സർവകലാശാല ബില്ലുകളിൽ ഒപ്പിടാതെ ഗവർണർ ; മറ്റ് പതിനാറെണ്ണത്തിന് അംഗീകാരം

കഴിഞ്ഞ നിയമസഭ സമ്മേളനത്തിൽ പാസായ ബില്ലുകൾക്കാണ് ഗവർണർ അംഗീകാരം നൽകിയത്

തിരുവനന്തപുരം : സർവകലാശാല ചാൻസിലർ സ്ഥാനത്തുനിന്ന് ഗവർണറെ നീക്കം ചെയ്‌തുകൊണ്ടുള്ള ബില്ലിന് ഇത്തവണയും അംഗീകാരം നൽകാതെ മാറ്റിവച്ച് ഗവർണർ ആരിഫ് മുഹമ്മദ് ഖാൻ. ഇത് ഒഴികെയുള്ള 16 ബില്ലുകളിൽ ഗവർണർ ഇന്ന് ഒപ്പുവച്ചു. പതിനഞ്ചാം കേരള നിയമസഭയുടെ ഏഴാം സമ്മേളനം പാസാക്കിയ ബില്ലുകളിലാണ് ഗവർണർ ആരിഫ് മുഹമ്മദ് ഖാൻ ഒപ്പിട്ടത്.

ഏറെ രാഷ്ട്രീയ വിവാദമായ ചാൻസിലർ ബിൽ കൂടുതൽ പരിശോധനകൾക്കായി മാറ്റിവച്ചിരിക്കുകയാണെന്നാണ് രാജ്ഭവൻ വൃത്തങ്ങൾ നൽകുന്ന സൂചന. സർക്കാർ ഗവർണർ പോരിന് താത്കാലിക അയവ് വന്നതിന് പിന്നാലെയാണ് ഗവർണർ ആരിഫ് മുഹമ്മദ് ഖാൻ ബില്ലുകളിൽ ഒപ്പിട്ടത്.

കഴിഞ്ഞമാസം ഡിസംബർ 13ന് അവസാനിച്ച നിയമസഭ സമ്മേളനം പാസാക്കിയ ബില്ലുകൾ രാജ്ഭവനിലേക്ക് അയച്ചിരുന്നെങ്കിലും ഗവർണർ സ്ഥലത്തില്ലാത്തതിനാൽ ബിൽ ഒപ്പിടാതെ മാറ്റിവയ്‌ക്കുകയായിരുന്നു. ചാൻസിലർ ബില്ലിൽ ഗവർണർ നിയമോപദേശം തേടിയെങ്കിലും ബില്ലിന്‍റെ ഭാവി ഇപ്പോഴും അനിശ്ചിതത്വത്തിലാണ്.