ഗവര്‍ണര്‍ ആരിഫ് മുഹമ്മദ് ഖാനുമായുള്ള അഭിപ്രായ വ്യത്യാസം തുടരുമെങ്കിലും ഇക്കൊല്ലവും നിയമസഭാ സമ്മേളനം ആരംഭിക്കുന്നത് ഗവര്‍ണറുടെ നയപ്രഖ്യാപന പ്രസംഗത്തോടെ തന്നെ ആയിരിക്കുമെന്ന് സ്പീക്കര് പി.ശ്രീരാമകൃഷ്ണന്. ഗവര്‍ണര്‍ സര്ക്കാരിന്റെ തലവനാണ്. അതിനാല്‍ സര്ക്കാരിന്റെ നയം പറയേണ്ടത് ഗവര്‍ണറാണ്. ലോക കേരള സഭ സമ്പൂര്‍ണ പരാജയം എന്നു പറയേണ്ടത് പ്രതിപക്ഷ നേതാവല്ല, അതില്‍ പങ്കെടുത്തവരാണ്. പ്രതിപക്ഷത്തെ ലോക കേരള സഭയുമായി സഹകരിപ്പിക്കാനുള്ള ശ്രമം തുടരും. അഭിപ്രായവ്യത്യാസമുണ്ടെങ്കിലും ഇക്കൊല്ലവും നിയമസഭാ സമ്മേളനം ഗവര്‍ണറുടെ നയപ്രഖ്യാപന പ്രസംഗത്തോടെ തന്നെ ആരംഭിക്കും. പൗരത്വ ഭേദഗതി നിയമത്തിനെതിരെ നിയമസഭ പ്രമേയം പാസാക്കിയതില്‍ ഒരു തെറ്റുമില്ലെന്നും ഇ.ടി.വി ഭാരതിന് അനുവദിച്ച പ്രത്യേക അഭിമുഖത്തില്‍ സ്പീക്കര് പറഞ്ഞു.
ലോക കേരള സഭയില്‍ നിന്നും പ്രതിപക്ഷം വിട്ടു നിന്നത് സഭയുടെ നിറം കെടുത്തിയോ?
പ്രതിപക്ഷ സാന്നിധ്യം ഉണ്ടാകേണ്ടതായിരുന്നു. പ്രതിപക്ഷ ശബ്ദം ഉയരുന്നതില്‍ അവിടെ ഒരു തടസവും ഉണ്ടായിരുന്നില്ല. രാഷ്ട്രീയ കാരണങ്ങളാലാണ് ബഹിഷ്‌കരിച്ചതെന്ന് പ്രതിപക്ഷം വ്യക്തമാക്കിയിട്ടുണ്ട്. മറ്റ് രാഷ്ട്രീയ അഭിപ്രായ വ്യത്യാസങ്ങള്‍ ലോക കേരളസഭയില്‍ നിന്ന് മാറ്റി വയ്ക്കണം എന്ന് അവരെ ബോധ്യപ്പെടുത്താന്‍ ശ്രമിച്ചിരുന്നു. അത് ഇനിയും തുടരും.
കേരള സഭയിലേക്ക് പലവട്ടം ക്ഷണിച്ചിട്ടും പ്രതിപക്ഷം സങ്കുചിത രാഷ്ട്രീയം കളിച്ചുവെന്ന മുഖ്യമന്ത്രിയുടെ വിമര്‍ശനത്തെ എങ്ങനെ കാണുന്നു?
പ്രതിപക്ഷം സങ്കുചിത രാഷ്ട്രീയം കളിച്ചുവെന്ന അഭിപ്രായമില്ല. അവര്‍ ഇടയ്ക്ക് വിട്ടു പോയി. അവരെ യോജിപ്പിക്കാനുള്ള ശ്രമം തുടരുകയാണ്. അതിന് തടസമില്ലെന്ന് മുഖ്യമന്ത്രി പറഞ്ഞെന്നാണ് മനസിലാക്കുന്നത്.
മുതല്‍ മുടക്കാന്‍ തയ്യാറായി വരുന്ന വിദേശ മലയാളി സംരഭകര്‍ക്ക് സര്‍ക്കാര്‍ ഓഫീസുകളില്‍ നിരവധി തവണ കയറിയിറങ്ങേണ്ടി വരുന്നു എന്നാണ് ലോക കേരള സഭയില്‍ ഉയര്‍ന്ന പരാതി?
സംരംഭങ്ങള്‍ക്ക് അനുമതി കിട്ടാന്‍ ചുവപ്പു നാട ഉണ്ട് എന്നത് ശരിയാണ്. അത് ഇനി ഉണ്ടാകില്ലെന്ന് സര്‍ക്കാര്‍ വ്യക്തമാക്കിയിട്ടുണ്ട്. ഇത് പരിഹരിക്കുന്നതിനാണ് സര്‍ക്കാര്‍ ഈസ് ഓഫ് ഡൂയിംഗ് ബിസിനസ് ആരംഭിച്ചത്.
കേന്ദ്രമന്ത്രി രവിശങ്കര്‍ പ്രസാദ് നിയമസഭയുടെ പ്രമേയം ഭരണഘടനാ വിരുദ്ധമെന്ന് വ്യക്തമാക്കിയതിനെതിരെ കോണ്‍ഗ്രസ് നിയമസഭാ കക്ഷി നേതാവ് കെ.സി.ജോസഫ് അവകാശലംഘന നോട്ടീസ് നല്‍കി?
രവിശങ്കര്‍ പ്രസാദ് പറയുന്നത് ഭരണഘടനയെ കുറിച്ചാണെങ്കില്‍ ഭരണ ഘടനയുടെ ആമുഖം വ്യക്തമാക്കുന്നത് ഇന്ത്യ ഒരു മതേതര രാജ്യമെന്നാണ്. മതത്തിന്റെ പേരില്‍ പൗരത്വ രജിസ്റ്റര്‍ തയ്യാറാക്കുമോ എന്ന ചോദ്യമാണ് ഉയരുന്നത്. ഭരണഘടനയുടെ അനുച്ഛേദം 14,15 എന്നിവയുടെ ലംഘനമാണ് പൗരത്വ ബില്ലിലൂടെ ഉണ്ടായിരിക്കുന്നത്. മതത്തിന്റെ പേരില്‍ പൗരത്വം എന്നത് ശരിയായ കാര്യമല്ല. ആ തെറ്റ് ചൂണ്ടിക്കാട്ടുകയാണ് ചെയ്തത്.
