പത്തനംതിട്ട: തിരുവല്ല താലൂക്കിലെ ദുരിതാശ്വാസ ക്യാമ്പുകള്‍ സന്ദര്‍ശിച്ച് മാത്യു ടി. തോമസ് എംഎൽഎ. തിരുമൂലപുരം സെന്‍റ് തോമസ് ഹയർ സെക്കന്‍ററി സ്‌കൂൾ, തിരുമൂലവിലാസം യുപി സ്‌കൂള്‍, കാവുംഭാഗം ദേവസ്വം ബോർഡ് സ്‌കൂൾ തുടങ്ങിയ മുപ്പതോളം ക്യാമ്പുകളാണ് അദ്ദേഹം സന്ദർശിച്ചത്.
ക്യാമ്പുകളിൽ കഴിയുന്നവരോട് അദ്ദേഹം കാര്യങ്ങൾ നേരിട്ട് ചോദിച്ചറിഞ്ഞു. ക്യാമ്പിലെ അന്തേവാസികൾക്ക് ആവശ്യമായ ആഹാരവും മരുന്നുമടക്കമുള്ളവ ലഭ്യമാകുന്നുണ്ടെന്ന് ഉദ്യോഗസ്ഥരിൽ നിന്നും ഉറപ്പു വരുത്തി. വീടുകളിൽ വെള്ളം കയറിയതിനെ തുടര്‍ന്നുണ്ടായ നാശനഷ്ടങ്ങൾക്ക് അർഹമായ നഷ്‌ടപരിഹാരം സർക്കാരിൽ നിന്നും വാങ്ങി നൽകുന്നതിന് ആവശ്യമായ നടപടി സ്വീകരിക്കുമെന്നും മാത്യു ടി. തോമസ് എംഎൽഎ ഉറപ്പു നൽകി.
