തിരുവനന്തപുരം: സ്‌കൂള്‍ ബസുകളുടെ ഫിറ്റ്‌നസ് പരിശോധനയുമായി ബന്ധപ്പെട്ട് ഗതാഗതമന്ത്രിയുമായി വിദ്യാഭ്യാസ മന്ത്രി ചര്‍ച്ച നടത്തും. പി.ടി.എ ഫണ്ട് കുറവുള്ള സ്‌കൂളുകള്‍ക്ക് പൊതുജനങ്ങളുടെ സഹായം വേണമെന്ന് വി. ശിവന്‍കുട്ടി ആവശ്യപ്പെട്ടു.
സ്‌കൂള്‍ തുറക്കുന്നതിന് മുന്‍പ് ബസുകള്‍ മോട്ടോര്‍വാഹന വകുപ്പിന്‍റെ ഫിറ്റ്‌നസ് സര്‍ട്ടിഫിക്കറ്റ് നേടിയിരിക്കണം എന്നാണ് ഗതാഗത വകുപ്പ് അറിയിച്ചിരുന്നത്. എന്നാല്‍ ഒന്നര വര്‍ഷമായി ഓടാതെ കിടക്കുന്ന ബസുകള്‍ക്ക് അറ്റകുറ്റ പണികള്‍ തീര്‍ത്ത് ഫിറ്റ്‌നസ് നേടുന്നത് വലിയ സാമ്പത്തിക ബാധ്യതയുണ്ടാക്കും. ഇതിനായാണ് വിദ്യാഭ്യാസ മന്ത്രി പരിഹാര നിര്‍ദേശം മുന്നോട്ട് വച്ചത്.
സ്‌കൂള്‍ ബസ് അറ്റകുറ്റപ്പണി നടത്തി ഫിറ്റ്‌നസ് ഉറപ്പാക്കാന്‍ നാട്ടുകാര്‍ സഹായിക്കണം. നാട്ടുകാരുടെ സഹായത്താല്‍ എല്ലാവരും ഒന്നിച്ച് നിന്നാല്‍ ബസിന് വരുന്ന സാമ്പത്തിക ബാധ്യത പരിഹരിക്കാനാകുമെന്നും വിദ്യാഭ്യാസ മന്ത്രി പറഞ്ഞു. സ്‌കൂള്‍ ബസിന് മോട്ടോര്‍ വാഹന വകുപ്പിന്‍റെ ഫിറ്റ്‌നസ് സര്‍ട്ടിഫിക്കറ്റ് നിര്‍ബന്ധമാണ്. ഇത് സംബന്ധിച്ച് ചൊവ്വാഴ്ച ഗതാഗത മന്ത്രിയുമായി ചര്‍ച്ച നടത്തും.
നടപ്പിലാക്കുന്നത് 'സ്റ്റുഡന്‍റ്‌സ് ഓണ്‍ലി ബസ്'
സ്‌കൂള്‍ പി.ടി.എയ്ക്ക് ഫണ്ട് കുറവാണ്. എല്ലാ വിദ്യാഭ്യാസ ഡെപ്യൂട്ടി ഡയറക്ടര്‍മാരോടും സ്‌കൂള്‍ ബസ് സാഹചര്യം പരിശോധിക്കാന്‍ നിര്‍ദേശിച്ചിട്ടുണ്ട്. കെ.എസ്.ആര്‍.ടി.സി ബസുകള്‍ കുട്ടികള്‍ക്ക് മാത്രമായി പ്രത്യേകം ഓടിക്കാനും ആലോചന നടക്കുന്നുണ്ട്. സ്റ്റുഡന്‍റ്‌സ് ഓണ്‍ലി ബസ് എന്ന രീതിയില്‍ ഓടിക്കാനാണ് ആലോചന.
