യാക്കോബായ സുറിയാനി സഭക്കെതിരെയുള്ള ബിജെപി സംസ്ഥാന അധ്യക്ഷൻ ശ്രീധരൻപിള്ളയുടെ പരാമർശം അപലപനീയമെന്ന് യാക്കോബായ സഭ. യാക്കോബായ സഭ ബിജെപിയുടെ ആനുകൂല്യങ്ങൾ പറ്റി നന്ദികേട് കാണിച്ചുവെന്നും ഓർത്തഡോക്സ് സഭക്ക് ബിജെപിയുടെ പരിപൂർണ പിന്തുണ ഉണ്ടാകുമെന്നുമുളള ശ്രീധരന്‍ പിള്ളയുടെ പ്രസ്താവനക്കെതിരെയാണ് യാക്കോബായ സഭ രംഗത്തെത്തിയത്. ശ്രീധരൻ പിള്ളയുടെ പ്രസ്താവനകൾ തികച്ചും ലജ്ജാകരമാണെന്ന് യാക്കോബായ സുറിയാനി സഭയുടെ മീഡിയ സെൽ ചെയർമാൻ കുര്യാക്കോസ് മോർ തെയോഫിലോസ് മെത്രാപ്പോലീത്ത പത്രക്കുറിപ്പിൽ അറിയിച്ചു.
ഒരു നൂറ്റാണ്ടായി നിലനിൽക്കുന്ന സഭാതർക്കം കോടതി വിധികളിലൂടെ മാത്രം പരിഹരിക്കുവാൻ കഴിയില്ലെന്ന യാഥാർത്ഥ്യം ഉൾക്കൊണ്ടുകൊണ്ട് മധ്യസ്ഥ ചർച്ചയിലൂടെ പ്രശ്നങ്ങൾ പരിഹരിക്കുവാൻ സുപ്രീം കോടതി തന്നെ ഉത്തരവിട്ടിരിക്കുന്ന സാഹചര്യത്തിൽ പക്ഷം ചേർന്നുള്ള ശ്രീധരൻപിള്ളയുടെ അപക്വമായ പ്രസ്താവന രാഷ്ട്രീയ മുതലെടുപ്പ് ലക്ഷ്യം വച്ചുകൊണ്ടാണ്. വിശ്വാസപരമായ കാര്യങ്ങളെക്കുറിച്ചുള്ള ജസ്റ്റിസ് ഇന്ദു മൽഹോത്രയുടെ വിധിയും, അയോധ്യാ കേസ് പോലും മധ്യസ്ഥതയിലൂടെ തീർക്കണമെന്ന സുപ്രീം കോടതിയുടെ ഉത്തരവ് നിലനിൽക്കുമ്പോൾ ജനങ്ങളുടെ ഇടയിൽ ആശയക്കുഴപ്പമുണ്ടാക്കി രാഷ്ട്രീയ നേട്ടമുണ്ടാക്കാനുള്ള ഹീനമായ ശ്രമമാണ് ബിജെപി സംസ്ഥാന അധ്യക്ഷൻ നടത്തുന്നതെന്നും യാക്കോബായ സുറിയാനി സഭ ആരോപിച്ചു.
പത്രക്കുറിപ്പ്
