തിരുവനന്തപുരം: കെ-റെയിൽ(K Rail) സംസ്ഥാനത്തിൻ്റെ ഭാവിക്കു വേണ്ടിയുള്ള പ്രധാന പദ്ധതിയെന്ന് കണ്ട് പിന്തുണ നൽകണമെന്ന് എംപിമാരുടെ യോഗത്തിൽ മുഖ്യമന്ത്രി പിണറായി വിജയൻ (Pinarayi Vijayan). പാർലമെൻ്റിൻ്റെ ശീതകാല സമ്മേളനത്തിനു മുന്നോടിയായാണ് എംപിമാരുടെ യോഗം ചേർന്നത്. സംസ്ഥാനത്തിന് ഒഴിച്ചുകൂടാനാവാത്ത പദ്ധതിയാണിതെന്നും കെ-റെയിൽ പദ്ധതിയുമായി ബന്ധപ്പെട്ട് ചിലർക്കുണ്ടായ സംശയങ്ങൾ ദൂരീകരിക്കുമെന്നും മുഖ്യമന്ത്രി യോഗത്തിൽ പറഞ്ഞു.
പ്രദേശങ്ങളെ അടിസ്ഥാനമാക്കി കൂടുതൽ മുന്നറിയിപ്പ് നൽകാനുള്ള സാങ്കേതിക സംവിധാനത്തോടെ കാലാവസ്ഥ പ്രവചനം സാധ്യമാക്കണം. വയനാട്-കോഴിക്കോട് അതിർത്തിയിൽ ഡോപ്ലർ റഡാർ (Doplar Radar) സ്ഥാപിക്കണമെന്ന ദീർഘകാല ആവശ്യം കേന്ദ്രം പരിഗണിക്കണം. നാടിന്‍റെ വികസനക്ഷേമ പ്രവര്‍ത്തനങ്ങള്‍ നല്ല രീതിയില്‍ മുന്നോട്ടു കൊണ്ടുപോകാന്‍ പറ്റുന്ന തരത്തില്‍ എംപിമാര്‍ ഇടപെടണമെന്നും യോഗത്തിൽ മുഖ്യമന്ത്രി പറഞ്ഞു
ഭക്ഷ്യധാന്യ പ്രശ്‌നം, തീരസംരക്ഷണം, പ്രവാസി പുനരധിവാസ പ്രശ്‌നം എന്നിവയെല്ലാം കേന്ദ്രത്തിന് നേരിട്ട് ഉത്തരവാദിത്തമുള്ള വിഷയങ്ങളാണ്. ഇവയിലൊന്നും സംസ്ഥാന താൽപര്യങ്ങൾ വേണ്ടത്ര പരിഗണിക്കുന്നില്ല. പ്രകൃതി ദുരന്തം മൂലം തകർന്ന റോഡുകൾക്ക് അനുവദിക്കുന്ന ധനസഹായം അപര്യാപ്‌തമാണെന്നും ഇതുമായി ബന്ധപ്പെട്ട് നിലവിലുള്ള മാർഗനിർദേശങ്ങൾ പുതുക്കണമെന്നും മുഖ്യമന്ത്രി ആവശ്യപ്പെട്ടു.
വികസനപ്രവര്‍ത്തനങ്ങളില്‍ പ്രത്യേകിച്ച് അടിസ്ഥാന സൗകര്യമേഖലയില്‍ കേന്ദ്രവും സംസ്ഥാനവും തമ്മിലുള്ള സഹകരണം (Centre-State Co-operation) വ്യാപിപ്പിക്കാൻ എംപിമാർ ശ്രമിക്കണമെന്നും മുഖ്യമന്ത്രി ആവശ്യപ്പെട്ടു.
Also Read:നിർമാണത്തിലിരുന്ന വീട് തകർന്ന് വീണു, 9 തൊഴിലാളികളെ രക്ഷപ്പെടുത്തി
