തിരുവനന്തപുരം: ക്ലിഫ് ഹൗസില്‍ സുരക്ഷ ഉദ്യോഗസ്ഥന്‍റെ തോക്കില്‍ നിന്നും അബദ്ധത്തില്‍ വെടി പൊട്ടി. തോക്ക് വൃത്തിയാക്കുന്നതിനിടയിലാണ് വെടിപൊട്ടിയത്. തോക്കില്‍ വെടിയുണ്ടയുള്ളത് ശ്രദ്ധിച്ചിരുന്നില്ലെന്നാണ് ഉദ്യോഗസ്ഥന്‍ നല്‍കുന്ന വിശദീകരണം.
ഗാര്‍ഡ് റൂമില്‍ വച്ചാണ് വെടിപൊട്ടിയത്. മുഖ്യമന്ത്രി നിയമസഭയിലേക്ക് പോയ ശേഷമാണ് സംഭവം നടന്നത്. ഗാര്‍ഡ് റൂമിലെ ചുമരില്‍ തറച്ച നിലയിലാണ് വെടിയുണ്ടയുള്ളത്.
രാവിലെ ഡ്യൂട്ടി മാറുമ്പോള്‍ പൊലീസുകാര്‍ ആയുധങ്ങള്‍ വൃത്തിയാക്കുന്നത് പതിവാണ്. പൊലീസുകാരന്‍ തോക്ക് താഴേക്ക് ചൂണ്ടി വൃത്തിയാക്കുകയായിരുന്നു. ഈ സമയത്താണ് വെടിപൊട്ടിയത്.
ആര്‍ക്കും പരിക്കേറ്റിട്ടില്ല. വിശദമായ പരിശോധനയ്‌ക്ക് സിറ്റി പൊലീസ് കമ്മിഷണര്‍ സ്‌പര്‍ജ്ജന്‍ കുമാര്‍ നിര്‍ദേശം നല്‍കിയിട്ടുണ്ട്.
