തിരുവനന്തപുരം : റേഡിയോ ജോക്കി രാജേഷ് വധക്കേസില്‍ രണ്ട് പ്രതികള്‍ കുറ്റക്കാരെന്ന് തിരുവനന്തപുരം ഒന്നാം അഡീഷണല്‍ സെഷന്‍സ് കോടതി. കേസിലെ രണ്ടാം പ്രതി മുഹമ്മദ് സാലിഹും മൂന്നാം പ്രതി അപ്പുണ്ണിയും കുറ്റക്കാരെന്നാണ് കോടതി കണ്ടെത്തിയിരിക്കുന്നത്. ഇന്ത്യന്‍ ശിക്ഷ നിയമത്തിലെ 201 തെളിവ് നശിപ്പിക്കല്‍, 449 അതിക്രമിച്ചുകയറല്‍, 302 കൊലപാതകം (ഗൂഢാലോചന), 326 മാരകായുധം ഉപയോഗിച്ച് കൊലപാതകം, ആംസ് ആക്ട് 27(1) എന്നീ വകുപ്പുകള്‍ പ്രകാരമാണ് കുറ്റക്കാരെന്ന് കണ്ടെത്തിയിരിക്കുന്നത്.
കേസിലെ നാല് മുതല്‍ 12 വരെയുള്ള പ്രതികളെ കോടതി വെറുതേവിട്ടു. കേസിലെ ഒന്നാം പ്രതി മുഹമ്മദ് സത്താര്‍ ഇപ്പോഴും ഒളിവിലാണ്. കേസില്‍ കൂറുമാറിയ ഒന്നാം സാക്ഷി കുട്ടനെതിരെ കോടതി കേസ് എടുത്തില്ല. എന്നാല്‍ പ്രോസിക്യൂഷന് ഹാജരാക്കിയ പതിനഞ്ചാം സാക്ഷിയായ മനോജിനെതിരെ കോടതി സ്വമേധയ കേസെടുത്തു. കേസിലെ പ്രതികള്‍ക്ക് വാഹനങ്ങള്‍ സംഘടിപ്പിച്ച് നല്‍കിയതിനാണ് മനോജിനെതിരെ കേസെടുത്തത്.
2018 മാര്‍ച്ച് 26നാണ് മടവൂരിലെ സ്റ്റുഡിയോയില്‍ വച്ച് റേഡിയോ ജോക്കിയായ രാജേഷിനെ ഒരു സംഘം വെട്ടി കൊലപ്പെടുത്തിയത്. 2018 ജൂലൈ 2 നാണ് അന്വേഷണം പൂര്‍ത്തിയാക്കി കുറ്റപത്രം അന്വേഷണ സംഘം കോടതിയില്‍ സമര്‍പ്പിച്ചത്. ഒന്നാം പ്രതി സത്താറിന്‍റെ ഭാര്യയും നൃത്താധ്യാപികയുമായ യുവതിയുമായി ഖത്തറിലുണ്ടായിരുന്ന വേളയില്‍ രാജേഷിനുള്ള അടുപ്പമാണ് കൊലപാതകത്തില്‍ കലാശിച്ചത്.
നേപ്പാള്‍ വഴി കേരളത്തിലെത്തിയ സത്താര്‍ ക്വട്ടേഷന്‍ സംഘത്തെ സംഘടിപ്പിച്ച് കൊലപാതകം നടത്തുകയായിരുന്നു. സത്താറിന്‍റെ സ്ഥാപനത്തിലെ ജീവനക്കാരനായിരുന്ന രണ്ടാം പ്രതി മുഹമ്മദ് സാലിഹിന്‍റെ സഹായത്തോടെയാണ് സംഘത്തെ ഒരുമിപ്പിച്ചതും കൊലപാതകം നടത്തിയതും. കൊലയ്ക്ക് ശേഷം വിദേശത്തേക്ക് രക്ഷപ്പെട്ട സാലിഹിനെ ഇതുവരെ കണ്ടെത്താന്‍ കഴിഞ്ഞിട്ടില്ല.
