തിരുവനന്തപുരം : ഡിജിപി ഓഫിസ് മാർച്ച് നടത്തിയ കെഎസ്‌യു പ്രവർത്തകർക്ക് ഉപാധികളോടെ ജാമ്യം (Bail for KSU activists who clashed with police in DGP office march). റിമാൻഡിൽ കഴിയുന്ന പത്ത് കെഎസ്‌യു പ്രവർത്തകർക്കാണ് ജാമ്യം. തിരുവനന്തപുരം ഒന്നാം ക്ലാസ് ജുഡീഷ്യൽ മജിസ്‌ട്രേറ്റ് കോടതിയാണ് പ്രതികൾക്ക് ഉപാധികളോടെ ജാമ്യം അനുവദിച്ചത്.
കെഎസ്‌യു (KSU) പ്രവർത്തകരായ സുദേവ്, ജാനിബ്, അബ്‌ദുൾ ലത്തീഫ്, സിജാഹ്, അനീസ്, ലിബിൻ, ജവാദ്, മുഹമ്മദ്‌ റഷീദ്, റിസ്‌വാൻ എന്നിവർക്കാണ് ജാമ്യം ലഭിച്ചത്. തിരുവനന്തപുരം ഒന്നാം ക്ലാസ് ജുഡീഷ്യൽ മജിസ്‌ട്രേറ്റ് കോടതി ജഡ്‌ജി അഭിനിമോൾ രാജേന്ദ്രന്‍റേതാണ് ഉത്തരവ്. എല്ലാ ശനിയാഴ്‌ചയും അന്വേഷണ ഉദ്യോഗസ്ഥന് മുൻപിൽ ഹാജരാകണം, മറ്റ് കുറ്റകൃത്യങ്ങളിൽ ഏർപ്പെടരുത് എന്നീ ഉപധികളോടെയാണ് ജാമ്യം അനുവദിച്ചത്.
ഡിജിപി ഓഫിസിൽ നടന്ന മാർച്ചിൽ (DGP office march) പോലീസിനെതിരെ കെഎസ്‌യു പ്രവർത്തകർ ചീമുട്ടയും മുളക് പൊടിയും ഉപയോഗിച്ചായിരുന്നു ആക്രമണം നടത്തിയത്. കേസിൽ പ്രതികളെ ചോദ്യം ചെയ്യാനായി കസ്റ്റഡിയിൽ വേണമെന്ന് പൊലീസ് ആവശ്യപ്പെട്ടിരുന്നു. എന്നാൽ കസ്റ്റഡി അപേക്ഷ കോടതി തള്ളുകയാണ് ഉണ്ടായത്.
എന്തിനാണ് പ്രതികളെ കസ്റ്റഡിയിൽ വാങ്ങുന്നതെന്ന് കോടതി ചോദിച്ചിരുന്നു. സംഘർഷത്തിൽ പൊലീസുകാരെ ആക്രമിക്കാനായി കെഎസ്‌യു പ്രവർത്തകർ ഉപയോഗിച്ച ചീമുട്ടയുടെയും മുളക് പൊടിയുടെയും ഉറവിടം മനസിലാക്കുന്നതടക്കമുള്ള കാര്യങ്ങൾക്കാണ് കസ്റ്റഡിയിൽ ആവശ്യപ്പെട്ടതെന്നായിരുന്നു പൊലീസ് കസ്റ്റഡി അപേക്ഷയിൽ നൽകിയത്.
യൂത്ത് കോൺഗ്രസ്, കെഎസ്‌യു പ്രവർത്തകരെ പൊലീസ് മർദിക്കുന്നു എന്നാരോപിച്ചായിരുന്നു ഡിജിപി ഓഫിസിലേക്ക് മാര്‍ച്ച് നടത്തിയത്. പിന്നീട് മാർച്ച് സംഘർഷത്തിൽ കലാശിയ്‌ക്കുകയായിരുന്നു. പൊലീസിന് നേരെ കെഎസ്‌യു പ്രവർത്തകർ മുളക് പൊടിയും മുട്ടയും എറിഞ്ഞിരുന്നു.
സംഘർഷത്തിൽ മാത്യു കുഴൽനാടൻ എംഎൽഎ, കെഎസ്‌യു സംസ്ഥാന പ്രസിഡന്‍റ് അലോഷ്യസ് സേവിയർ, സംസ്ഥാന വൈസ് പ്രസിഡന്‍റ് ആൻ സെബാസ്റ്റ്യൻ, അമൽ എൽദോസ്, ഹമീദ്, ബൈജു കാസ്ട്രോ തുടങ്ങി നിരവധി പ്രവർത്തകർക്ക് പരിക്കേറ്റിരുന്നു. സിഐടിയു പ്രവർത്തകനായ വിഷ്‌ണു വിപിയ്‌ക്കും മര്‍ദനമേറ്റു. ഇവരെ ആശുപത്രിയിലേക്ക് മാറ്റിയിരുന്നു.
മാർച്ചിനെ തുടർന്നുണ്ടായ സംഘര്‍ഷത്തിൽ പൊലീസ് പ്രതിഷേധക്കാര്‍ക്ക് നേരെ ലാത്തിചാര്‍ജും ജലപീരങ്കിയും പ്രയോഗിച്ചു. ഡിജിപി ഓഫിസിന് മുന്നില്‍ പൊലീസ് സ്ഥാപിച്ച ബാരിക്കേഡ് മറികടക്കാന്‍ ശ്രമിച്ച പ്രവര്‍ത്തകരെ പൊലീസ് അറസ്റ്റ് ചെയ്‌തു നീക്കുകയായിരുന്നു. സംഭവത്തിൽ പൊലീസ് മനഃപൂര്‍വം അക്രമം അഴിച്ച് വിട്ട് സമരം അടിച്ചമര്‍ത്തുകയാണെന്നും പ്രതിഷേധിച്ചെത്തിയ യൂത്ത് കോണ്‍ഗ്രസ്, കെഎസ്‌യു പ്രവര്‍ത്തകരെ പൊലീസുകാരെ കൊണ്ട് തല്ലിച്ച് വീട്ടില്‍ ഇരുത്താമെന്ന് മുഖ്യമന്ത്രി പിണറായി വിജയന്‍ കരുതേണ്ടെന്നും എംഎല്‍എ മാത്യു കുഴല്‍നാടന്‍ പ്രതികരിച്ചിരുന്നു.
