തിരുവനന്തപുരം : സെക്രട്ടേറിയറ്റിൽ ബോംബ് ഭീഷണിയെന്ന് അജ്ഞാത സന്ദേശം (Kerala Secretariat bomb threat). ബോംബ് സ്‌ക്വാഡ് പരിശോധന തുടങ്ങി. കേരള പൊലീസിന്‍റെ 112 എന്ന നമ്പരിലേക്കാണ് അജ്ഞാത സന്ദേശം എത്തിയത്.
കന്‍റോൺമെന്‍റ് പൊലീസ് ഉൾപ്പെടെ സെക്രട്ടേറിയറ്റിന്‍റെ അകത്തും പുറത്തുമായി പൊലീസിന്‍റെ ബോംബ് സ്‌ക്വാഡും ഡോഗ് സ്‌ക്വാഡും പരിശോധന തുടരുന്നു (Bomb threat on Secretariat). ഒരാഴ്‌ച മുൻപായിരുന്നു 12 വയസുള്ള കുട്ടി മുഖ്യമന്ത്രിക്കെതിരെ വധ ഭീഷണി മുഴക്കിയിരുന്നത് (death threat against CM Pinarayi Vijayan). ഇപ്പോൾ ഉണ്ടായ ബോംബ് സന്ദേശത്തിന്‍റെ ഉറവിടം പൊലീസ് അന്വേഷിക്കുകയാണ്.
ദിവസങ്ങള്‍ക്ക് മുന്‍പാണ് മുഖ്യമന്ത്രി പിറണായി വിജയന് വധഭീഷണി ഉണ്ടായത്. വഴുതക്കാടുള്ള പൊലീസ് ആസ്ഥാനത്തെ കണ്‍ട്രോള്‍ റൂമില്‍ വിളിച്ച് ആണ് മുഖ്യമന്ത്രിയെ വധിക്കുമെന്ന് അറിയിച്ചത്. സംഭവത്തില്‍ മ്യൂസിയം പൊലീസ് കേസെടുത്ത് അന്വേഷണം നടത്തുന്നതിനിടെ ഭീഷണി ഫോണ്‍ കോള്‍ നടത്തിയ ആളെ തിരിച്ചറിഞ്ഞു.
എറണാകുളം സ്വദേശിയായ 12 കാരനായിരുന്നു ഭീഷണി മുഴക്കിയത്. പൊലീസ് കുട്ടിയുടെ വീട്ടിലെത്തി ഫോണ്‍ കോള്‍ ചെയ്‌തത് കുട്ടി തന്നെയാണെന്ന് ഉറപ്പു വരുത്തി. പ്രായപൂര്‍ത്തി ആകാത്തതിനാല്‍ വിദ്യാര്‍ഥിക്കെതിരെ നടപടി എടുക്കില്ലെന്നും കൗണ്‍സിലിങ് നല്‍കുമെന്നുമാണ് പിന്നാലെ പൊലീസ് അറിയിച്ചത്.
റിലയന്‍സ് ഇന്‍ഡസ്‌ട്രീസ് ചെയര്‍മാന്‍ മുകേഷ് അംബാനിയെ വധിക്കുെമന്ന് പറഞ്ഞുകൊണ്ടുള്ള ഇ മെയില്‍ സന്ദേശം വലിയ വാര്‍ത്തയായിരുന്നു. ഒന്നിലധികം തവണയാണ് മുകേഷ് അംബാനിക്കെതിരെ വധഭീഷണി ഉയരുന്നത്. കഴിഞ്ഞ മാസമാണ് സംഭവം. ഒക്‌ടോബര്‍ 30ന് അംബാനിയുടെ കമ്പനിയിലേക്കാണ് ഇ മെയില്‍ സന്ദേശം എത്തിയത്. നാല് ദിവസത്തിനിടെ ലഭിക്കുന്ന മൂന്നാമത്തെ ഭീഷണി സന്ദേശമായിരുന്നു ഇത്.
ഇ മെയിലില്‍ 20 കോടി രൂപ ആവശ്യപ്പെടുകയും പണം നല്‍കിയില്ലെങ്കില്‍ മുകേഷ് അംബാനിയെ വധിക്കുമെന്നും പറഞ്ഞിരുന്നു. അതേസമയം, നവംബര്‍ നാലിന് സന്ദേശം അയച്ചയാളെ പൊലീസ് അറസ്റ്റ് ചെയ്യുകയാണ് ഉണ്ടായത്. തെലങ്കാന സ്വദേശി ഗണേഷ് വന്‍പര്‍ധിയെന്ന 19കാരനാണ് അറസ്റ്റിലായത്.
ആദ്യം അയച്ച മെയിലില്‍ 20 കോടി രൂപ ആവശ്യപ്പെട്ട ഇയാള്‍ രണ്ടാമത്തെ സന്ദേശത്തില്‍ 200 കോടിയാണ് ആവശ്യപ്പെട്ടത്. മൂന്നാമത്തെ മെയിലില്‍ അത് 400 കോടി ആയി. നേരത്തെ അയച്ച സന്ദേശത്തിന് മറുപടി നല്‍കാത്തതിനാലാണ് തുക വര്‍ധിപ്പിച്ചതെന്നും ഇയാള്‍ സന്ദേശത്തില്‍ വ്യക്തമാക്കിയിരുന്നു. തുടര്‍ച്ചയായി സന്ദേശം ലഭിച്ചതോടെ പൊലീസ് കേസ് കേസെടുത്ത് അന്വേഷണം ആരംഭിക്കുകയായിരുന്നു.
