തിരുവനന്തപുരം: ഓട്ടോറിക്ഷയും ബൈക്കും കൂട്ടിയിടിച്ചുണ്ടായ അപകടത്തിൽ ഗുരുതരമായി പരിക്കേറ്റ യുവാവ് മരിച്ചു. ആറ്റിങ്ങൽ ചരുവിളയിലെ പുത്തൻവീട്ടിൽ സതീഷ്‌ കുമാർ-രാജലക്ഷ്മി ദമ്പതികളുടെ മകൻ വിമൽ എസ്.നായര്‍(20)ആണ് ചികിത്സയിലിരിക്കെ മരിച്ചത്. അപകടത്തിൽ ഓട്ടോറിക്ഷാ ഡ്രൈവർ പണിമൂലയിലെ എസ്.ഗോപാലകൃഷണൻ(58) സംഭവസ്ഥലത്ത് വച്ച് മരിച്ചിരുന്നു. വിമലിന്റെ സുഹൃത്ത് ആറ്റിങ്ങൽ തോട്ടുംകര വീട്ടിൽ അക്ഷയ്(19)ക്കും അപകടത്തില്‍ പരിക്കേറ്റിരുന്നു.
ജനുവരി 26ന് രാത്രി പോത്തൻകോട്-മംഗലപുരം റോഡിൽ വാവറയമ്പലം ജങ്‌ഷന് സമീപത്തായിരുന്നു അപകടം. റോഡിലെ കുഴിയിൽ വീഴാതിരിക്കാൻ ശ്രമിക്കുന്നതിനിടെ എതിർദിശയിൽ നിന്നും വന്ന ബൈക്കുമായി ഓട്ടോറിക്ഷ കൂട്ടിയിടിക്കുകയായിരുന്നു. സ്വകാര്യ സ്ഥാപനത്തിലെ ജീവനക്കാരനായിരുന്നു വിമൽ. വിഷ്‌ണുവാണ് സഹോദരൻ.
