പത്തനംതിട്ട: ചിറ്റാർ പുതുക്കട റോഡ് നവീകരിക്കണമെന്ന ആവശ്യം ശക്തമാകുന്നു. വിനോദ സഞ്ചാരികളുടെയും ശബരിമല തീർത്ഥാടകരുമടക്കം നൂറ് കണക്കിന് വാഹനങ്ങൾ കടന്നുപോകുന്ന റോഡ് എല്ലാ വർഷവും 40 മുതൽ 60 ലക്ഷം വരെ ചിലവഴിച്ച് നവീകരിക്കുന്നുണ്ടെങ്കിലും നികുതിപ്പണം പാഴാകുന്നതല്ലാതെ യാതൊരു പ്രയോജനവും ലഭിക്കാറില്ലെന്നാണ് നാട്ടുകാരുടെ പരാതി. പത്തനംതിട്ട ജില്ലാ പഞ്ചായത്തിന്റെ അധീനതയിലുള്ള ചിറ്റാർ, സീതത്തോട്, തണ്ണിത്തോട് പഞ്ചായത്തുകളെ റാന്നി, കാത്തിരപ്പള്ളി താലൂക്കുകളുമായി ബന്ധിപ്പിക്കുന്ന പ്രധാന റോഡുകളിലൊന്നാണ് ചിറ്റാർ പുതുക്കട റോഡ്.
ശബരിമല റോഡിൽ പ്ലാപ്പളളിയിലോ പരിസര പ്രദേശങ്ങളിലോ ഗതാഗത തടസ്സം ഉണ്ടായാലും ഈ വഴിയിലൂടെയാണ് വാഹനങ്ങൾ കടത്തിവിടുന്നത്. ഗവി, കുമളി, കോന്നി ഇക്കോ ടൂറിസം മേഖലകളെ കോട്ടയം ഇടുക്കി ജില്ലകളുമായി ബന്ധിപ്പിക്കുന്ന റോഡ് കൂടിയാണിത്. കെ എസ് ആർ ടി സി യുടെ ചെയിൻ സർവീസ് ഉൾപ്പടെ മൂപ്പതോളം ബസുകൾ ഇതുവഴി സർവീസ് നടത്തുന്നുണ്ട്. തകർന്ന് കിടക്കുന്ന റോഡിലെ കുഴികളിൽ വീണ് ഇരുചക്ര വാഹന യാത്രക്കാർക്ക് പരിക്കേൽക്കുന്നത് ഇവിടെ നിത്യ സംഭവമാണ്. അധികൃതർ അടിയന്തിരമായി ഇടപെട്ട് കാര്യക്ഷമമായ രീതിയിൽ റോഡ് നവീകരിക്കണമെന്നാണ് നാട്ടുകാരുടെ ആവശ്യം.
