തിരുവനന്തപുരം: യൂണിവേഴ്‌സിറ്റി കോളജില്‍ ആത്മഹത്യയ്ക്ക് ശ്രമിച്ച പെൺകുട്ടിക്ക് കോളജ് മാറ്റത്തിന് അനുമതി. സർവകലാശാല സിൻഡിക്കേറ്റ് ആണ് വർക്കല എസ്എൻ കോളജിലേക്ക് മാറുന്നതിന് അനുമതി നൽകിയത്.
യൂണിവേഴ്‌സിറ്റി കോളജില്‍ എഴുതാൻ കഴിയാത്ത പരീക്ഷ എഴുതാനും അനുമതി നൽകിയിട്ടുണ്ട്. രണ്ടാം സെമസ്റ്ററിൽ എഴുതാൻ കഴിയാതിരുന്ന പരീക്ഷ എഴുതാനാണ് അനുമതി നൽകിയത്. കോളജ് മാറുന്നതിന് അനുമതി നൽകാമെന്ന സിൻഡിക്കേറ്റ് തീരുമാനത്തിന്റെ അടിസ്ഥാനത്തിൽ സർവകലാശാല രജിസ്ട്രാർ ആണ് ഉത്തരവ് ഇറക്കിയത്. മൂന്നാം സെമസ്റ്ററിലേക്കാണ് പ്രവേശനം അനുവദിച്ചിട്ടുള്ളത്. ക്ലാസുകൾ കൃത്യമായി നടക്കുന്നില്ലെന്ന് ആരോപിച്ച് മെയ് മൂന്നിനാണ് കുട്ടി ആത്മഹത്യക്ക് ശ്രമിച്ചത്. വിദ്യാർഥി യൂണിയൻ നേതാക്കൾ പരീക്ഷക്കിടെ നിർബന്ധിച്ച് പ്രവര്‍ത്തനങ്ങള്‍ക്ക് ഇറക്കിയെന്നും ആത്മഹത്യാ കുറിപ്പിൽ പരാമർശം ഉണ്ടായിരുന്നു. എന്നാൽ പിന്നീട് പെൺകുട്ടി പരാതിയില്ലെന്ന് പോലീസിന് മൊഴി നൽകി. അതേസമയം സംഭവത്തിൽ അന്വേഷണം നടത്താൻ മൂന്നംഗ സമിതിയെ നിയോഗിച്ചുവെന്നും വിദ്യാർഥികളുടെയും അദ്ധ്യാപകരുടെയും രഹസ്യമൊഴി എടുക്കാൻ നിർദേശം നൽകിയിട്ടുണ്ടെന്നും മന്ത്രി കെ ടി ജലീൽ കഴിഞ്ഞ ദിവസം നിയമസഭയെ അറിയിച്ചിരുന്നു.
