തിരുവനന്തപുരം: കൊവിഡ് 19 പ്രതിരോധ പ്രവർത്തനങ്ങളില്‍ ആരോഗ്യവകുപ്പിന് കൈത്താങ്ങായി ജയിൽ വകുപ്പ്. ജയിലുകളില്‍ നിന്ന് പ്രതിദിനം ഇരുപതിനായിരത്തോളം മാസ്‌കുകൾ നിർമ്മിച്ചു നൽകാൻ തീരുമാനമായി. തിരുവനന്തപുരം പൂജപ്പുര സെൻട്രൽ ജയിലിലെ യൂണിറ്റിൽ മാസ്‌കുകളുടെ നിർമ്മാണം പുരോഗമിക്കുന്നു. ആരോഗ്യവകുപ്പിന്‍റെ മാനദണ്ഡമനുസരിച്ചുള്ള പ്രത്യേക തുണിയിലാണ് മാസ്‌കുകൾ നിർമ്മിക്കുന്നത്. പതിനഞ്ചോളം തടവുകാരും ജയിൽ ജീവനക്കാരുമാണ് മാസ്‌കുകൾ നിർമ്മിക്കുന്നത്.
ഉപയോഗിച്ച ശേഷം വൃത്തിയാക്കി വീണ്ടും ഉപയോഗിക്കാൻ കഴിയുന്ന മാസ്‌കുകളാണിത്. പൂജപ്പുര സെൻട്രൽ ജയിലിൽ മാത്രം മൂവായിരത്തിനും അയ്യായിരത്തിനുമിടയിൽ മാസ്‌കുകൾ ദിവസേന നിർമ്മിക്കും. ഇതു കൂടാതെ സംസ്ഥാനത്തെ എട്ട് ജയിലുകളിലായി 15000 ത്തിനും 20000 ത്തിനും ഇടയിൽ മാസ്‌കുകളാണ് ആരോഗ്യവകുപ്പിന് നിർമ്മിച്ചു നൽകുന്നത്. ഒരു മാസ്‌കിന് ഏകദേശം പത്ത് രൂപയോളം നിർമ്മാണ ചെലവ് വരും. ജയിൽ വകുപ്പിന്‍റെ ഇടപെടലിലൂടെ ഒരു പരിധി വരെ മാസ്‌കുകളുടെ ക്ഷാമം പരിഹരിക്കാൻ കഴിയുമെന്നാണ് പ്രതീക്ഷ.
