തിരുവനന്തപുരം: കൈത്തറി മേഖലയിലെ തൊഴിലാളികൾക്ക് ഓണത്തിന് മുമ്പ് ശമ്പള കുടിശിക തീർത്തു നൽകുമെന്ന് വ്യവസായ വകുപ്പ് മന്ത്രി ഇ.പി.ജയരാജൻ. കൈത്തറി മേഖലയ്ക്ക് വേണ്ട നൂലുകൾ എത്തിച്ച് നൽകുന്നത് സർക്കാർ സ്ഥാപനങ്ങളാണ്. അസംസ്കൃത വസ്തുക്കൾ കിട്ടുന്നില്ലെന്ന പരാതി അടിസ്ഥാന രഹിതമാണെന്നും തിരുവനന്തപുരത്ത് ഹാന്‍റെക്‌സ് ഷോറുമിന്‍റെ ഉദ്ഘാടനവേളയിൽ മന്ത്രി പറഞ്ഞു.
ഓണവിപണിക്കൊരുങ്ങി തമ്പാനൂരിൽ ഹാന്‍റെക്‌സ് ഓണത്തോടനുബന്ധിച്ച് വിവിധ തരം കൈത്തറി വസ്ത്രങ്ങളുടെ ശേഖരവുമായി ഹാന്റെക്സിന്റെ തമ്പാനൂരിലെ നവീകരിച്ച ഷോറും മന്ത്രി ഇ.പി.ജയരാജൻ ഉദ്ഘാടനം ചെയ്തു. ആവശ്യമായ നൂല് കിട്ടാത്തതിനാൽ കൈത്തറി മേഖല പ്രതിസന്ധിയിലാണെന്ന പരാതി അടിസ്ഥാന രഹിതമെന്ന് മന്ത്രി പറഞ്ഞു. ഓണത്തിന് മുമ്പ് ശമ്പള കുടിശ്ശിക തീർത്ത് നൽകുമെന്നും അദ്ദേഹം ഉറപ്പുനൽകി.കേരളത്തിലെ വസ്ത്ര വിപണന രംഗത്ത് കൈ കൊണ്ട് നിർമിക്കുന്ന വസ്ത്രങ്ങൾ ഓണ ദിവസങ്ങളിൽ കൂടുതലായി വിതരണം ചെയ്യാൻ സാധിക്കും. ഒരു വർഷത്തിനകത്ത് നൂറു കോടിയുടെ വ്യാപാരം നടത്താനാകുമെന്നാണ് സർക്കാർ പ്രതീക്ഷിക്കുന്നതെന്നും മന്ത്രി പറഞ്ഞു. ഓണത്തോട് അനുബന്ധിച്ച് കസവ് സാരികള്‍, മുണ്ടുകള്‍, ഡിസൈനർ സാരികള്‍, ഷര്‍ട്ടുകള്‍ തുടങ്ങിയ കൈത്തറി വസ്ത്രങ്ങളുടെ വിപുലമായ ശേഖരമാണ് ഹാന്‍റെക്‌സ് ഒരുക്കിയിരിക്കുന്നത്. വസ്ത്രങ്ങൾക്ക് 30 മുതല്‍ 40 ശതമാനം വരെ ഇളവും ലഭിക്കും.
