തിരുവനന്തപുരം : കെഎസ്ആർടിസിയുടെ സിറ്റി സർക്കുലർ സർവീസിൽ പുതിയതായി 10 ഇലക്ട്രിക് ബസുകൾ കൂടിയെത്തി. നിലവില്‍ സര്‍വീസ് നടത്തുന്ന 25 ഇലക്ട്രിക് ബസുകള്‍ക്ക് പുറമെയാണിത്. ഇതോടെ കെഎസ്ആർടിസി-സ്വിഫ്റ്റ് വഴി സിറ്റി സർക്കുലറിൽ സർവീസ് നടത്തുന്ന ബസുകളുടെ എണ്ണം 35 ആയി.
ഉടൻ തന്നെ അഞ്ച് ഇലക്ട്രിക് ബസുകൾ കൂടി സിറ്റി സർക്കുലറിന്‍റെ ഭാഗമാകും. ബസുകള്‍ തിരുവനന്തപുരത്ത് എത്തിക്കഴിഞ്ഞു. ബാക്കിയുള്ള 10 ബസുകൾ അടുത്ത മാസം എത്തിച്ചേരുമെന്നാണ് പ്രതീക്ഷിക്കുന്നതെന്ന് മാനേജ്മെൻ്റ് അറിയിച്ചു.
50 ഇലക്ട്രിക് ബസുകൾ നിരത്തിൽ ഇറങ്ങുമ്പോൾ ശരാശരി 50 ലക്ഷം രൂപയ്ക്ക് മുകളിൽ ഡീസൽ ചിലവിൽ കെഎസ്ആർടിസിക്ക് ലാഭം ഉണ്ടാകുമെന്നാണ് മാനേജ്മെൻ്റിൻ്റെ കണക്കുകൂട്ടല്‍. നിലവിൽ ഡീസൽ ബസുകൾക്ക് സിറ്റി സർവീസിന് 37 രൂപയാണ് ഒരു കിലോമീറ്റർ സർവീസ് നടത്തുമ്പോൾ ചിലവ് വരുന്നത്.
ഇലക്ട്രിക് ബസുകളിൽ വൈദ്യുതി, ജീവനക്കാരുടെ ശമ്പളം എന്നിവ ഉൾപ്പടെ ഒരു കിലോമീറ്റർ സർവീസ് നടത്താൻ 23 രൂപ മാത്രമാണ് ചിലവ് വരുന്നത്. ഇതിന്‍റെ ശരാശരി വരുമാനം കിലോമീറ്ററിന് 35 രൂപയുമാണ്. തമ്പാനൂർ, കിഴക്കേകോട്ട, പാപ്പനംകോട്, വികാസ് ഭവൻ, പേരൂർക്കട, നെയ്യാറ്റിൻകര തുടങ്ങിയ സ്ഥലങ്ങളിൽ ഇലക്ട്രിക് ബസുകൾക്കായി ചാർജിങ് സ്‌റ്റേഷനുകളും നിലവിലുണ്ട്.
ഒരു ട്രിപ്പിന് 10 രൂപയുടെ ടിക്കറ്റും ഒരു ദിവസത്തേയ്ക്ക് മുഴുവൻ യാത്ര ചെയ്യുന്നതിന് 30 രൂപയുമാണ് ടിക്കറ്റ്. പുതിയതായി ആരംഭിച്ച കെഎസ്ആർടിസിയുടെ ട്രാവൽ കാർഡും ഇതിൽ ഉപയോഗിക്കുന്നുണ്ടെന്ന് മാനേജ്മെൻ്റ് വ്യക്തമാക്കി.
