തിരുവനന്തപുരം: നിയമസഭയിലെ സംഘര്‍ഷത്തിനു പിന്നാലെ ഏഴ് പ്രതിപക്ഷ എംഎല്‍എമാര്‍ക്കെതിരെ ജാമ്യമില്ല വകുപ്പ് പ്രകാരം കേസെടുത്ത നടപടിയെ പുച്ഛിച്ചു തള്ളി എംഎല്‍എമാര്‍. എംഎല്‍എമാരായ അനൂപ് ജേക്കബ്, അന്‍വര്‍ സാദത്ത്, ഐ.സി ബാലകൃഷ്‌ണന്‍, പി.കെ ബഷീര്‍, കെ.കെ രമ, ഉമ തോമസ് എന്നിവരാണ് തങ്ങള്‍ക്കെതിരെ കേസെടുത്തതിനെ വെല്ലുവിളിച്ച് രംഗത്തുവന്നത്. അതേസമയം തുടര്‍ച്ചയായി അടിയന്തര പ്രമേയ നോട്ടീസിന് പരിഗണിക്കാത്ത സാഹചര്യത്തിലാണ് നിയമസഭ സമുച്ചയത്തിലെ സ്‌പീക്കറുടെ ഓഫിസിനു മുന്നില്‍ കുത്തിയിരുന്ന് പ്രതിഷേധിക്കാന്‍ പ്രതിപക്ഷ എംഎല്‍എമാര്‍ തീരുമാനിച്ചത്.
സ്‌പീക്കറെ തടയില്ലെന്നും സ്‌പീക്കറുടെ ഓഫിസിലേക്ക് തള്ളിക്കയറില്ലെന്നും ഉറപ്പുനല്‍കിയിട്ടും യാതൊരു പ്രകോപനവുമില്ലാതെ പ്രതിഷേധിച്ച എംഎല്‍എമാര്‍ക്കെതിരെ ബലപ്രയോഗം നടത്താനാണ് വാച്ച് ആന്‍ഡ് വാര്‍ഡ് ശ്രമിച്ചത്. നിയമസഭയിലെ മുതിര്‍ന്ന അംഗമായ തിരുവഞ്ചൂര്‍ രാധാകൃഷ്‌ണനോട് ഡെപ്യൂട്ടി ചീഫ് മാര്‍ഷല്‍ അപമര്യാദയായി പെരുമാറുകയും തള്ളിമാറ്റുകയും ചെയ്‌തു. ഇതിനിടെ സിപിഎം എംഎല്‍എമാരായ എച്ച്.സലാം, സച്ചിന്‍ദേവ്, ഐ.ബി സതീഷ്, ആന്‍സലന്‍ എന്നിവര്‍ തങ്ങള്‍ക്ക് നേരെ പാഞ്ഞടുത്തുവെന്നും എംഎല്‍എമാര്‍ സംയുക്ത പ്രസ്‌താവനയില്‍ അറിയിച്ചു.
വാച്ച് ആന്‍ഡ് വാര്‍ഡോ, പാര്‍ട്ടി ഗുണ്ടകളോ: സലാം, സച്ചിന്‍ദേവ് എന്നിവരുടെ ആക്രമണത്തില്‍ താഴെ വീണ സനീഷ്‌കുമാര്‍ ജോസഫിനെ ഡെപ്യൂട്ടി ചീഫ് മാര്‍ഷല്‍ ബൂട്ടിട്ട കാലുകൊണ്ട് ചവിട്ടുകയും മറ്റ് വാച്ച് ആന്‍ഡ് വാര്‍ഡുകള്‍ അദ്ദേഹത്തെ ആക്രമിക്കുകയും ചെയ്‌തു. ബോധരഹിതനായ സനീഷ്‌കുമാറിനെ ആശുപത്രിയിലേക്ക് മാറ്റുന്നതിനിടെ കെ.കെ രമയുടെ കൈ പിന്നിലേക്ക് പിടിച്ച് വാച്ച് ആന്‍ഡ് വാര്‍ഡ് ഉദ്യോഗസ്ഥര്‍ വളിച്ചിഴയ്ക്കുകയും ആക്രമിക്കുകയും ചെയ്‌തു. സിപിഎമ്മിനൊപ്പം ചേര്‍ന്ന് ഗൂഡാലോചന നടത്തി പാര്‍ട്ടി ഗുണ്ടകളെപ്പോലെയാണ് ഡെപ്യൂട്ടി ചീഫ് മാര്‍ഷലും വാച്ച് ആന്‍ഡ് വാര്‍ഡ് അംഗങ്ങളും പെരുമാറിയതെന്നും സിപിഎം എംഎല്‍എമാരും ഇവര്‍ക്കൊപ്പം ചേര്‍ന്നുവെന്നും എംഎല്‍എമാര്‍ കുറ്റപ്പെടുത്തി.
