പാലക്കാട് : പാലക്കാട് നഗരസഭയിൽ യുഡിഎഫ് - ബിജെപി അംഗങ്ങൾ തമ്മിൽ കൈയാങ്കളി. ഗവ.മോയൻ സ്‌കൂളിലെ ഡിജിറ്റലൈസേഷനുമായി ബന്ധപ്പെട്ട അജണ്ടയെച്ചൊല്ലിയാണ് സംഘർഷമുണ്ടായത്. ബിജെപി അംഗം മിനി കൃഷ്‌ണകുമാർ സംസാരിക്കുമ്പോൾ യുഡിഎഫ് അംഗം അനുപമ മൈക്ക് പിടിച്ചുവാങ്ങിയെന്ന് ആരോപിച്ചുള്ള ബഹളമാണ് കൈയാങ്കളിയിലേക്ക് നീങ്ങിയത്.
തന്‍റെ വസ്‌ത്രം വലിച്ചുകീറിയെന്നും മർദിച്ചെന്നും മിനി ആരോപിച്ചു. തന്നെ മർദിച്ചെന്ന് അനുപമയും പ്രതികരിച്ചു. ഇരുകൂട്ടരും ജില്ല ആശുപത്രിയിൽ ചികിത്സ തേടിയിട്ടുണ്ട്. ഇതിനിടെ അജണ്ടകൾ പാസായതായി പ്രഖ്യാപിച്ച് വൈസ് ചെയർമാൻ ഇ കൃഷ്‌ണ ദാസ് ഇരിപ്പിടത്തിൽ നിന്ന് ഇറങ്ങിപ്പോയി. തർക്കത്തിൽ മുഴുവൻ കൗൺസിലർമാരും പ്രതിഷേധിച്ചു.
മോയൻ സ്‌കൂളിലെ ഡിജിറ്റലൈസേഷൻ പദ്ധതിക്ക് നഗരസഭ വിഹിതം നൽകിയിരുന്നു. ഇത് തിരികെ വേണമെന്നാവശ്യപ്പെട്ട് നഗരസഭ കളക്‌ടർക്ക് നൽകിയ കത്തിന്‍റെ മറുപടി കൗൺസിലിന്‍റെ പരിഗണനയ്ക്കായി വന്നു.
അതിനിടെ ഒതുങ്ങോട്‌ വാർഡിലെ റോഡ്‌ നിർമാണത്തിൽ രാഷ്ട്രീയ വിവേചനം നടത്തുന്നുവെന്നാരോപിച്ച്‌ സിപിഎം അംഗങ്ങൾ ഡയസിൽ ഇറങ്ങി പ്രതിഷേധിച്ചു. ഡിപിആർ തയ്യാറാക്കിയിട്ടും പദ്ധതി കടലാസിലാണെന്നും വിഷയത്തിൽ വിശദീകരണം നൽകണമെന്നും അംഗങ്ങൾ ആവശ്യപ്പെട്ടു.
അനുമതിയില്ലാതെ കെട്ടിടങ്ങൾ
നഗരത്തിൽ അനുമതിയില്ലാതെ നിരവധി കെട്ടിടങ്ങൾ നിർമിക്കുന്നുണ്ടെന്നും പ്രതിപക്ഷം ചൂണ്ടിക്കാട്ടി. ഇത് തടയാൻ നഗരസഭ കത്ത് നൽകിയിട്ടും നിർമാണം തുടരുന്നത് ഭരണ കക്ഷിയിലെ ചിലരുടെ ഒത്താശയോടെയെന്നും ആരോപണമുയർന്നു. മഞ്ഞക്കുളം റോഡിൽ വീടുകൾക്ക് അനുമതിയുള്ള സ്ഥലത്ത് വാണിജ്യ ആവശ്യത്തിന് കെട്ടിടം നിർമിക്കാൻ അനുമതി നൽകിയത് പരിശോധിക്കണമെന്നും ആവശ്യമുയർന്നു.
ക്യാമറയെ ചൊല്ലി തർക്കം
നഗരത്തിൽ ക്യാമറ സ്ഥാപിക്കുന്നതിന് കരാർ നൽകിയതുമായി ബന്ധപ്പെട്ടും തർക്കമുണ്ടായി. പദ്ധതി ആരംഭിച്ച് മൂന്നുവർഷം പിന്നിട്ടിട്ടും ക്യാമറ സ്ഥാപിച്ചിട്ടില്ല. കരാറിൽ കൂട്ടിച്ചേർക്കൽ ഉണ്ടായെന്നും ഫണ്ട് വിനിയോഗത്തിൽ ക്രമക്കേടുണ്ടെന്നും പ്രതിപക്ഷം ആരോപിച്ചു. വിഷയം പഠിക്കാൻ 2020 ൽ രൂപീകരിച്ച സമിതി നോക്കുകുത്തിയായെന്നും ആരോപണമുയർന്നു.
ALSO READ: സഹോദരങ്ങള്‍ തമ്മിലുള്ള സംഘര്‍ഷം; ജനനേന്ദ്രിയത്തിന് പരിക്കേറ്റ യുവാവ് കൊല്ലപ്പെട്ടു
