തിരുവനന്തപുരം: നിയുക്ത മന്ത്രിമാരായ കെ ബി ഗണേഷ് കുമാറിന്‍റെയും കടന്നപ്പള്ളി രാമചന്ദ്രന്‍റെയും സത്യപ്രതിജ്ഞ ചടങ്ങ് ഇന്ന് (ഡിസംബര്‍ 29) നടക്കും. രാജ്ഭവൻ വളപ്പിൽ സജ്ജമാക്കിയ വേദിയില്‍ വൈകുന്നേരം നാല് മണിക്കാണ് ചടങ്ങ് നടക്കുക. ഗവർണർ സർക്കാർ പോര് നിലനിൽക്കുന്നതിനിടെ ചടങ്ങിൽ മുഖ്യമന്ത്രിയും ഗവർണറും തമ്മിൽ വേദി പങ്കിടും.
ഇടത് മുന്നണിയിലെ നിലവിലെ ധാരണ പ്രകാരം കെ ബി ഗണേഷ് കുമാറിന് ഗതാഗത വകുപ്പും കടന്നപ്പള്ളി രാമചന്ദ്രന് തുറമുഖ വകുപ്പും ലഭ്യമാകുമെന്നാണ് വിവരം. സിനിമ വകുപ്പ് കൂടി നൽകണമെന്ന് ആവശ്യം കെ ബി ഗണേഷ് കുമാര്‍ ഉന്നയിച്ചിട്ടുണ്ട്. മാത്രമല്ല പേഴ്‌സണൽ സ്റ്റാഫുകളുടെ എണ്ണം കുറയ്ക്കണമെന്നും ഔദ്യോഗിക വസതി വേണ്ടെന്നും അദ്ദേഹം മുഖ്യമന്ത്രിയെ അറിയിച്ചിട്ടുണ്ട്.
നവകേരള സദസിന് ശേഷം മന്ത്രി സഭ പുനഃസംഘടന ഉണ്ടാകുമെന്ന് ഇടതുമുന്നണി നേരത്തെ തന്നെ വ്യക്തമാക്കിയിരുന്നതാണ്. രണ്ടാം പിണറായി സര്‍ക്കാരില്‍ ആദ്യഘട്ടത്തില്‍ അവസരം ലഭിക്കാത്ത ഘടകകക്ഷികള്‍ക്ക് രണ്ടരവര്‍ഷത്തിന് ശേഷം മന്ത്രിസഭയില്‍ പ്രാതിനിധ്യം നല്‍കുമെന്ന് നേരത്തെ തന്നെ ധാരണയുണ്ടായിരുന്നു. പൂര്‍ണസംതൃപ്‌തിയോടെയാണ് പടിയിറങ്ങുന്നതെന്ന് അഹമ്മദ് ദേവര്‍കോവിലും ആന്‍റണി രാജുവും രാജി സമര്‍പ്പിച്ച ശേഷം അഭിപ്രായപ്പെട്ടിരുന്നു.
പ്രധാനമന്ത്രി വിളിച്ച ചീഫ് സെക്രട്ടറിമാരുടെ യോഗം ഉള്ളതിനാൽ ചീഫ് സെക്രട്ടറി വി വേണു സത്യപ്രതിജ്ഞാ ചടങ്ങിന് എത്തില്ല. പകരം അഡീഷണൽ ചീഫ് സെക്രട്ടറി ശാരദ മുരളീധരനാണ് പങ്കെടുക്കുക.
ഗണേഷ് കുമാറിന് സിനിമ വകുപ്പ് കൂടി നല്‍കുന്ന കാര്യത്തില്‍ അന്തിമ തീരുമാനം ഇന്നാകും ഉണ്ടാകുക. ഇന്ന് രാവിലെ ചേരുന്ന സിപിഎം സംസ്ഥാന സെക്രട്ടറിയേറ്റ് ഈ വിഷയവും ചര്‍ച്ച ചെയ്‌തേക്കും. കൂടാതെ, നവകേരള സദസിന്‍റെ വിലയിരുത്തലും ലോക്‌സഭാ തിരഞ്ഞെടുപ്പുമായി ബന്ധപ്പെട്ടുള്ള ചർച്ചകളും നടക്കും.
നവകേരള സദസ് വന്‍ വിജയമാണെന്നാണ് പാര്‍ട്ടി നേതൃത്വത്തിന്‍റെ വിലയിരുത്തല്‍. പരാതികൾ പരിഹരിക്കാനുള്ള നടപടികൾ വേഗത്തിലാക്കാൻ സർക്കാരിന് സിപിഎം സെക്രട്ടറിയേറ്റ് നിർദ്ദേശം നൽകും. ഇതിനിടെ എസ്എഫ്ഐ ഗവര്‍ണര്‍ക്കെതിരെയുള്ള പ്രതിഷേധം സംസ്ഥാനത്ത് തുടരുകയാണ്. കഴിഞ്ഞ ദിവസം ഡല്‍ഹിയില്‍ നിന്ന് തിരുവനന്തപുരത്ത് മടങ്ങിയെത്തിയ ഗവര്‍ണറെ ജനറല്‍ ആശുപത്രിക്ക് സമീപം എസ്എഫ്ഐ കരിങ്കൊടി കാട്ടി. ഇതേതുടര്‍ന്ന് നാല് എസ്എഫ്ഐ പ്രവര്‍ത്തകരെ പൊലീസ് കസ്റ്റഡിയില്‍ എടുത്ത് വിട്ടയച്ചു.
Read More : 'പ്രതിഷേധമുണ്ടായാല്‍ വാഹനത്തിന് പുറത്തിറങ്ങുമെന്ന്' ഗവര്‍ണര്‍; വീണ്ടും കരിങ്കൊടി പ്രതിഷേധവുമായി എസ്എഫ്ഐ
