തിരുവനന്തപുരം: ഷാഫി പറമ്പിൽ എംഎൽഎക്കെതിരായ പൊലീസ് മർദനത്തിൽ പ്രതിഷേധിച്ച് സ്‌പീക്കറുടെ ഡയസിൽ കയറി മുദ്രാവാക്യം വിളിച്ച നാല് പ്രതിപക്ഷ എം.എൽ.എമാര്‍ക്ക് സ്‌പീക്കറുടെ ശാസന. റോജി എം. ജോൺ, ഐ.സി ബാലകൃഷ്ണൻ, അൻവർ സാദത്, എൽദോസ് കുന്നപ്പള്ളി എന്നിവർക്കെതിരെ നിയമസഭ ചട്ടപ്രകാരമാണ് നടപടിയെന്ന് സ്പീക്കർ പി. ശ്രീരാമകൃഷ്ണൻ അറിയിച്ചു. ഡയസിൽ കയറിയ നടപടി പെരുമാറ്റ ചട്ടങ്ങളുടെ ലംഘനവും സഭയുടെ അന്തസിന് ചേരാത്തതാണെന്നും സ്പീക്കർ പറഞ്ഞു.
സ്‌പീക്കറുടെ നടപടി അംഗീകരിക്കാൻ പ്രതിപക്ഷം തയ്യാറായില്ല. തുടർന്ന് പ്രതിഷേധവുമായി സ്‌പീക്കറുടെ ഡയസിനു മുന്നിലെത്തി. എല്ലാവരോടും കൂടിയാലോചിച്ച് തീരുമാനമെടുക്കാമെന്നാണ് സ്പീക്കർ നേരത്തെ വ്യക്തമാക്കിയതെന്നും നിലവിലെ നടപടി ഏകപക്ഷീയമാണെന്നും പ്രതിപക്ഷ നേതാവ് രമേശ് ചെന്നിത്തല ആരോപിച്ചു.
ചരിത്രത്തിലില്ലാത്ത വിധമാണ് പ്രതിപക്ഷ പ്രതിഷേധമെന്നും മുൻകാലങ്ങളിലും നടപടി ഉണ്ടായിട്ടുണ്ടെന്നും സ്പീക്കർ വ്യക്തമാക്കി. എന്നാൽ കക്ഷി നേതാക്കളുടെ യോഗത്തിൽ ഒ.രാജഗോപാൽ മാത്രമാണ് നടപടി ആവശ്യപ്പെട്ടതെന്നും സ്‌പീക്കറുടെ ഉപദേശി ഒ. രാജഗോപാലാണെന്നും പ്രതിപക്ഷം തിരിച്ചടിച്ചു. എന്നാല്‍ തീരുമാനം ചെയറിന്‍റേതാണെന്നും അതിനെ ദുർവ്യാഖ്യാനം ചെയ്യേണ്ടന്നും സ്പീക്കർ മറുപടി നൽകി.
സ്‌പീക്കറുടെ നടപടിയിൽ പ്രതിഷേധിച്ച് പ്രതിപക്ഷം അടിയന്തര പ്രമേയാവതരണത്തിൽ നിന്നും പിന്മാറി. പ്രതിഷേധം അവഗണിച്ച് സ്പീക്കർ മറ്റു നടപടികളിലേക്ക് കടന്നെങ്കിലും പ്രതിപക്ഷം ബഹളം വച്ചു. തുടർന്ന് സഭ താത്കാലികമായി നിർത്തിവക്കുന്നതായി അറിയിച്ച് സ്പീക്കർ ചേമ്പറിലേയ്ക്ക് മടങ്ങി.
