തിരുവനന്തപുരം: തിരുവല്ലം പൊലീസിൻ്റെ കസ്റ്റഡിയിലിരിക്കെ പ്രതി സുരേഷ് മരിച്ച സംഭവത്തിൽ ആരോപണവിധേയനായ എസ്‌.ഐയെ സസ്പെൻഡ് ചെയ്ത് കേസന്വേഷണം ക്രൈംബ്രാഞ്ചിന് കൈമാറണമെന്ന് യു.ഡി.എഫ് കൺവീനർ എം.എം ഹസൻ. ക്രമസമാധാനം ഉറപ്പാക്കാൻ കഴിയുന്നില്ലെങ്കിൽ മുഖ്യമന്ത്രി ആഭ്യന്തരവകുപ്പ് ഒഴിയണമെന്നും അദ്ദേഹം പറഞ്ഞു.
പൊലീസുകാരെ സിപിഎം സംരക്ഷിക്കുന്നു: ഹസൻ
നിയമലംഘനം നടത്തുന്ന പൊലീസുകാരെ സി.പി.എം സംരക്ഷിക്കുന്നുവെന്നും അദ്ദേഹം ആരോപിച്ചു. ക്രൂരമായ ലോക്കപ്പ് മർദനത്തിലാണ് സുരേഷ്‌കുമാറിന് മരിച്ചത്. തിരുവല്ലം പൊലീസ് സ്റ്റേഷന് നേരെ മുൻപും ആരോപണങ്ങൾ ഉണ്ടായിട്ടുണ്ട്. മർദനത്തെ തുടർന്ന് അവശനായ സുരേഷിനെ സ്വകാര്യ ആശുപത്രിയിൽ പ്രവേശിപ്പിച്ചതെന്തിനെന്ന ചോദ്യം പ്രസക്തമാണ്.
തുടർച്ചയായുണ്ടാകുന്ന അക്രമസംഭവങ്ങളിൽ പൊലീസ് കൈകെട്ടി നോക്കി നിൽക്കുന്നു. മണൽ മാഫിയ സംഘങ്ങൾക്കും ഗുണ്ടാസംഘങ്ങളും വേണ്ടിയാണ് പൊലീസ് പ്രവർത്തിക്കുന്നതെന്നും അദ്ദേഹം കുറ്റപ്പെടുത്തി. എം. വിൻസെന്‍റ് എം.എൽ.എയുടെ കാർ തകർത്ത സംഭവത്തിലും ശരിയായ അന്വേഷണം നടന്നില്ലെന്നും അദ്ദേഹം ആരോപിച്ചു. പൊലീസിനെ രാഷ്ട്രീയവത്കരിച്ച് നിഷ്ക്രിയമാക്കി. ലഹരി മാഫിയക്കെതിരെയും പൊലീസ് നടപടി സ്വീകരിക്കുന്നില്ല. സംസ്ഥാനത്ത് ക്രമസമാധാന തകർച്ചക്കെതിരെ മാർച്ച് നാലിന് യു.ഡി.എഫ് കലക്ടറേറ്റ് മാർച്ച് നടത്തുമെന്നും അദ്ദേഹം അറിയിച്ചു.
READ MORE:പൊലിസ് കസ്റ്റഡിയിലെടുത്ത പ്രതി മരിച്ചു
കേരളത്തിലെ ന്യൂനപക്ഷങ്ങളെല്ലാം ഇടതുപക്ഷത്തിനൊപ്പം നിൽക്കുകയാണെന്ന കോടിയേരിയുടെ പ്രസ്താവനക്കെതിരെയും അദ്ദേഹം പ്രതികരിച്ചു. കോടിയേരിക്ക് വേണ്ടത് ലീഗിനെ അല്ല. ചില ന്യൂനപക്ഷ മുസ്ലിം സംഘടനകളാണ് അവർക്കാവശ്യം. ചില മുസ്ലിം സംഘടനകളെ പിടിച്ചടക്കാൻ ആണ് കോടിയേരി ശ്രമിക്കുന്നത്. കോടിയേരിയും പിണറായിയും ന്യൂനപക്ഷ ഭൂരിപക്ഷ വർഗീയത തരാതരം കളിക്കുകയാണ്. അധികാരമാണ് ലക്ഷ്യമെന്നും അദ്ദേഹം പറഞ്ഞു.
കോൺഗ്രസ് പുനഃസംഘടനയിൽ പ്രതികരണം
അതേസമയം എം.പിമാരുടെ പരാതി പരിഗണിച്ച് പുനഃസംഘടന നിർത്തിവയ്ക്കാൻ ഹൈക്കമാൻഡ് നിർദേശം നൽകി എന്ന വാർത്ത പത്രവാർത്തയിലൂടെയാണ് അറിഞ്ഞതെന്ന് ഹസൻ വ്യക്തമാക്കി. പുനഃസംഘടനയുടെ പ്രക്രിയകൾ നടന്നുകൊണ്ടിരിക്കുകയായിരുന്നു. പുനഃസംഘടന എത്രയും വേഗം നടത്താനായിരുന്നു തീരുമാനം. ഇന്നത്തെ പത്രത്തിലൂടെയാണ് പുനഃസംഘടന നിർത്തിവയ്ക്കാൻ ഹൈക്കമാൻഡ് നിർദേശം നൽകിയെന്ന വാർത്ത അറിഞ്ഞതെന്നും അദ്ദേഹം പറഞ്ഞു.
വിഷയത്തിൽ വ്യക്തിപരമായല്ല, രാഷ്ട്രീയപരമായേ അഭിപ്രായം പറയാൻ സാധിക്കൂ. എന്തുകൊണ്ടാണ് ഹൈക്കമാൻഡ് ഇത്തരത്തിൽ തീരുമാനം എടുത്തത് എന്ന് മനസിലാക്കിയ ശേഷം മാത്രമേ ഉത്തരം പറയാൻ ഉള്ളൂവെന്നും അദ്ദേഹം കൂട്ടിച്ചേർത്തു.
READ MORE:തിരുവല്ലം കസ്റ്റഡിമരണം; പൊലീസുകാരെ സസ്പെൻഡ് ചെയ്യണമെന്ന് രമേശ് ചെന്നിത്തല