കേസ് നടത്തിപ്പില്‍ പ്രോസിക്യൂഷന് വീഴ്ച വന്നതിനെ തുടര്‍ന്ന് അഭിഭാഷകനെ മാറ്റിയിരുന്നു. ഇത് കൂടാതെ രാജേഷ് കൊല ചെയ്യപ്പെട്ട സമയത്ത് ഒപ്പമുണ്ടായിരുന്ന സുഹൃത്ത് കുട്ടന്‍ കേസില്‍ മൊഴി മാറ്റി പറയുകയും ചെയ്തു. ആദ്യ ഘട്ട വിചാരണയില്‍ പ്രോസിക്യൂഷന് അനുകൂല മൊഴി നല്‍കിയ ഒന്നാം സാക്ഷി കുട്ടനാണ് വീണ്ടും സാക്ഷിവിസ്‌താരത്തിന് എത്തിയപ്പോള്‍ കൂറുമാറിയത്. കൊല്ലാനായി എത്തിയ പ്രതികള്‍ മുഖം മൂടി ധരിച്ചിരുന്നതിനാല്‍ ആരെയും തിരിച്ചറിയാന്‍ കഴിഞ്ഞിരുന്നില്ല എന്നാണ് ഒന്നാം സാക്ഷി കോടതിയില്‍ മൊഴി നല്‍കിയത്.
ആദ്യഘട്ടത്തില്‍ പ്രതികളെ തിരിച്ചറിഞ്ഞ സാക്ഷിയാണ് പിന്നീട് മൊഴി മാറ്റിയത്. രണ്ടും, മൂന്നും, നാലും പ്രതികളായ മുഹമ്മദ് സാലിഹ്, അപ്പുണ്ണി, തന്‍സീര്‍ എന്നിവര്‍ ചേര്‍ന്ന് വെട്ടിക്കൊല്ലുന്നത് കണ്ടെന്നാണ് ഒന്നാം സാക്ഷി കുട്ടന്‍ മൊഴി നല്‍കിയിരുന്നത്. എന്നാല്‍ ഇങ്ങനെ പറഞ്ഞത് പൊലീസ് തന്നെ ഭീഷണിപ്പെടുത്തി പറയിപ്പിച്ചതായിരുന്നെന്നും ഇന്ന് സഹോദരനൊപ്പം എത്തിയതിനാല്‍ ഭയമില്ലാതെയാണ് കോടതിയില്‍ സത്യം പറയുന്നത് എന്നും സാക്ഷി കൂട്ടിച്ചേര്‍ത്തു.
സാലി എന്ന മുഹമ്മദ് സാലിഹ്, കായംകുളം സ്വദേശി അപ്പു എന്ന അപ്പുണ്ണി, കരുനാഗപ്പള്ളി സ്വദേശി കെ. തന്‍സീര്‍, കുണ്ടറ സ്വദേശി സ്ഫടികം എന്ന സ്വാതി സന്തോഷ്, കൊല്ലം സ്വദേശി സനു സന്തോഷ്, ഓച്ചിറ സ്വദേശി എ. യാസീന്‍, കുണ്ടറ സ്വദേശി ജെ. എബി ജോണ്‍, സുമിത്ത്, സുമിത്തിന്റ ഭാര്യ ഭാഗ്യ ശ്രീ, എറണാകുളം സ്വദേശി സെബല്ല ബോണി, വര്‍ക്കല സ്വദേശി ഷിജിന ഷിഹാബ് എന്നിവരാണ് കേസില്‍ വിചാരണ നേരിട്ടത്. കുറ്റക്കാരെന്ന് കണ്ടെത്തിയ രണ്ട് പ്രതികള്‍ക്കുളള ശിക്ഷാവിധി ബുധനാഴ്ച കോടതി പുറപ്പെടുവിക്കും.
ALSO READ : ആലുവ കൊലക്കേസ്; അന്വേഷണം ഊര്‍ജിതമാക്കി ബിഹാറിലും ഡല്‍ഹിയിലുമെത്തി പൊലീസ്
