തിരുവനന്തപുരം: പ്രായപൂർത്തിയാകാത്ത പെൺകുട്ടിയേയും കാമുകനെയും വാടക വീടിനുള്ളിൽ തൂങ്ങി മരിച്ച നിലയിൽ കണ്ടെത്തി. തൊളിക്കോട് പഞ്ചായത്തിൽ മരുതുമ്മൂട് മൊട്ടമൂട് ഷിഹാന മൻസിലിൽ ഷിജുവിൻ്റെയും ഷീജയുടേയും മകൾ ഷിഹാന (16) , ചായം എട്ടാംകല്ല് വാവറക്കോണത്ത് വാടകക്ക് താമസിക്കുന്ന അബ്ദുല്‍ അസീസിൻ്റെ മകൻ അറാഫത്ത്(26) എന്നിവരെയാണ് മരിച്ച നിലയിൽ കണ്ടെത്തിയത്. തിങ്കളാഴ്ച രാവിലെ എട്ടാംകല്ല് സ്വദേശി അബ്ദുൾ റഷീദിൻ്റെ വീട്ടിലാണ് സംഭവം. ഈ മാസം 25ന് പെൺകുട്ടിയെ കാണാതായെന്ന് രക്ഷിതാക്കൾ പൊലീസിൽ വിവരമറിയിച്ചിരുന്നു.
അന്വേഷണത്തിൻ്റെ ഭാഗമായി വാടക വീട്ടിലെത്തിയ പൊലീസ് ഇവരെ തൂങ്ങി മരിച്ച നിലയിൽ കണ്ടെത്തുകയായിരുന്നു. കഴിഞ്ഞ വർഷം അറാഫത്തിനോടൊപ്പം ഒളിച്ചോടിയ പെൺകുട്ടിയെ പൊലീസ് പിടികൂടിയിരുന്നു. പോക്സോ പ്രകാരം കേസെടുത്ത പൊലീസ് യുവാവിനെ മൂന്നു മാസം ശിക്ഷിക്കുകയും ചെയ്തു. ഇവരുടെ വിവാഹം നടത്തിക്കൊടുക്കാമെന്ന് വീട്ടുകാർ സമ്മതിച്ചിരുന്നു.
വിതുരയിലെ സമാന്തര വിദ്യാഭ്യാസ സ്ഥാപനത്തിൽ പ്ലസ് വൺ വിദ്യാർഥിനിയായിരുന്നു ഷിഹാന. വിതുരയിൽ ബേക്കറി ജീവനക്കാരനായിരുന്ന അറാഫത്ത് ഒരാഴ്ച മുമ്പാണ് ജോലി ഉപേക്ഷിച്ച് പത്തനംതിട്ടയിലേക്കു പോയത്. നെടുമങ്ങാട് തഹസിൽദാറുടെ സാന്നിധ്യത്തിൽ ഇൻക്വസ്റ്റ് പൂർത്തിയാക്കി മൃതദേഹങ്ങൾ മെഡിക്കൽ കോളജിലേക്കു മാറ്റി.
