തിരുവനന്തപുരം: തുമ്പ കിന്‍ഫ്ര പാര്‍ക്കില്‍ വന്‍ തീപിടിത്തം. മെഡിക്കല്‍ കോര്‍പറേഷന്‍ സര്‍വീസസ് സംഭരണ കേന്ദ്രത്തിലാണ് തീപിടിത്തമുണ്ടായത്. തീ അണയ്‌ക്കാന്‍ ശ്രമിക്കുന്നതിനിടെ കെട്ടിടം തകര്‍ന്ന് വീണ് പരിക്കേറ്റ ഫയര്‍ ഫോഴ്‌സ് ഉദ്യോഗസ്ഥന്‍ മരിച്ചു.
ചാക്ക യൂണിറ്റിലെ ഫയർമാൻ ജെ.എസ് രഞ്ജിത്താണ് (32) മരിച്ചത്. ഇന്ന് പുലര്‍ച്ചെ ഒന്നരയോടെയാണ് സംഭവം. രാസ പദാര്‍ഥങ്ങള്‍ സൂക്ഷിച്ചിരുന്ന കെട്ടിടത്തിലാണ് തീ പടര്‍ന്നത്. ഗോഡൗണിൽ സൂക്ഷിച്ചിരുന്ന ബ്ലീച്ചിങ് പൗഡറിനാണ് തീപിടിച്ചതെന്നാണ് പ്രാഥമിക നിഗമനം. ഏകദേശം 1.22 കോടിയുടെ നഷ്‌ടം സംഭവിച്ചിട്ടുണ്ടെന്ന് കെഎംഎസ്‌സിഎൽ അറിയിച്ചു.
മരുന്നുകൾ സൂക്ഷിച്ചിരുന്ന കെട്ടിടത്തിലേക്ക് തീ പടരാത്തത് വലിയ അപകടം ഒഴിവായി. തീ പടരുന്ന സമയത്ത് സെക്യൂരിറ്റി ജീവനക്കാരൻ മാത്രമാണ് സ്ഥലത്തുണ്ടായിരുന്നത്.
ജില്ലയിലെ മുഴുവൻ ഫയർ ഫോഴ്‌സ് യൂണിറ്റുകളും സ്ഥലത്ത് എത്തി തീ അണയ്ക്കാനുള്ള ശ്രമം തുടരുകയാണ്. തീപിടിത്തത്തിനിടെ മരിച്ച ഫയർമാൻ രഞ്ജിത്തിന്‍റെ മൃതദേഹം തിരുവനന്തപുരം കിംസ് ആശുപത്രിയിലേക്ക് മാറ്റി.
കൊല്ലത്തും എറണാകുളത്തും തൃശൂരിലും സമാന സംഭവം അടുത്തിടെ: വേനല്‍ കടുത്തതോടെ സംസ്ഥാനത്തിന്‍റെ വിവിധയിടങ്ങളില്‍ നിന്ന് അധികം കേള്‍ക്കുന്ന വാര്‍ത്തയാണ് തീപിടിത്തം എന്നത്. കൊല്ലത്തും എറണാകുളത്തും ഏതാനും ദിവസങ്ങള്‍ക്ക് മുമ്പാണ് ഇത്തരത്തില്‍ തീപിടിത്തമുണ്ടായത്. ഇക്കഴിഞ്ഞ 17ന് രാത്രി 8.30 ഓടെയാണ് കൊല്ലത്തെ മരുന്ന് സംഭരണ ശാലയില്‍ വന്‍ തീപിടിത്തമുണ്ടായത്.
ആശ്രമം ഉളിയക്കോവിലെ മെഡിക്കല്‍ സര്‍വീസ് കോര്‍പറേഷന്‍റെ മരുന്ന് സംഭരണ ശാലയിലാണ് തീപിടിത്തമുണ്ടായത്. ആളപായമില്ലെങ്കിലും നാശനഷ്‌ടങ്ങള്‍ സംഭവിച്ചിട്ടുണ്ട്. ഏകദേശം എട്ട് മണിക്കൂര്‍ നടത്തിയ പരിശ്രമങ്ങള്‍ക്കൊടുവിലാണ് തീ അണക്കാന്‍ സാധിച്ചത്. വിവിധയിടങ്ങളില്‍ നിന്നെത്തിയ പത്ത് ഫയര്‍ ഫോഴ്‌സ് യൂണിറ്റാണ് തീയണച്ചത്.
also read: 'തീപിടിത്ത നാടകം അഴിമതിക്കഥകൾ പുറത്താവാതിരിക്കാൻ, സമഗ്രമായ അന്വേഷണം വേണം': വിഡി സതീശൻ
മരുന്നുകള്‍ക്ക് തീപിടിച്ചതോടെ പുക ശ്വസിച്ച സമീപവാസികള്‍ക്ക് ആരോഗ്യ പ്രശ്‌നങ്ങള്‍ അനുഭവപ്പെട്ടു. കൊല്ലത്ത് തീപിടിത്തമുണ്ടായ അതേ ദിവസമാണ് കൊച്ചി കാക്കനാട് ജിയോ ഇന്‍ഫോ പാര്‍ക്കിലും തീപിടിത്തമുണ്ടായത്. ജിയോ ഇന്‍ഫോയെന്ന ഐടി സ്ഥാപനത്തിലാണ് തീപിടിച്ചത്. വൈകിട്ട് ആറ് മണിയോടെയാണ് കെട്ടിടത്തില്‍ നിന്ന് തീ പടര്‍ന്നത്. തീപിടിത്തത്തില്‍ നാല് പേര്‍ക്ക് പൊള്ളലേറ്റു. പരിക്കേറ്റവരെ ആശുപത്രിയിലേക്ക് മാറ്റി.
വര്‍ഷങ്ങള്‍ പഴക്കമുള്ള കെട്ടിടത്തിലായിരുന്നു സംഭവം. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമായത്. ഇക്കഴിഞ്ഞ 12നാണ് തൃശൂര്‍ നഗരത്തിലെ വസ്‌ത്രശാലയിലും വന്‍ തീപിടിത്തമുണ്ടായത്.
പുലര്‍ച്ചെ 5.30 ഓടെയാണ് സംഭവം. കെട്ടിടത്തിനുള്ളില്‍ നിന്ന് പുക ഉയര്‍ന്നതോടെയാണ് തീപിടിച്ച വിവരം നാട്ടുകാരുടെ ശ്രദ്ധയില്‍പ്പെട്ടത്. കെട്ടിടത്തിലുണ്ടായ ഷോര്‍ട്ട് സര്‍ക്യൂട്ടാകാം തീപിടിത്തത്തിന് കാരണമായതെന്നാണ് വിലയിരുത്തല്‍.
ജില്ലയിലെ വിവിധയിടങ്ങളില്‍ നിന്നുള്ള അഞ്ച് അഗ്‌നി ശമന സേനയെത്തിയാണ് തീ അണച്ചത്. രണ്ട് മണിക്കൂര്‍ കൊണ്ടാണ് തീ നിയന്ത്രണ വിധേയമാക്കാനായത്.