സ്വകാര്യ സ്‌കൂളുകള്‍ക്ക് വേണ്ടി ബോണ്ട് സര്‍വീസ് ആയും ബസ് വിട്ടു നല്‍കും. ഡ്രൈവറും, ബസും, ഇന്ധനവുമെല്ലാം കെ.എസ്.ആര്‍.ടി.സി വഹിക്കും. സാധാരണ ടിക്കറ്റ് തുകയില്‍ നിന്ന് കൂടുതല്‍ തുകയാകും ഈ രീതിയില്‍ ഓടുന്ന ബസുകളില്‍ ഈടാക്കുക. സ്‌കൂള്‍ ബസുകള്‍ക്ക് ഫിറ്റ്‌നസ് സര്‍ട്ടിഫിക്കറ്റിനും കുട്ടികളെ കയറ്റുന്നതിനും മോട്ടോര്‍ വാഹന വകുപ്പ് വിശദമായ മാര്‍ഗരേഖ പുറത്തിറക്കിയിരുന്നു.
സ്‌കൂളില്‍ എത്തുന്നതിന് മുന്‍പ് ബസില്‍ നിന്ന് തന്നെ വിദ്യാര്‍ഥികള്‍ കൊവിഡ് പ്രോട്ടോക്കോള്‍ പാലിക്കണം. ബസ് അറ്റകുറ്റപണികള്‍ പൂര്‍ത്തിയാക്കിയ ശേഷം മോട്ടോര്‍വാഹന വകുപ്പ് സ്‌കൂളില്‍ എത്തി പരിശോധിക്കും. ഫിറ്റ്‌നസ് പരാജയപ്പെട്ടാല്‍ റോഡില്‍ ഇറക്കാനാകില്ല. കുട്ടികള്‍ വീട്ടില്‍ നിന്ന് ഇറങ്ങുന്ന സമയത്ത് സാനിറ്റൈസര്‍ കൈയ്യില്‍ കരുതണം.
വാഹനങ്ങള്‍ക്ക് യാന്ത്രികക്ഷമത പരിശോധന
ബസ് ജീവനക്കാര്‍ എല്ലാ ദിവസവും സ്വന്തം താപനില ബുക്കില്‍ രേഖപ്പെടുത്തണം. ഒര് സീറ്റില്‍ ഒരാള്‍ക്ക് മാത്രമെ ഇരിക്കാവു. തുണി കൊണ്ടുള്ള കര്‍ട്ടണ്‍, സീറ്റ്കവര്‍, എ.സി എന്നിവ ബസില്‍ പാടില്ല. സ്‌കൂളിന്‍റെ ഉടമസ്ഥതയില്‍ അല്ലാത്ത കോണ്‍ട്രാക്‌ട് ഗ്യാരേജ് ബസുകളും ഈ മാനദണ്ഡം പാലിക്കണം.
ഒക്ടോബര്‍ 20-ന് മുന്‍പ് മോട്ടോര്‍ വാഹന വകുപ്പ് ഉദ്യോഗസ്ഥര്‍ സ്‌കൂളുകളില്‍ നേരിട്ടെത്തി വാഹനങ്ങളുടെ യാന്ത്രികക്ഷമത പരിശോധന പൂര്‍ത്തിയാക്കും. സ്‌കൂള്‍ ബസിലെ ഡ്രൈവര്‍മാരും ബസ് അറ്റന്‍ഡര്‍മാരും രണ്ട് ഡോസ് വാക്‌സിന്‍ എടുത്തിരിക്കണം. പനിയോ, ചുമയോ, മറ്റ് രോഗലക്ഷണങ്ങളൊ ഉള്ള വിദ്യാര്‍ഥികള്‍ക്ക് യാത്ര അനുവദിക്കരുത്. സ്‌കൂള്‍ വാഹനങ്ങളില്‍ തെര്‍മല്‍ സ്‌കാനറും സാനിറ്റൈസറും കരുതണം.
സുരക്ഷാ മാനദണ്ഡങ്ങള്‍ പാലിക്കുവാന്‍ സ്‌കൂള്‍ അധികൃതര്‍ കുട്ടികളെ പ്രേരിപ്പിക്കണമെന്നും ഓരോ ദിവസവും യാത്ര അവസാനിക്കുമ്പോള്‍ അണുനാശിനിയോ സോപ്പ് ലായനിയോ ഉപയോഗിച്ച് വാഹനങ്ങള്‍ കഴുകേണ്ടതാണെന്നും മാര്‍ഗനിര്‍ദേശത്തില്‍ പറയുന്നു.
ALSO READ: സുധീരന്‍റെ രാജിയില്‍ കലങ്ങി കോൺഗ്രസ്, അനുനയ നീക്കവുമായി നേതാക്കൾ
