തിരുവനന്തപുരം: ഭൂപരിഷ്‌കരണ നിയമത്തിന്റെ 50-ാം വാര്‍ഷികാഘോഷ ചടങ്ങില്‍ സി.അച്യുതമേനോനെ പരാമര്‍ശിക്കാതെ പ്രസംഗിച്ച മുഖ്യമന്ത്രി പിണറായി വിജയനെ വിമര്‍ശിച്ച് സിപിഐ മുഖപത്രമായ ജനയുഗം. മുഖ്യമന്ത്രി നടത്തിയത് ചരിത്ര വസ്തുതകളുടെ മനപൂര്‍വ്വമായ തമസ്‌കരണമാണ്. അതല്ലാതെ പേര് പരാമര്‍ശിക്കാന്‍ വിസ്‌മരിച്ചതാണെന്ന് ആരും കരുതില്ല. ഇതിലൂടെ ചരിത്രത്തോടുള്ള ഇടതുപക്ഷത്തിന്‍റെ സമീപനത്തെയാണ് മുഖ്യമന്ത്രി ചോദ്യം ചെയ്യുന്നത് എന്ന് മുഖപ്രസംഗം പറയുന്നു .
ചരിത്രം ഐതിഹ്യങ്ങളോ കെട്ടുകഥകളോ അല്ല. അവ വസ്‌തുനിഷ്‌ഠമായ തെളിവുകളുടെ അടിസ്ഥാനത്തിൽ രേഖപ്പെടുത്തുന്നതാണ്. പരിശീലനം സിദ്ധിച്ച ചരിത്രകാരന്മാരെ ആട്ടിയകറ്റി തങ്ങളുടെ ഭാവനകള്‍ക്കനുസൃതമായി ചരിത്രത്തെ ദുര്‍വ്യാഖ്യാനം ചെയ്യാനും വളച്ചൊടിക്കാനും ആസൂത്രിത ശ്രമം മോദി ഭരണത്തില്‍ നടക്കുന്നു. ഇതിനെതിരായ പ്രക്ഷോഭങ്ങളുടെ മുന്‍ നിരയിലാണ് ഇടതുപക്ഷ പ്രസ്ഥാനങ്ങള്‍. അത്തരമൊരു ദേശവ്യാപക ചെറുത്തു നില്പ്പിന്റെ വിശ്വാസ്യതയാണ് മുഖ്യമന്ത്രിയുടെ തമസ്‌കരണത്തിലൂടെ ഇടതുപക്ഷം സ്വയം ചോദ്യം ചെയ്യുന്നത്.
1957ലെ ഒന്നാം കമ്മ്യൂണിസ്റ്റ് സര്‍ക്കാര്‍ തുടങ്ങിവെച്ച ഭൂപരിഷ്‌കരണ നിയമനിര്‍മ്മാണത്തെ നിയമത്തിന്റെ നൂലാമാലകളില്‍ പെടാതെ ഭരണഘടനയുടെ 9-ാം ഷെഡ്യൂളില്‍ ഉൾപെടുത്തി സംരക്ഷിക്കാനായത് അന്ന് മുഖ്യമന്ത്രിയായിരുന്ന സി.അച്യുതമേനോനിന്‍റെ മികവാണ്. കേരളത്തിലെ 75 ലക്ഷം കുടുംബങ്ങളെ ഭൂമിയുടെ ഉടമകളാക്കിയ ചരിത്ര നിയമനിര്‍മ്മാണമാണ് അച്യുതമേനോന്‍ സര്ക്കാരിന്റെ ഭൂപരിഷ്‌കരണമെന്നും ജനയുഗം മുഖപ്രസംഗത്തില്‍ വ്യക്തമാക്കുന്നു.
