കേരളത്തില്‍ നിയമസഭാ തെരഞ്ഞെടുപ്പ് വരുമ്പോൾ ഭരണ പ്രതിപക്ഷ വാക്‌പോര് പതിവാണ്. പക്ഷേ ഇത്തവണ ഭരണ പ്രതിപക്ഷ വാക്‌പോരിനൊപ്പം കേന്ദ്ര ഏജൻസികളും സർക്കാരും തമ്മിലുള്ള നേരിട്ടുള്ള ഏറ്റുമുട്ടലാണ് കേരളത്തില്‍ നടക്കുന്നത്. കഴിഞ്ഞ ദിവസം കിഫ്‌ബി ആസ്ഥാനത്ത് നടന്ന ആദായ നികുതി വകുപ്പിന്‍റെ പരിശോധനയ്ക്ക് എതിരെ മുഖ്യമന്ത്രി പിണറായി വിജയൻ അടക്കമുള്ളവർ രൂക്ഷവിമർശനമാണ് നടത്തിയത്. അതിന് പിന്നാലെ ധനമന്ത്രി തോമസ് ഐസക് കൂടി എത്തിയതോടെ ആദായ നികുതി വകുപ്പ് ഉദ്യോഗസ്ഥരെ പരസ്യമായി വിമർശിക്കുന്ന നിലപാടാണ് സിപിഎം നടത്തുന്നത്.
കിഫ്‌ബിയില്‍ നടത്തിയ റെയ്ഡ്, ഡല്‍ഹിയിലെ തമ്പുരാക്കൻമാർക്ക് വേണ്ടി നടത്തുന്ന നീക്കമാണെന്നാണ് തോമസ് ഐസക് പറഞ്ഞത്. കരാറുകാർക്ക് നല്‍കുന്ന പണത്തിന്‍റെ നികുതി സംബന്ധിച്ചാണ് അന്വേഷണം നടത്തിയത്. എന്നാല്‍ കിഫ്‌ബി ആക്‌ട്‌ പ്രകാരം കരാറുകാരുമായി കിഫ്ബിക്ക് യാതൊരു കരാറും ഇല്ലെന്നാണ് തോമസ് ഐസക് പറയുന്നത്. ആദായ നികുതി വകുപ്പ് നടത്തിയ റെയ്ഡ് തെമ്മാടിത്തരവും ഊളത്തരവുമാണ്. ഈസ്റ്റർ അവധിക്കുമുൻപ് കേരളത്തിലേക്ക് എൻഫോഴ്‌സ്‌മെന്‍റ് ഡയറക്‌ടറേറ്റിന്‍റെ വരവ് പ്രതീക്ഷിക്കുന്നുണ്ടെന്നും തോമസ് ഐസക് പറയുന്നുണ്ട്. അതിനിടെ, സംസ്ഥാനത്ത് വിവിധ കേസുകളിലായി അന്വേഷണം നടത്തുന്ന കേന്ദ്ര ഏജൻസികൾക്കെതിരെ ജുഡീഷ്യല്‍ അന്വേഷണം നടത്താൻ സംസ്ഥാന സർക്കാർ തീരുമാനിച്ചു. റിട്ട. ജഡ്‌ജി കെവി മോഹനനെ കമ്മിഷനാക്കാനും മന്ത്രിസഭ തീരുമാനിച്ചു. പെരുമാറ്റച്ചട്ടം നിലനില്‍ക്കുന്നതിനാല്‍ കമ്മിഷന്‍റെ നിയമനത്തിന് തെരഞ്ഞെടുപ്പ് കമ്മിഷന്‍റെ അംഗീകാരം ആവശ്യമാണ്. ഡോളർ, സ്വർണക്കടത്ത് അന്വേഷണം വഴിതിരിച്ചുവിടുന്നതും, സ്വപ്‌നയുടെ ശബ്‌ദരേഖ, മുഖ്യമന്ത്രിക്ക് എതിരെ മൊഴി നല്‍കാൻ സമ്മർദ്ദം തുടങ്ങിയ കാര്യങ്ങളാകും കമ്മിഷന്‍റെ അന്വേഷണ പരിധിയില്‍ വരിക.
