തിരുവനന്തപുരം: സംസ്ഥാനത്ത് 39098 പട്ടികജാതി വിഭാഗം വിദ്യാർഥികൾക്ക് ഡിജിറ്റൽ പഠനോപകരണങ്ങൾ ഇല്ലെന്ന് പട്ടികജാതി-പട്ടികവർഗ വകുപ്പ് മന്ത്രി കെ രാധാകൃഷ്‌ണൻ. പ്രൊഫസർ ആബിദ് ഹുസൈൻ തങ്ങളുടെ ചോദ്യത്തിനാണ് നിയമസഭയിൽ മന്ത്രിയുടെ വിശദീകരണം.
ഹയർസെക്കൻഡറി ക്ലാസുകളിൽ വരെ ഡിജിറ്റൽ ഉപകരണങ്ങൾ സ്വന്തമായി ലഭ്യമാക്കാൻ സാഹചര്യമില്ലാത്ത 37717 പട്ടികവർഗ വിദ്യാർഥികളെ കണ്ടെത്തി. ഇവർക്ക് കൈറ്റ് മുഖേന ലാപ്‌ടോപ്പുകൾ നൽകാനുള്ള നടപടികൾ വിദ്യാഭ്യാസ വകുപ്പ് ആരംഭിച്ചിട്ടുണ്ടെന്നും മന്ത്രി അറിയിച്ചു. ഡിജിറ്റൽ പഠനോപകരണങ്ങളുടെ അഭാവവും കണക്‌ടിവിറ്റി പ്രശ്‌നവും കൊണ്ട് പഠനം മുടങ്ങുന്ന വിദ്യാർഥികളുടെ പ്രശ്‌നപരിഹാരത്തിന് പട്ടികവർഗ വികസന വകുപ്പ് നടപടികൾ സ്വീകരിച്ചിട്ടുണ്ട്.
ALSO READ: എൻഡോസൾഫാൻ പുനരധിവാസ പദ്ധതിയിലെ വീഴ്‌ച അംഗീകരിച്ച് മന്ത്രി ആർ. ബിന്ദു
കണക്‌ടിവിറ്റി ലഭ്യമാക്കാൻ സേവനദാതാക്കളുമായി ചർച്ച നടത്തി ഇതിനായി കോർപ്പസ് ഫണ്ട് ഉപയോഗിക്കാൻ ജില്ലാ കലക്‌ടർമാർക്ക് നിർദേശം നൽകിയിട്ടുണ്ട്. സ്‌കൂൾ തുറന്ന് പ്രവർത്തിക്കുന്ന സാഹചര്യത്തിൽ പ്രത്യേക ബോധനരീതി ആവിഷ്‌കരിക്കുന്ന കാര്യത്തിൽ വിദ്യാഭ്യാസ വകുപ്പുമായി സഹകരിച്ച് നടപടികൾ സ്വീകരിക്കുമെന്നും മന്ത്രി പറഞ്ഞു. ഇന്‍റർനെറ്റ് കണക്‌ടിവിറ്റി ഒട്ടുമില്ലാത്ത 164 കോളനികളും ഭാഗികമായി മാത്രം കണക്‌ടിവിറ്റി ലഭ്യമായ 273 കോളനികളും സംസ്ഥാനത്തുണ്ടെന്നും മന്ത്രി വ്യക്തമാക്കി.
