തിരുവനന്തപുരം: കാര്യവട്ടം ഗ്രീന്‍ഫീല്‍ഡ് സ്പോര്‍ട്‌സ് ഹബ്ബില്‍ ദക്ഷിണാഫ്രിക്കക്കെതിരെ നടക്കുന്ന ടി20 മത്സരത്തിനായി ഇന്ത്യൻ ടീം ഇന്ന്(26.09.2022) വൈകിട്ട് 4.30 തിരുവനന്തപുരത്തെത്തും. ഹൈദരാബാദിൽ ഓസ്‌ട്രേലിയയെ തകർത്ത് പരമ്പര സ്വന്തമാക്കിയാണ് ഇന്ത്യ തലസ്ഥാനത്തെത്തുന്നത്. ഞായറാഴ്‌ച തിരുവനന്തപുരത്തെത്തിയ ദക്ഷിണാഫ്രിക്കൻ ടീം ഇന്ന് വൈകിട്ട് അഞ്ചിന് ഗ്രീന്‍ഫീല്‍ഡ് സ്പോര്‍ട്‌സ് ഹബ്ബ് സ്റ്റേഡിയത്തില്‍ പരിശീലനം നടത്തും.
വൈകിട്ട് 4.30ന് ദക്ഷിണാഫ്രിക്കന്‍ ടീം മാധ്യമങ്ങളെ കാണുന്നുണ്ട്. ചൊവ്വാഴ്‌ച ഉച്ചയ്‌ക്ക്‌ ഒന്ന് മുതല്‍ നാലുവരെയും ദക്ഷിണാഫ്രിക്കന്‍ ടീം പരിശീലനത്തിനെത്തും. തുടര്‍ന്ന് വൈകിട്ട് അഞ്ചു മുതല്‍ എട്ടുവരെ ടീം ഇന്ത്യയും ഗ്രീന്‍ഫീല്‍ഡില്‍ പരിശീലനം നടത്തും. മത്സരത്തിന് മുന്നോടിയായുള്ള പ്രീ മാച്ച് പ്രസ് മീറ്റ് 27ന് നടക്കും.
27ന് ഉച്ചക്ക് 12.30ന് ദക്ഷിണാഫ്രിക്കന്‍ ക്യാപ്റ്റനും വൈകിട്ട് 4.30ന് ഇന്ത്യന്‍ ക്യാപ്റ്റനും മാധ്യമങ്ങളെ കാണും. മത്സരത്തിന്‍റെ 73 ശതമാനം ടിക്കറ്റുകളും വിറ്റുകഴിഞ്ഞു. ഇതിനോടകം 23,000 ടിക്കറ്റുകളാണ് വിറ്റത്. സ്റ്റേഡിയത്തില്‍ പ്രവേശിക്കുന്നതിന് ടിക്കറ്റിനൊപ്പം ഫോട്ടോ ഐഡി കൂടി കാണിക്കണം.
ഒരു ഇ-മെയില്‍ ഐഡിയില്‍ നിന്നും ഒരാള്‍ക്ക് 3 ടിക്കറ്റുകള്‍ എടുക്കാവുന്നതാണ്. ഇങ്ങനെ എടുക്കുന്ന മൂന്ന് ടിക്കറ്റിലും ടിക്കറ്റ് എടുത്ത ആളുടെ പേര് രേഖപ്പെടുത്തിയിരിക്കും. ഈ ടിക്കറ്റിനൊപ്പം സ്വന്തം ഫോട്ടോ ഐഡി കാണിച്ച് മറ്റുള്ളവര്‍ക്കും സ്റ്റേഡിയത്തില്‍ പ്രവേശിക്കാവുന്നതാണ്.
ശുദ്ധജല കണക്ഷൻ വിഛേദിക്കുമെന്ന് ജല അതോറിറ്റി: കാര്യവട്ടം ഗ്രീന്‍ഫീല്‍ഡ് സ്പോര്‍ട്‌സ് ഹബ്ബിലെ ശുദ്ധജല കണക്ഷൻ വിഛേദിക്കുമെന്ന് ജല അതോറിറ്റി. കുടിശിക തുകയായ 64.86 ലക്ഷം രൂപ ഇന്ന് ഉച്ചയ്‌ക്ക്‌ മൂന്നിന് മുൻപ് അടച്ചില്ലെങ്കിൽ കണക്ഷൻ വിഛേദിക്കുമെന്ന് കാണിച്ച് കഴിഞ്ഞ ദിവസമാണ് അധികൃതർക്ക് ജല അതോറിറ്റി കത്തയച്ചത്.
സ്റ്റേഡിയം പരിപാലിക്കുന്ന കെഎസ്‌എഫ്‌എൽ കമ്പനിയാണ് തുക അടയ്‌ക്കേണ്ടത്. കെഎസ്എഫ്എല്ലിന്‍റെ മാതൃ കമ്പനിയായ ഐഎൽ ആൻഡ് എഫ്എസ് സാമ്പത്തിക പ്രതിസന്ധിയിലായതോടെ സ്പോർട്‌സ് ഹബ് സ്റ്റേഡിയവുമായി ബന്ധപ്പെട്ട് വിവിധ ഇനങ്ങളിലായി വൻ തുക വർഷങ്ങളായി കുടിശികയാണ്.
