തിരുവനന്തപുരം: തകർച്ചയുടെ വക്കിൽ നിന്നും ഉയർത്തെഴുന്നേൽപ്പിൻ്റെ പാതയിലാണ് സംസ്ഥാന സർക്കാർ സ്ഥാപനമായ കേരള ഓട്ടോ-മൊബൈൽസ് ലിമിറ്റഡ്. ഇലട്രിക് ഓട്ടോറിക്ഷകളുടെ നിർമ്മാണമാണ് കെ.എ.എൽ ഇപ്പോൾ ഏറ്റെടുത്തിരിക്കുന്നത്. കൊവിഡ് പ്രതിസന്ധിക്കിടയിലും കെ.എ.എല്ലിൻ്റെ തിരുവനന്തപുരം ആറാലംമൂട് പ്ലാൻ്റിൽ ഇ-ഓട്ടോ നിർമാണം സജീവമായി മുന്നോട്ട് പോവുകയാണ്.
2019ൽ ഇലട്രിക് ഓട്ടോറിക്ഷയായ 'നീം-ജി' പുറത്തിറക്കിയതോടെ കെ.എ.എല്ലിന് വലിയ സ്വീകാര്യതയാണ് ലഭിച്ചത്. ഇ-ഓട്ടോകൾക്കായി രാജ്യത്തിനകത്തും പുറത്തും നിരവധി അന്വേഷണങ്ങൾ ലഭിക്കുന്നുണ്ടെന്ന് കെ.എ.എൽ മാനേജിങ് ഡയറക്‌ടർ ഷാജഹാൻ .എ പറഞ്ഞു. ആവശ്യക്കാർക്കെല്ലാം ഓട്ടോറിക്ഷകൾ നിർമ്മിച്ച് നൽകാൻ കെ.എ.എൽ സജ്ജമാണെന്നും അദ്ദേഹംഅറിയിച്ചു.
പെട്രോൾ, ഡീസൽ വാഹനങ്ങളെ അപേക്ഷിച്ച് 'നീം-ജി'ക്ക് ചിലവ് കുറവാണെന്നതാണ് പ്രത്യേകത. മൂന്ന് മണിക്കൂർ ചാർജ് ചെയ്താൽ 90 കിലോമീറ്റർ വരെ ഓടും. സാധരണ ഓട്ടോറിക്ഷയുടെ പവറും മികച്ച യാത്രാസുഖവും 'നീംജി'യുടെ പ്രത്യേകതയാണ്. രാജ്യത്തിൻ്റെ വിവിധ ഭാഗങ്ങളിലൂടെ ഡീലർഷിപ്പുകൾ വഴിയാണ് വിൽപന. സർവീസും ഉറപ്പാക്കിയിട്ടുണ്ട്. നീം-ജി ഓട്ടോയുടെ എക്‌സ് ഷോറൂം വില 2,85,000 രൂപയാണ്.
