തിരുവനന്തപുരം : കൊവിഡ് ഉലയ്ക്കാത്ത മേഖലകളില്ല. സര്‍വ രംഗങ്ങളെയും സ്തംഭിപ്പിക്കുകയായിരുന്നു മഹാമാരി. പല മേഖലകള്‍ക്കും പലപ്പോഴായി ഇളവുകള്‍ ലഭിച്ചെങ്കിലും സ്റ്റേജ് അവതരണങ്ങളുടെ തിരശ്ശീല ഇനിയും ഉയര്‍ന്നിട്ടില്ല. ഇതോടെ സ്റ്റേജ് കലാകാരന്മാരുടെയും മജീഷ്യന്മാരുടെയും ജീവിതം വഴിമുട്ടിയിരിക്കുകയാണ്.
അവരുടെ ദയനീയാവസ്ഥ മാജിക്കിലൂടെ അവതരിപ്പിച്ച് അധികൃതരിലേക്ക് തങ്ങളുടെ ശബ്ദമെത്തിക്കുകയാണ് മജീഷ്യൻ സാമ്രാജ്. സെക്രട്ടറിയേറ്റിനുമുന്നിൽ പ്രത്യേകം തയാറാക്കിയ ദഹന പേടകത്തിനുള്ളിലെ ചിതയിൽ ഇരുന്നുകൊണ്ടാണ് സാമ്രാജ് പ്രകടനം നടത്തിയത്.
കൊവിഡ് മഹാമാരിയിൽ പ്രതിസന്ധിയിലായി രണ്ടുവര്‍ഷത്തിനിടെ മുപ്പതോളം സ്റ്റേജ് കലാകാരന്മാരാണ് ആത്മഹത്യ ചെയ്‌തത്. ഇവർക്ക് ആദരാഞ്ജലി അർപ്പിച്ചുകൊണ്ട് കേരളത്തിലെ വിവിധ ജില്ലകളിൽ നിന്നുള്ള മജീഷ്യര്‍ സെക്രട്ടറിയേറ്റിനുമുന്നിൽ സ്‌മൃതി ദീപം തെളിച്ചു. ഇതിൽ നിന്നും പകർന്ന തീ സാമ്രാജ് ഉപവസിക്കുന്ന മാന്ത്രിക ചിതയിൽ കൊളുത്തിയായിരുന്നു പ്രകടനം.
ALSO READ:ലോ ഫ്ലോർ ബസിൽ 'ടേക്ക് എ ബ്രേക്ക്' ; ബസിന്‍റെ മാതൃകയിൽ ഒരു വിശ്രമശാല
ബാറുകളും മറ്റ് സ്ഥാപനങ്ങളും തുറന്നിട്ടും കൊവിഡ് മാനദണ്ഡങ്ങൾ പാലിച്ച് 50 പേരെയെങ്കിലും പങ്കെടുപ്പിച്ച് കലാപരിപാടി നടത്താൻ സാധിക്കാത്തത് കലാകാരരെ ആത്മഹത്യയിലേക്ക് എത്തിച്ചെന്ന് മജിഷ്യൻ സാമ്രാജ് പറഞ്ഞു. സ്റ്റേജ് അവതരണക്കാര്‍ ജീവിക്കണോ മരിക്കണോ എന്ന ചോദ്യം സമൂഹത്തിനുമുന്നിൽ ഉന്നയിച്ചുകൊണ്ട് നടത്തിയ ഈ മാന്ത്രിക ആവിഷ്‌കാരം സമരമോ പ്രതിഷേധമോ അല്ലെന്നും സാമ്രാജ് വ്യക്തമാക്കി.
