തിരുവനന്തപുരം : മുസ്‌ലിം ലീഗ് കോൺഗ്രസിന്‍റെ തെറ്റായ വ്യാഖ്യാനങ്ങളെ തിരുത്തുന്നുവെന്നും ലീഗ് ചില കാര്യങ്ങളിൽ അന്തസുള്ള തീരുമാനം എടുക്കുന്നുവെന്നും സി പി എം കേന്ദ്ര കമ്മിറ്റി അംഗം എ കെ ബാലൻ (AK Balan on ET Mohammed Basheer's statement on CPM Palestine solidarity rally). പലസ്‌തീന്‍ ഐക്യദാര്‍ഢ്യ റാലിയില്‍ സി പി എം ക്ഷണിച്ചാല്‍ മുസ്‌ലിം ലീഗ് പങ്കെടുക്കുമെന്ന് മുതിര്‍ന്ന ലീഗ് നേതാവും എം പിയുമായ ഇ ടി മുഹമ്മദ് ബഷീർ അറിയിച്ചതിന് പിന്നാലെയാണ് എ കെ ബാലന്‍റെ പ്രതികരണം (AK Balan on ET Mohammed Basheer).
ഏത് പക്ഷത്ത് നിൽക്കുന്നു എന്ന് ചിന്തിക്കാറില്ല. രാജ്യത്തെ ബാധിക്കുന്ന കാര്യങ്ങളിൽ ഇടതുപക്ഷ തീരുമാനങ്ങൾക്ക് അനുകൂലമായ സമീപനം ലീഗ് എടുക്കുന്നു. കോൺഗ്രസിന്‍റെ വെറുപ്പുണ്ടായിട്ടും സി പി എം റാലിയിൽ സഹകരിക്കുമെന്ന് പറയുന്നതിലൂടെ അവര്‍ നൽകുന്ന സന്ദേശം അതാണ്. എം വി ഗോവിന്ദനുള്ള പിന്തുണയിലും ഗവർണറെ വിമർശിക്കുന്നതിലും അത് കണ്ടതാണ്.
മുസ്‌ലിം ലീഗിന്‍റെ സമീപനം ശ്ലാഘനീയമാണ്. സി പി എമ്മിന്‍റെ റാലിക്ക് വരാൻ ഞങ്ങൾ തയാറാണ് എന്ന നിലപാടാണ് ലീഗിനുള്ളത്. ശക്തമായ രാഷ്ട്രീയ തീരുമാനം അവർ എടുത്തുകഴിഞ്ഞു. കോൺഗ്രസ് എടുക്കുന്ന സമീപനത്തെ ഒരുതരത്തിലും പിന്തുണയ്ക്കാൻ കഴിയാത്ത അവസ്ഥയിലാണ് ലീഗെന്നും എ കെ ബാലൻ പറഞ്ഞു.
മുതിര്‍ന്ന ലീഗ് നേതാവും എംപിയുമായ ഇ ടി മുഹമ്മദ് ബഷീറാണ് പലസ്‌തീന്‍ ഐക്യദാര്‍ഢ്യ റാലിയില്‍ സി പി എം ക്ഷണിച്ചാല്‍ മുസ്‌ലിം ലീഗ് പങ്കെടുക്കുമെന്ന് അറിയിച്ചത്. സാഹചര്യം വേറെയായിരുന്നത് കൊണ്ടാണ് ഏക സിവില്‍ കോഡ് സെമിനാറില്‍ പങ്കെടുക്കാതിരുന്നത്. ഇത് എല്ലാവരും ഒരുമിച്ച് നിൽക്കേണ്ട സമയമാണ്. പാര്‍ട്ടി തീരുമാനമല്ല എ ടി മുഹമ്മദ് ബഷീര്‍ പങ്കുവച്ചതെന്നാണ് ലീഗ് വൃത്തങ്ങളില്‍ നിന്ന് ലഭിക്കുന്ന വിവരം.
രാജ്യവ്യാപകമായി ഇത്തരം റാലികള്‍ സംഘടിപ്പിക്കപ്പെടണം എന്നും ഇ ടി മുഹമ്മദ് ബഷീര്‍ കൊച്ചിയില്‍ വ്യക്തമാക്കിയിരുന്നു. ഇതിന് പിന്നാലെ അവരെ ഔദ്യോഗികമായി പരിപാടിയിലേക്ക് ക്ഷണിക്കുമെന്ന് സി പി എം കോഴിക്കോട് ജില്ല സെക്രട്ടറി പി മോഹനന്‍ വ്യക്തമാക്കുകയും ചെയ്‌തു. ഇ ടി മുഹമ്മദ് ബഷീറിന്‍റെ പ്രസ്‌താവനയില്‍ ലീഗില്‍ തന്നെ എതിര്‍പ്പുകള്‍ ഉയര്‍ന്നിരുന്നു.
കേരളീയം ചെലവാക്കൽ നിക്ഷേപം : കേരളീയത്തിൽ ചെലവാക്കൽ നിക്ഷേപമാണ്. കലോത്സവത്തെയും കായികമേളയും ധൂർത്തെന്ന് ആരെങ്കിലും പറയുമോ? നിക്ഷേപിക്കുന്നതിന്‍റെ ഇരട്ടിക്കിരട്ടി തിരിച്ചുകിട്ടുമെന്നും അദ്ദേഹം പറഞ്ഞു. കേരളീയം പരിപാടി ധൂർത്താണെന്ന പ്രതിപക്ഷ ആരോപണങ്ങൾക്ക് മറുപടി നൽകുകയായിരുന്നു എ കെ ബാലൻ.
