തിരുവന്തപുരം: ലോക്ക്ഡൗൺ ഇളവുകൾക്ക് ശേഷം മദ്യ വിൽപന ആരംഭിച്ച മെയ് 24 മുതൽ ജൂൺ 24 വരെ സംസ്ഥാനത്ത് നടന്നത് 43 കോടി രൂപയുടെ മദ്യ വിൽപന. ലോക്ക്ഡൗൺ പ്രഖ്യാപനത്തിനു മുമ്പുളള മാസത്തെക്കാൾ രണ്ട് കോടി രൂപയുടെ അധിക കച്ചവടമാണ് സംസ്ഥാനത്ത് നടന്നത്. ലോക്ക്ഡൗൺ പ്രഖ്യാപനത്തിനു മുമ്പ് 41 കോടി രൂപയുടെ വിൽപന നടന്നു.ഇതിൽ ഭൂരിഭാഗം ഗുണവും ബിവറേജസ് കോർപറേഷനാണ് ലഭിച്ചത്. എന്നാൽ ഇളവുകൾക്ക് ശേഷമുളള മദ്യ വിൽപന കൂടുതൽ നടന്നിരിക്കുന്നത് ബാറുകളിലാണെന്നാണ് കണക്കുകൾ വ്യക്തമാക്കുന്നത്.
ബെവ് ക്യൂ ആപ്പ് വഴി ബുക്ക് ചെയ്യുമ്പോൾ ടോക്കണുകൾ ലഭിക്കുന്നത് ബാറുകളിലാണെന്ന് ആരോപണങ്ങൾ നേരത്തെ ഉയർന്നിരുന്നു. ഇതിനെ ശരിവയ്ക്കുന്നതാണ് കണക്കുകൾ. 43 കോടിയിൽ 33 കോടിയുടെ കച്ചവടം നടന്നത് ബാറുകളിലാണ്. ബിവറേജസ് കോർപറേഷന്‍റെയും കൺസ്യൂമർഫെഡ് ഔട്ട്ലെറ്റ് വഴിയും നടന്നത് 10 കോടിയുടെ കച്ചവടം മാത്രമാണ്.
ഈ കണക്കുകൾ വ്യക്തമാക്കുന്നത് ബിവറേജസ് കോർപറേഷന്‍റെ മദ്യവില്പന ലോക്ക്ഡൗണിനു ശേഷം കുറഞ്ഞു എന്നു തന്നെയാണ്. പ്രതിദിനം നാലു ലക്ഷം ടോക്കണുകളാണ് ബെവ് ക്യൂ ആപ്പ് വഴി വിതരണം ചെയ്യുന്നത് . ഇതിൽ ഭൂരിഭാഗവും ലഭിക്കുന്നതാകട്ടെ ബാറുകൾക്കും. ബിവറേജസിന്‍റെയും കൺസ്യൂമർഫെഡിന്‍റെയും ഷോപ്പുകൾ പലപ്പോഴും ആളൊഴിഞ്ഞ അവസ്ഥയിലാണ്. ടോക്കണുകൾ ഒന്നും ഇല്ലാതെ തന്നെ ബാറുകൾ മദ്യം വില്പന സംസ്ഥാനത്ത് സജീവമായി നടത്തുന്നുവെന്ന പരാതി ഉയരുന്നുണ്ട്.
നിയന്ത്രണങ്ങളുടെ ഭാഗമായി നാല് ദിവസത്തിലൊരിക്കലാണ് ആപ്പ് വഴി ഒരാൾക്ക് ടോക്കൺ ബുക്ക് ചെയ്യാൻ കഴിയുക. അതുകൊണ്ടുതന്നെ എത്തുന്നവരെല്ലാം അനുവദനീയമായ മൂന്ന് ലിറ്റർ മദ്യം വാങ്ങുന്നതും മദ്യ വിൽപന വർധിക്കാൻ കാരണമായതായും ബിവറേജസ് കോർപറേഷൻ വ്യക്തമാക്കുന്നു.
