ദേശീയ പാതയ്ക്ക് സമാന്തരമായി ഐടി ഇടനാഴികൾ; കണ്ണൂരിൽ ഐടി പാർക്ക്

നാല് വരിയായി വികസിപ്പിക്കുന്ന ദേശീയ പാതയ്ക്ക് സമാന്തരമായാണ് പുതിയ ഐടി ഇടനാഴികൾ.

തിരുവനന്തപുരം: ബജറ്റില്‍ ഐടി മേഖലയിൽ വമ്പൻ പ്രഖ്യാപനങ്ങൾ. നാല് ഐടി ഇടനാഴികൾ സംസ്ഥാനത്ത് സ്ഥാപിക്കുമെന്ന് ധനമന്ത്രി കെ ബാലഗോപാൽ. മഹാമാരി കാലത്തും മികവുപുലർത്തിയ വ്യവസായ മേഖല എന്ന നിലയിലാണ് ഐ ടിക്ക് ബജറ്റിൽ മുന്തിയ പരിഗണന നൽകുന്നത്.

നാല് വരിയായി വികസിപ്പിക്കുന്ന ദേശീയ പാതയ്ക്ക് സമാന്തരമായി പുതിയ ഐടി ഇടനാഴികൾ സ്ഥാപിക്കും. ടെക്നോപാര്‍ക്ക് - കൊല്ലം, എറണാകുളം - കൊരട്ടി, എറണാകുളം - ചേർത്തല, കോഴിക്കോട് - കണ്ണൂര്‍ എന്നിങ്ങനെയാണ് നാല് ഇടനാഴികൾ. ഇടനാഴികൾക്കായി സ്ഥലമേറ്റെടുത്താൽ ഉടൻ നിർമ്മാണം തുടങ്ങും. 1000 കോടി ചിലവഴിച്ച് 3 വർഷം കൊണ്ടാകും പൂർത്തിയാക്കുക.

കണ്ണൂരിൽ ഐടി പാർക്ക് സ്ഥാപിക്കും. ഇടനാഴികൾ സ്ഥാപിക്കുന്ന സ്ഥലങ്ങളിൽ 15 മുതൽ 25 ഏക്കർ വരെ ഭൂമി പൊന്നും വിലക്കെടുത്ത് ഐടി പാർക്ക് സ്ഥാപിക്കും. ഇതിനായി കിഫ്‌ബിയിൽ നിന്ന് 100 കോടി രൂപ അധികമായി അനുവദിച്ചു. ഈ മേഖലയിൽ പരമാവധി തൊഴിലവസരം എന്നതാണ് സർക്കാർ ലക്ഷ്യമെന്ന് ധനമന്ത്രി പറഞ്ഞു.

രാജ്യത്ത് ഈ വർഷം ആരംഭിക്കുന്ന 5ജി സർവീസ് കേരളത്തിലും മാറ്റങ്ങൾ സൃഷ്ടിക്കുമെന്ന് ധനമന്ത്രി പറഞ്ഞു. 5ജി സാങ്കേതിക വിദ്യയുടെ ഉപയോഗത്തിൽ കേരളം മുന്നിലെത്തും. ഇതിനായി 5ജി ലീഡർഷിപ്പ് പാക്കേജ് ഇടനാഴികൾ പ്രഖ്യാപിച്ചു.

കെ ഫോൺ പദ്ധതിക്ക് 125 കോടി രൂപ അനുവദിച്ചു. സംസ്ഥാനത്ത് 2000 വൈഫൈ ഹോട്ട് സ്പോട്ടുകൾ കൂടി സ്ഥാപിക്കും. ഇതിനായി 16 കോടി വകയിരുത്തി. ഐടിക്ക് 559 കോടി, ഐടി മിഷൻ രൂപീകരണത്തിന് 131.61 കോടി, വെർച്വൽ ഐടി കേഡർ രൂപീകരണത്തിന് 44 ലക്ഷം, ഡിജിറ്റൽ സർവകലാശാലയ്ക്ക് 26 കോടി. ടെക്നോപാർക്കിൻ്റെ സമഗ്രവികസനത്തിന് 26 കോടി, ഇൻഫോപാർക്കിന് 35 കോടി, സൈബർ പാർക്കിന് 12 കോടി എന്നിങ്ങനെ അനുവദിച്ചു.