തിരുവനന്തപുരം: ഓൺലൈൻ കുറ്റകൃത്യങ്ങൾ നേരിട്ടാൽ പരാതികൾ വാട്‌ആപ്പിലൂടെ അറിയിക്കാനുള്ള സൗകര്യവുമായി കേരള പൊലീസ്. ലൈംഗിക ദൃശ്യങ്ങൾ ഓൺലൈനിൽ പ്രചരിപ്പിക്കുമെന്ന ഭീഷണികൾ ലഭിച്ചാലോ സാമ്പത്തിക കുറ്റകൃത്യങ്ങള്‍ നേരിട്ടാലോ 9497980900 എന്ന നമ്പറിലൂടെ പരാതി അറിയിക്കാം.
ടെക്‌സ്‌റ്റ്, ഫോട്ടോ, വീഡിയോ, ശബ്‌ദസന്ദേശം എന്നീ മാര്‍ഗങ്ങളിലൂടെ ഇതുവഴി പരാതി നല്‍കാം. എന്നാല്‍ നേരിട്ട് വിളിക്കാനാവില്ല. ഈ സംവിധാനം 24 മണിക്കൂറും പ്രവര്‍ത്തിക്കും. ആവശ്യമുള്ളപക്ഷം പരാതിക്കാരെ തിരികെവിളിച്ച് വിവരങ്ങള്‍ പൊലീസ് ശേഖരിക്കുന്നതാണ്. തിരുവനന്തപുരത്ത് പൊലീസ് ആസ്ഥാനത്താണ് ഈ സംവിധാനം പ്രവര്‍ത്തിക്കുന്നത്.
