചര്‍ച്ച നടത്തുക.
നിയമങ്ങള്‍ പാലിക്കുന്നവര്‍ക്ക് പ്രീമിയം കുറച്ചു നല്‍കുന്നതും നിര്‍ദ്ദേശിച്ചിട്ടുണ്ട്. തേര്‍ഡ്‌പാര്‍ട്ടി ഇന്‍ഷുറന്‍സ് ഒഴികെയുള്ള പോളിസികളുടെ പ്രീമിയം തുടകയിലാകും മാറ്റം ഉണ്ടാവുക. ഇത് നടപ്പിലാക്കുന്നതിലെ നിയമവശം പരിശോധിക്കാന്‍ നിയമവകുപ്പിനോട് ഗതാഗതവകുപ്പ് ആവശ്യപ്പെട്ടിട്ടുണ്ട്.
also read: Fire Accident | ഓടിക്കൊണ്ടിരുന്ന കാറിന് തീപിടിച്ചു, ഒരു കുടുംബത്തിലെ 4 പേർക്ക് ദാരുണാന്ത്യം
ഉത്തർപ്രദേശിൽ കാറിന് തീപിടിച്ചു: ഓടികൊണ്ടിരിക്കുന്ന കാറിന് തീപിടിച്ച് ഒരു കുടുംബത്തിലെ നാല് പേർക്ക് ദാരുണാന്ത്യം. ഉത്തർപ്രദേശിലെ സഹാറാൻപൂരിലെ റാംപൂർ മണിഹരൻ ഏരിയയിലെ അംബാല ഡെറാഡൂണ്‍ ഹൈവേയിലായിരുന്നു അപകടം. ഉത്തരാഖണ്ഡിലെ ഹരിദ്വാർ ജില്ലയിൽ നിന്നുളള കുടുംബമാണ് അപകടത്തിൽപെട്ടത്.
ഡ്രൈവർ കാർ നിർത്താൻ ശ്രമിച്ചെങ്കിലും വയറിങ്ങ് കത്തിയതിനാൽ ബ്രേക്ക് പ്രവർത്തിച്ചിരുന്നില്ല. പിന്നീട് കാർ ഒരു വിധത്തിൽ നിർത്താനായെങ്കിലും വാതിൽ തുറക്കാനാകാതിരുന്നതാണ് കുടുംബത്തിന്‍റെ മരണത്തിന് കാരണമായത്. ഷോർട്ട് സർക്യൂട്ടാണ് തീപിടിത്തതിന് കാരണമെന്നാണ് പ്രാഥമിക നിഗമനം. കാർ കത്തിയമരുന്നത് കണ്ട് നാട്ടുകാർ ഓടിയെത്തിയെങ്കിലും തീ ആളിപടരുകയായിരുന്നു.
തുടർന്ന് പ്രദേശവാസികൾ ഫയർഫോയ്‌സിനെ വിവരമറിയിച്ചതിനെ തുടർന്ന് സംഘം സ്ഥലത്തെത്തിയപ്പോഴേക്കും കാർ പൂർണ്ണമായും കത്തിനശിച്ചിരുന്നു. പിന്നീട് ഫയർഫോഴ്‌സും പൊലീസും ചേർന്ന് തീ അണച്ച് മൃതദേഹങ്ങൾ പുറത്തെടുക്കുകയായിരുന്നു.