ആക്രമണത്തില്‍ കൈയൊടിഞ്ഞ കെ.കെ രമ ഇന്നലെ തന്നെ സംസ്ഥാന പൊലീസ് മേധാവിക്ക് പരാതി നല്‍കിയെങ്കിലും ഒരു നടപടിയും ഉണ്ടായില്ല. രാത്രി വൈകിയാണ് സനീഷ്‌കുമാര്‍ ജോസഫിന്‍റെ മൊഴി രേഖപ്പെടുത്തിയത്. ഡെപ്യൂട്ടി ചാഫ് മാര്‍ഷലിന്‍റെയും വനിതാ വാച്ച് ആന്‍ഡ് വാര്‍ഡിന്‍റെയും പരാതി എഴുതി വാങ്ങി അവരുടെ മൊഴി രേഖപ്പെടുത്താന്‍ പൊലീസ് കാട്ടിയ തിടുക്കം പരിക്കേറ്റ് ആശുപത്രിയില്‍ കഴിയുന്ന എംഎല്‍എമാരുടെ കാര്യത്തിലുണ്ടായില്ലെന്നും ആക്രമണത്തിനിരയായ തങ്ങളുടെ എംഎല്‍എമാര്‍ നല്‍കിയ പരാതിയില്‍ ജാമ്യം ലഭിക്കുന്ന വകുപ്പുകള്‍ മാത്രമാണ് ഉള്‍പ്പെടുത്തിയതെന്നും പ്രതിപക്ഷ എംഎല്‍എമാര്‍ പ്രസ്‌താവനയില്‍ വിമര്‍ശിച്ചു.
ഇരുപക്ഷത്തിനും രണ്ട് നിയമമോ: അതേസമയം തങ്ങള്‍ക്കെതിരെ ഡെപ്യൂട്ടി ചീഫ് മാര്‍ഷലും വാച്ച് ആന്‍ഡ് വാര്‍ഡും നല്‍കിയ പരാതിയില്‍ ജാമ്യമില്ലാത്ത വകുപ്പുകളാണ് ചുമത്തിയിരിക്കുന്നത്. പ്രതിപക്ഷത്തിന്‍റെ നിയമസഭയിലെ അവകാശങ്ങള്‍ നിഷേധിക്കുന്നതിനൊപ്പം പൊലീസും നീതിനിഷേധത്തിന് കൂട്ടു നില്‍ക്കുകയാണ്.
ജനാധിപത്യ സംവിധാനത്തില്‍ ഇത് അംഗീകരിക്കാനാകില്ലെന്നും നിയമവിരുദ്ധവും ജനാധിപത്യ വിരുദ്ധവുമായി ചെയ്യുന്നതെല്ലാം ജനങ്ങള്‍ കാണുന്നുണ്ടെന്ന് സര്‍ക്കാരും സിപിഎമ്മും ഓര്‍ക്കണമെന്നും എംഎല്‍എമാര്‍ അറിയിച്ചു. ഒരു തരത്തിലുള്ള ഭീഷണിക്കും പ്രതിപക്ഷം വഴങ്ങില്ലെന്നും കള്ളക്കേസും കയ്യൂക്കും കൊണ്ട് തളര്‍ത്താനുമാകില്ലെന്നും അവര്‍ പ്രസ്‌താവനയില്‍ വ്യക്തമാക്കി. ജനവിരുദ്ധ സര്‍ക്കാരിനെതിരെ സാധ്യമായ എല്ലാ നിലകളിലും പോരാട്ടം തുടരുമെന്നും കള്ളക്കേസിനെ നിയമപരമായും രാഷ്‌ട്രീയമായും നേരിടുമെന്നും പ്രതിപക്ഷ എംഎല്‍എമാര്‍ അറിയിച്ചു. തുടര്‍ഭരണത്തില്‍ എന്തും ചെയ്യാമെന്ന ധാര്‍ഷ്‌ട്യം ജനങ്ങളോടുള്ള വെല്ലുവിളിയാണെന്ന് ഓര്‍മ്മിപ്പിക്കട്ടെയെന്നും എംഎല്‍എമാര്‍ സംയുക്ത പ്രസ്‌താവനയില്‍ കൂട്ടിച്ചേര്‍ത്തു.
