തിരുവനന്തപുരം: അർബുദ രോഗത്തിനെതിരെ അതിജീവനത്തിന്‍റെ സന്ദേശം സമൂഹത്തിനു നൽകിയ തിരുവനന്തപുരം ഭരതന്നൂർ സ്വദേശി നന്ദു മഹാദേവയുടെ മരണത്തിൽ അനുശോചനമറിയിച്ച് മുഖ്യമന്ത്രി പിണറായി വിജയൻ.
അസാമാന്യമായ ധീരതയോടെ തന്‍റെ രോഗാവസ്ഥയെ നേരിട്ട നന്ദു പ്രതിസന്ധികൾക്ക് മുൻപിൽ പതറാതെ, അവയെ നേരിടാനുള്ള ആത്മവിശ്വാസം ജനങ്ങളിലേക്ക് പകർന്നു. സ്‌നേഹത്തിലൂടെയും അനുകമ്പയിലൂടെയും മനുഷ്യരെ പ്രചോദിപ്പിച്ചു. നന്ദുവിന്‍റെ വിയോഗം നാടിന്‍റെ നഷ്‌ടമാണെന്നും കുടുംബത്തിന്‍റെയും സുഹൃത്തുക്കളുടേയും ദു:ഖത്തിൽ പങ്കു ചേരുന്നതായും മുഖ്യമന്ത്രി ഫേസ്ബുക്കിൽ കുറിച്ചു.
കോഴിക്കോട് എംവിആർ കാൻസർ സെൻ്ററിൽ ചികിൽസയിലിരിക്കെ പുലർച്ചെ 3.30നായിരുന്നു മരണം. അതിജീവനം കൂട്ടായ്‌മയുടെ മുഖ്യ സംഘാടകകൻ കൂടിയായിരുന്നു.
കൂടുതൽ വായനക്ക്: നന്ദു മഹാദേവ വിടവാങ്ങി, യാത്രയായത് കാന്‍സര്‍ അതിജീവന പോരാളി
