പത്തനംതിട്ട: 'സ്നേഹപൂര്‍വം വയനാടിന്' പദ്ധതിയുടെ ഭാഗമായി ദുരിതബാധിതരെ സഹായിക്കുന്നതിനായി പത്തനംതിട്ട ജില്ലാ ഭരണകൂടം ശേഖരിച്ച അവശ്യ വസ്തുക്കളുമായി വയനാട്ടിലേക്ക് വാഹനങ്ങള്‍ പുറപ്പെട്ടു. പത്തനംതിട്ടയില്‍ നിന്ന് മൂന്നു ട്രക്കുകളും തിരുവല്ലയില്‍ നിന്നു രണ്ടു ട്രക്കുകളുമാണ് ആദ്യം യാത്ര തിരിച്ചത്. ജില്ലാ ഭരണകൂടത്തിന്റെ നേതൃത്വത്തില്‍ കലക്ടറേറ്റ്, പ്രമാടം രാജീവ് ഗാന്ധി ഇന്‍ഡോര്‍ സ്റ്റേഡിയം, തിരുവല്ല ഡയറ്റ് എന്നിവിടങ്ങളില്‍ നിന്ന് ശേഖരിച്ച സാധനങ്ങളാണ് വയനാട്ടിലേക്ക് ആദ്യം കൊണ്ടുപോയത്. ആദ്യം പുറപ്പെട്ട മൂന്ന് വാഹനങ്ങളുടെ ഫ്ളാഗ് ഓഫ് ഫിഷറീസ് വകുപ്പ് മന്ത്രി ജെ മേഴ്സിക്കുട്ടിയമ്മ നിര്‍വ്വഹിച്ചു.
കലക്ടറേറ്റില്‍ ആരംഭിച്ച വിഭവസമാഹരണ കേന്ദ്രത്തിലേക്ക് രണ്ട് മിനി ലോറികളിലാണ് കേരള വ്യാപാരി വ്യവസായി ഏകോപന സമിതി സാധനങ്ങൾ എത്തിച്ചത്. പ്രസ് ക്ലബിന്‍റെ നേതൃത്വത്തിൽ ജില്ലയുടെ വിവിധ ഭാഗങ്ങിൽ നിന്നായി ശേഖരിച്ച ഭക്ഷ്യധാന്യ കിറ്റുകളും വയനാട്ടിലേക്ക് അയച്ചു. പ്രളയബാധിതര്‍ക്ക് സഹായവുമായി കുടുംബശ്രീ പത്തനംതിട്ട ജില്ലാ മിഷനും രംഗത്തെത്തി. റാന്നി ബഥനി ആശ്രമം ഹൈസ്‌കൂളിലെ വിദ്യാര്‍ഥികള്‍ ക്വിസ് മത്സരത്തില്‍ ലഭിച്ച സമ്മാനത്തുക പ്രളയബാധിതര്‍ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കി. എസ്പിസി പ്രൊജക്ടിന്‍റെ നേതൃത്വത്തില്‍ ശേഖരിച്ച ദുരിതാശ്വാസ സാമഗ്രികളും വയനാട്ടിലേക്ക് അയച്ചു. പെരുനാട് പഞ്ചായത്തിലെ ബാലസംഘം കുട്ടികൾ കാശുകുടുക്കകളിൽ നിന്ന് ശേഖരിച്ച് എടുത്ത 3650 രൂപ കലക്ടർക്ക് കൈമാറി.
വെള്ളപ്പൊക്കവുമായി ബന്ധപ്പെട്ട് പത്തനംതിട്ട ജില്ലയില്‍ നടക്കുന്ന ദുരിതാശ്വാസ-രക്ഷാപ്രവര്‍ത്തനങ്ങള്‍ ജില്ലാ ദുരന്തനിവാരണ കേന്ദ്രത്തിന്റെ മേല്‍നോട്ടത്തിലാണ് നടക്കുന്നത്. ജില്ലാ ദുരന്തനിവാരണ അതോറിറ്റി ചെയര്‍മാനും ജില്ലാ കലക്ടറുമായ പി ബി നൂഹിന്റെ നേതൃത്വത്തിലാണ് കേന്ദ്രം പ്രവര്‍ത്തിക്കുന്നത്. ജില്ലയിലേക്ക് രക്ഷാപ്രവര്‍ത്തനത്തിനായി കൊല്ലം നീണ്ടകരയിൽ നിന്നും എത്തിയത് 10 ബോട്ടുകളും 46 മത്സ്യതൊഴിലാളികളുമാണ്.