അതോടൊപ്പം മുഖ്യമന്ത്രി പിണറായി വിജയനും കേന്ദ്ര ഏജൻസികൾക്കെതിരെ പരസ്യമായി രംഗത്ത് വന്നു. കിഫ്‌ബിയുടെ പേരില്‍ ഓലപ്പാമ്പ് കാട്ടി ഭയപ്പെടുത്താമെന്ന് കരുതേണ്ടെന്നും കിഫ്ബിയെ ഒരു ചുക്കും ചെയ്യാമെന്ന് കരുതേണ്ടെന്നും പിണറായി വിജയൻ പറഞ്ഞു. എന്നാല്‍, കേന്ദ്ര ഏജൻസികൾക്ക് എതിരെ ജുഡീഷ്യല്‍ അന്വേഷണത്തിന് തീരുമാനമെടുത്തത് നൂറ്റാണ്ടിലെ ഏറ്റവും വലിയ അത്‌ഭുതമാണെന്നാണ് കേന്ദ്രമന്ത്രി വി മുരളീധരന്‍റെ പ്രതികരണം. കേന്ദ്ര ഏജൻസികളെ ഓലപ്പാമ്പ് കാട്ടി വിരട്ടാമെന്ന് വിചാരിക്കേണ്ടെന്നും വി മുരളീധരൻ പറഞ്ഞു. ഇതോടെ കേന്ദ്ര ഏജൻസികളും സംസ്ഥാന സർക്കാരും തമ്മിലുള്ള ഏറ്റുമുട്ടല്‍ പരസ്യയുദ്ധത്തിലേക്ക് വഴിമാറി.
അതിനിടെ, കേരളത്തിലെ ഇരട്ടവോട്ട് വിഷയത്തില്‍ പ്രതിപക്ഷ നേതാവ് രമേശ് ചെന്നിത്തല നല്‍കിയ ഹർജി പരിഗണിക്കുന്നത് ഹൈക്കോടതി തിങ്കളാഴ്‌ചത്തേക്ക് മാറ്റി. കോടതി ഇക്കാര്യത്തില്‍ തെരഞ്ഞെടുപ്പ് കമ്മിഷനോട് വിശദീകരണം തേടിയിട്ടുണ്ട്. രാഷ്ട്രീയ നേട്ടം ലക്ഷ്യമിട്ട് സർക്കാർ ഉദ്യോഗസ്ഥരിലെ ഒരു വിഭാഗം സംഘടിതമായി നടത്തിയ നീക്കത്തിന്‍റെ ഫലമാണ് വ്യാജവോട്ട് എന്നാണ് ഹർജിയിലെ വാദം. ഇരട്ട വോട്ടുകൾ റദ്ദാക്കണമെന്നും ചെന്നിത്തല ഹർജിയില്‍ ആവശ്യപ്പെടുന്നു. സംസ്ഥാനത്തെ വിവിധ മണ്ഡലങ്ങളിലായി നാല് ലക്ഷത്തോളം ഇരട്ട വോട്ടുണ്ടെന്നാണ് ചെന്നിത്തലയുടെ ആരോപണം.
അതോടൊപ്പം പെരുമ്പാവൂരിലെ യുഡിഎഫ് സ്ഥാനാർഥിയും നിലവിലെ എംഎല്‍എയുമായ എല്‍ദോസ് കുന്നപ്പിള്ളിക്കും ഭാര്യയ്ക്കും രണ്ടിടത്ത് വോട്ടുണ്ടെന്ന രേഖകൾ പുറത്തുവന്നത് കോൺഗ്രസിനും യുഡിഎഫിനും തിരിച്ചടിയായി. മൂവാറ്റുപുഴ മാറാടി പഞ്ചായത്തിലും പെരുമ്പൂവൂർ രായമംഗലം പഞ്ചായത്തിലും ഇരുവർക്കും വോട്ടുണ്ടെന്ന രേഖകളാണ് പുറത്തുവന്നത്.
