തിരുവനന്തപുരം: ആര്യനാട് കുളപ്പടയിൽ എക്സൈസ് ഉദ്യോഗസ്ഥരെ കഞ്ചാവ് മാഫിയ ആക്രമിച്ചു. എക്സൈസ് സർക്കിൾ ഇൻസ്‌പെക്‌ടർ ഉൾപ്പെടെ നാലുപേർക്ക് പരിക്കേറ്റു. നെടുമങ്ങാട് എക്സൈസ് സർക്കിൾ ഇൻസ്‌പെക്‌ടർ സ്വരൂപ്, സിവിൽ എക്സൈസ് ഓഫിസർമാരായ ഷജീർ, നുജുമുദീൻ, അനിൽകുമാർ എന്നിവർക്കാണ് പരിക്കേറ്റത്.
ആര്യനാട് കുളപ്പടയിൽ കൃഷിഭവന് സമീപം ഇന്നലെ രാത്രിയാണ് സംഭവം. സ്വരൂപ്, നുജുമുദീൻ, ഷബീർ എന്നിവർക്ക് തലയ്‌ക്കും അനിൽ കുമാറിന് കൈയ്‌ക്കും ആണ് പരിക്ക്. രഹസ്യ വിവരത്തെ തുടർന്ന് നിരവധി കേസുകളിലെ പ്രതിയും കാപ്പ ചുമത്തിയിട്ടുള്ള കുറ്റവാളിയുമായ സുഭീഷിന്‍റെ വീട്ടിൽ പരിശോധനക്ക് എത്തിയപ്പോഴാണ് ആക്രമണം ഉണ്ടായത്.
തുടർന്ന് സുഭീഷിനെ എക്സൈസ് സംഘം കസ്റ്റഡിയിൽ എടുക്കാൻ ശ്രമിച്ചപ്പോള്‍ കമ്പിവടി കൊണ്ട് സുഭീഷ് ഉദ്യോഗസ്ഥരെ അടിക്കുകയായിരുന്നു. ഇയാളോടൊപ്പമുണ്ടായിരുന്ന ആൾ ഓടി രക്ഷപ്പെട്ടു. പരിക്കേറ്റ ഉദ്യോഗസ്ഥരെ തിരുവനന്തപുരം മെഡിക്കൽ കോളജിൽ പ്രവേശിപ്പിച്ചു.
Also read: എക്സൈസ് വാഹനത്തെ ഇടിച്ചിട്ട ശേഷം കാറില്‍ മദ്യം കടത്താൻ ശ്രമം, യുവാക്കൾ പിടിയില്‍
