തിരുവനന്തപുരം : മുസ്‌ലിം ലീഗിനെ (IUML) എൽഡിഎഫിലേക്ക് (LDF) ചേർക്കാനോ ഒപ്പം വരാനോ ഇരുകൂട്ടരും തീരുമാനിച്ചിട്ടില്ലെന്ന് സിപിഎം (CPM) നേതാവ് എകെ ബാലൻ (AK Balan). ഏക സിവിൽ കോഡ് (Uniform Civil Code) വിഷയത്തിൽ സിപിഎം നടത്തുന്ന സെമിനാറിൽ പങ്കെടുക്കാൻ സമസ്‌ത തയ്യാറാവുകയും മുസ്‌ലിം ലീഗ് ക്ഷണം നിരസിക്കുകയും ചെയ്‌തതിന് പിന്നാലെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
ഏക സിവില്‍ കോഡിനെതിരായ സെമിനാറില്‍ പങ്കെടുക്കാനുള്ള സിപിഎം ക്ഷണം നിരസിച്ച് മുസ്‌ലിം ലീഗ് ഇന്ന് രംഗത്തെത്തിയിരുന്നു. പ്രസിഡന്‍റ് പാണക്കാട് സയ്യിദ് സാദിഖലി ശിഹാബ് തങ്ങളുടെ വസതിയിൽ ചേർന്ന യോഗത്തിന് ശേഷമായിരുന്നു വിഷയത്തില്‍ ലീഗ് തീരുമാനമെടുത്തത്. ഏക സിവില്‍ കോഡ് വിഷയത്തില്‍ പാര്‍ലമെന്‍റിനകത്തും പുറത്തും ഒരുപോലെ പ്രതികരിക്കാന്‍ രാജ്യത്ത് കോണ്‍ഗ്രസിന് മാത്രമേ സാധിക്കൂവെന്ന് പാണക്കാട് സയ്യിദ് സാദിഖലി ശിഹാബ് തങ്ങള്‍ വാര്‍ത്താസമ്മേളനത്തില്‍ പറഞ്ഞിരുന്നു.
'കോൺഗ്രസിന് (Congress) ഏക സിവിൽ കോഡിൽ വ്യക്തമായ നിലപാട് ഇല്ല. അങ്ങനെയുള്ള കോൺഗ്രസുമായി ലീഗിന് അധിക കാലം പോകാൻ കഴിയില്ല. ലീഗിന്‍റേത് രാഷ്ട്രീയ തീരുമാനമാണ്.
അതിനെ തെറ്റ് പറയാൻ പറ്റില്ല. ലീഗിന്‍റെ അണികൾ തീരുമാനം അംഗീകരിക്കില്ല. കോൺഗ്രസിനെ ക്ഷണിക്കുന്നതിന് ബുദ്ധിമുട്ട് ഉണ്ടായിരുന്നില്ല. സമസ്‌ത ബുദ്ധിജീവി വിഭാഗമാണ്. അവർ നേരത്തെ എല്ലാം തിരിച്ചറിഞ്ഞു' - എകെ ബാലന്‍ പറഞ്ഞു. കോൺഗ്രസിന്‍റെ എം പിമാരിൽ മുസ്‌ലിം ഉണ്ടോയെന്ന് ചോദിച്ച എ കെ ബാലൻ കോൺഗ്രസ് വിമുക്ത ഭാരതം തങ്ങളുടെ മുദ്രാവാക്യം അല്ലെന്നും പറഞ്ഞു.
വ്യക്തി നിയമങ്ങളിൽ മാറ്റം വേണം. സ്ത്രീ പുരുഷ സമത്വം വേണം. അതിന് ശേഷമേ മറ്റ് കാര്യങ്ങൾ പറ്റൂ. ഇ എം എസ് പറഞ്ഞത് സിവിൽ കോഡ് അടിച്ചേൽപ്പിക്കരുത് എന്നാണ്. ശരീഅത്ത് നിയമത്തിലെ ചില വ്യവസ്ഥകളിൽ മാറ്റമാണ് ഇ എം എസ് ആവശ്യപ്പെട്ടത്. പടച്ചോൻ ഉണ്ടാക്കിയ നിയമത്തിന് പടപ്പിന് മാറ്റം വരുത്താൻ കഴിയില്ലെന്നും എകെ ബാലൻ പറഞ്ഞു.
നേരത്തെ, മുസ്‌ലിം സമുദായത്തിൽ ഏക സിവിൽ കോഡിനെതിരെ ഒറ്റ മനസാണെന്നും വിശാല ഐക്യപ്രസ്ഥാനം രൂപപ്പെടുന്നതിനുവേണ്ടി ആര് മുൻകൈ എടുത്താലും തങ്ങൾ സഹകരിക്കുമെന്നും സിപിഎം സംസ്ഥാന സെക്രട്ടറി എം വി ഗോവിന്ദൻ പ്രതികരിച്ചിരുന്നു. മുസ്‌ലിം ലീഗ് യുഡിഎഫിന്‍റെ ഭാഗമായ രാഷ്ട്രീയ പാർട്ടിയാണ്. ലീഗിന് അവരുടേതായ ന്യായം ഉണ്ടാവുമെന്നും വർഗീയ കക്ഷികൾ ഒഴിച്ചുള്ളവരുടെ കൂട്ടായ്‌മയാണ് തങ്ങളുടെ ലക്ഷ്യമെന്നും എം വി ഗോവിന്ദൻ പറഞ്ഞു.
More Read : UCC | ആരും കാണാത്ത ബില്ലില്‍ ഇത്രയും ആവേശം വേണ്ട, സിപിഎം സെമിനാറിനെ ഗൗരവമായി കാണുന്നില്ല : കെ മുരളീധരന്‍
മുസ്‌ലിം ലീഗിനെ യുഡിഎഫിൽ നിന്ന് അടർത്തി മാറ്റാനും വോട്ട് ബാങ്ക് രാഷ്ട്രീയത്തിന്‍റെ ഭാഗമായുമാണ് സിപിഎം സെമിനാറെന്ന് കോൺഗ്രസ് എംപി കെ മുരളീധരൻ അഭിപ്രായപ്പെട്ടു. സിപിഎം ക്ഷണിച്ചാലും കോണ്‍ഗ്രസ് സെമിനാറില്‍ പങ്കെടുക്കാന്‍ പോകില്ല. മുസ്‌ലിം ലീഗ് സെമിനാറില്‍ പങ്കെടുക്കുമെന്നതില്‍ ആശങ്ക ഇല്ലായിരുന്നുവെന്നും മുരളീധരന്‍ പറഞ്ഞു.
