തിരുവനന്തപുരം : കെഎസ്ആര്ടിസിയിലെ ശമ്പള പ്രതിസന്ധിയില്‍ മാനേജ്മെന്‍റിനെ വിമർശിച്ച് മുഖ്യമന്ത്രി പിണറായി വിജയൻ. സർക്കാർ സഹായം നൽകിയിട്ടും ശമ്പളം നല്‍കാന്‍ കഴിയാത്തത് മാനേജ്മെന്റിന്റെ കെടുകാര്യസ്ഥതയാണെന്ന് മുഖ്യമന്ത്രി ചിന്ത വാരികയിലെ ലേഖനത്തിൽ കുറ്റപ്പെടുത്തി. 2011-2022 കാലയളവില്‍ മാത്രം 2,076 കോടി രൂപയാണ് കെഎസ്ആര്‍ടിസിക്ക് സര്‍ക്കാര്‍ ധനസഹായം നല്‍കിയത്.
എന്നാല്‍ ജീവനക്കാര്‍ക്ക് ശമ്പളം പോലും നൽകാനാവാത്തത് മാനേജ്മെന്റിന്റെ കെടുകാര്യസ്ഥതയാണ്. സിംഗിൾ ഡ്യൂട്ടിയിൽ വിട്ടുവീഴ്‌ച ഉണ്ടാകില്ല. ഡ്യൂട്ടി പാറ്റേണിലെ മാറ്റങ്ങളില്‍ ഉള്‍പ്പടെ ജീവനക്കാര്‍ സഹകരിക്കണം. കെഎസ്ആര്‍ടിസിയെ സ്വയംഭരണാധികാരമുള്ള മൂന്ന് ലാഭകേന്ദ്രങ്ങളായി വിഭജിക്കും.
മാനേജ്മെന്‍റ് തലത്തില്‍ ഉദ്യോഗസ്ഥര്‍ കര്‍ശന നിലപാട് സ്വീകരിക്കണം. കെഎസ്ആര്‍ടിസിയുടെ വിശ്വാസ്യത കൂട്ടാന്‍ ബോര്‍ഡ് ഉണ്ടാക്കുമെന്നും മുഖ്യമന്ത്രി അറിയിച്ചു. അതേസമയം, ഓണ അവധിക്ക് ശേഷമുള്ള ആദ്യ പ്രവൃത്തി ദിനത്തില്‍ കെഎസ്ആര്ടിസി സര്‍വകാല റെക്കോര്‍ഡ് കലക്ഷനാണ് നേടിയത്.
തിങ്കളാഴ്‌ച (12.09.2022) കെഎസ്ആര്‍ടിസിയുടെ പ്രതിദിന വരുമാനം 8.4 കോടി രൂപയാണ്. 3,941 ബസുകള്‍ സര്‍വീസ് നടത്തിയപ്പോഴാണ് ഇത്രയും വരുമാനം ലഭിച്ചത്. കെഎസ്ആർടിസിയെ രക്ഷപ്പെടുത്താൻ കർണാടക മാതൃക പഠിക്കാൻ ഒരുങ്ങുകയാണ് സംസ്ഥാന സർക്കാർ.
