സ്നേഹത്തിന്‍റെയും ജീവിതത്തിന്‍റെയും ഭാഷയാണ് സിനിമ, 'സ്‌പിരിറ്റ് ഓഫ് സിനിമ' പുരസ്‌കാരം ഏറ്റുവാങ്ങി വനൂരി കഹിയു

Wanuri Kahiu receives Spirit of Cinema award: ദിവ്യതയിൽ നിന്നും എത്തുന്ന കഥകളെ പ്രകടിപ്പിക്കുന്നതാണ് ചലച്ചിത്ര പ്രവർത്തകരുടെ ജോലി അത് പ്രകടിപ്പിക്കുന്നതിലൂടെ ലോകം മുഴുവനുള്ള പ്രേക്ഷകരുമായി നമ്മൾ ബന്ധപ്പെടുന്നു, കെനിയൻ സംവിധായിക വനൂരി കഹിയു

തിരുവനന്തപുരം : വ്യത്യസ്‌ത ആശയങ്ങൾ സംവദിക്കാനുള്ള വേദിയായി സിനിമ മാറണമെന്നും ഐഎഫ്എഫ്കെ (International Film Festival of Kerala-IFFK) അത്തരമൊരു വേദിയാണെന്നും കെനിയൻ സംവിധായിക വനൂരി കഹിയൂ (Kenyan director Wanuri Kahiu). ഇരുപത്തിയെട്ടാമത് രാജ്യാന്തര ചലച്ചിത്ര മേളയുടെ ഭാഗമായി സംഘടിപ്പിച്ച ഓപ്പൺ ഫോറത്തിൽ സംസാരിക്കുകയായിരുന്നു വനൂരി കഹിയു. തദ്ദേശീയമായ സിനിമകൾ നിർമിക്കുകവഴി അവിടുത്തെ സംസ്‌കാരത്തെ പരിപോഷിപ്പിക്കാൻ കഴിയും.

കൊളോണിയൽ അധിനിവേശത്തിന്‍റെ കാലം മുതൽക്കേ കല എന്നത് പ്രതിരോധത്തിന്‍റെ മാർഗമാണ്. സാമൂഹിക വികസനത്തിന്‍റെ ഓരോ ഘട്ടത്തിലുമുള്ള മാറ്റങ്ങൾ സിനിമയിലും പ്രതിഫലിച്ചിട്ടുണ്ടെന്നും എല്ലാ ശബ്‌ദങ്ങളെയും ആശയങ്ങളെയും ഉൾകൊള്ളുന്ന ആഗോള മാനവികതയുടെ ഇരിപ്പിടമായി ചലച്ചിത്ര മേഖല മാറണമെന്നും വനൂരി കഹിയൂ പറഞ്ഞു. ചലച്ചിത്രമേളയുടെ ഉദ്‌ഘാടന ചടങ്ങിൽ വനൂരിയെ 'സ്‌പിരിറ്റ് ഓഫ് സിനിമ' പുരസ്‌കാരം നൽകി ആദരിച്ചിരുന്നു (Spirit of Cinema award at IFFK).

ലോകത്ത് ഒരു സിനിമയും നിരോധിക്കാനോ സെൻസർ ചെയ്യാനോ കഴിയില്ലെന്നും വനൂരി ഉദ്‌ഘാടന വേദിയിൽ പുരസ്‌കാരം ഏറ്റുവാങ്ങിയ ശേഷം പറഞ്ഞിരുന്നു. സ്നേഹത്തിന്‍റെയും ജീവിതത്തിന്‍റെയും ഭാഷയാണ് സിനിമ. കഥകൾ നമുക്കു മുൻപേ ഉണ്ടായതാണ്. ദിവ്യതയിൽ നിന്നും എത്തുന്ന കഥകളെ പ്രകടിപ്പിക്കുന്നതാണ് ചലച്ചിത്ര പ്രവർത്തകരുടെ ജോലി. അത് പ്രകടിപ്പിക്കുന്നതിലൂടെ ലോകം മുഴുവനുള്ള പ്രേക്ഷകരുമായി നമ്മൾ ബന്ധപ്പെടുന്നു.

കഥ സിനിമക്ക് മുൻപേ ഉത്ഭവിക്കുന്നു. മനുഷ്യന്‍റെ അനുഭവജ്ഞാനത്തിന്‍റെയും നിലനിൽപ്പിന്‍റെയും കഥകളാണ് ഈ കഥകൾ. തന്‍റെ ചിത്രമായ റഫീഖി ഇപ്പോൾ നാടുകടത്തപ്പെട്ടിരിക്കുന്നു. ഒരുനാൾ അത് കെനിയയിലേക്ക് തന്നെ മടങ്ങിയെത്തുമെന്നും വനൂരി പറഞ്ഞിരുന്നു. വിലക്കുകളോടും എതിർപ്പുകളോടും പടവെട്ടി മുന്നേറുന്ന സാമൂഹിക പ്രതിബദ്ധതയുള്ള കലാകാരിയാണെന്ന് വനൂരിയെന്ന് ഐഎഫ്എഫ്‌കെയുടെ ഉദ്‌ഘാടനം നിർവഹിച്ച മുഖ്യമന്ത്രി പിണറായി വിജയനും പറഞ്ഞിരുന്നു.

അവരുടെ 'റഫീഖി' (Rafiki) എന്ന ചലച്ചിത്രം കെനിയയിൽ ആവിഷ്‌കാര സ്വാതന്ത്ര്യത്തിന് വേണ്ടിയുള്ള നിയമ വ്യവഹാരങ്ങൾക്ക് വരെ കാരണമായി. ഇത്തരം കലാപ്രവർത്തകരെ ആദരിക്കുക വഴി ഈ ചലച്ചിത്രോത്സവവും നമ്മുടെ നാടും ആർക്കൊക്കെ ഒപ്പമാണ് നിലകൊള്ളുന്നത് എന്നത് ഒരിക്കൽ കൂടി വ്യക്തമാക്കുകയാണെന്നും മുഖ്യമന്ത്രി പറഞ്ഞിരുന്നു.

കഴിഞ്ഞ മേളയിൽ ഇറാന്‍ ഭരണകൂടത്തിന്‍റെ നിരന്തരമായ പീഡനത്തിന് വിധേയയാവുന്ന ചലച്ചിത്രകാരി മഹ്നാസ് മുഹമ്മദിയും ഈ പുരസ്‌കാരത്തിന് അർഹയായി. ആദ്യ കെനിയന്‍ ചിത്രവും കാന്‍ ചലച്ചിത്ര മേളയില്‍ തെരഞ്ഞെടുക്കപ്പെട്ടതുമായ റഫീക്കിയാണ് വനൂരി കഹിയുവിനെ അന്താരാഷ്ട്ര തലത്തില്‍ ശ്രദ്ധേയയാക്കിയത്. ആഫ്രിക്കയെ സംബന്ധിച്ച പൊതുധാരണകള്‍ തിരുത്തിക്കുറിക്കുന്നതിനും ഒരു പുതിയ വീക്ഷണം രൂപപ്പെടുത്തുന്നതിനുമായുള്ള 'ആഫ്രോബബിള്‍ഗം' എന്ന കൂട്ടായ്‌മയുടെ സ്ഥാപകയുമാണ് ഇവർ.