തിരുവനന്തപുരം: ഉപതെരഞ്ഞെടുപ്പ് നടക്കുന്ന വട്ടിയൂര്‍ക്കാവ് മണ്ഡലത്തെ ശ്രദ്ധേയമാക്കുന്നത് ഇവിടുത്തെ പ്രകൃതി ഭംഗിയാണ്. കരമനയാറിന് സമീപമുള്ള അരുവിക്കോണം മേലേക്കടവ് സഞ്ചാരികളുടെ മുഖ്യആകര്‍ഷണ കേന്ദ്രമാണ്. അരുവിക്കോണം ആയിരവല്ലി ശിവക്ഷേത്രത്തിന് സമീപമാണ് ഈ മനോഹരമായ കാഴ്ചയുള്ളത്.
അരുവിക്കോണം ആയിരവല്ലി ശിവക്ഷേത്രത്തിന് സമീപമാണ് ഈ കടവ്
ശാന്തമായി ഒഴുകുന്ന പുഴയ്ക്ക് ഇവിടെ മറ്റൊരു ഭാവമാണുള്ളത്. കല്ലുകളില്‍ തട്ടിത്തെറിച്ച് കുത്തിയൊഴുകുന്ന പുഴ മനോഹരമായ കാഴ്ചയാണ്. അരുവിക്കര ഡാം തുറന്നാല്‍ ഈ ശാന്തഭാവം രൗദ്രഭാവമായി മാറും. ഈ സൗന്ദ്യരത്തിന് പിന്നില്‍ അപകടവും പതിയിരിക്കുന്നുണ്ട്. നിരവധി കുഴികളാണ് മരണവുമായി പുഴയില്‍ ഒളിച്ചിരിക്കുന്നത്. നിരവധി ജീവൻ ഇവിടെ പൊലിയുകയും ചെയ്തു. അപകടങ്ങളുടെ പശ്ചാത്തലത്തില്‍ മുന്നറിയിപ്പ് ബോര്‍ഡുകള്‍ക്ക് പുറമേ പൊലീസ് നിരീക്ഷണവും ഏര്‍പ്പെടുത്തിയിട്ടുണ്ട്.
