പാലക്കാട്: കഴിഞ്ഞ അഞ്ച് വര്‍ഷക്കാലയളവിൽ ജില്ലയില്‍ പ്രതിദിന പാല്‍ ഉൽപാദനത്തില്‍ 33 ശതമാനം വർധനവ്. പാൽ ഉൽപാദനത്തില്‍ സംസ്ഥാന തലത്തില്‍ പാലക്കാട് ഒന്നാം സ്ഥാനത്താണ്. ഒപ്പം സ്വയംപര്യാപ്‌തതയും കൈവരിച്ചിരിക്കുന്നു. പാലക്കാട് ജില്ലയിലെ 328 ക്ഷീരസഹകരണ സംഘങ്ങളിലൂടെ പ്രതിദിനം ശരാശരി 3.33 ലക്ഷം ലിറ്റര്‍ പാലാണ് സംഭരിക്കുന്നത്. ജില്ലയിലെ 263 ക്ഷീരസഹകരണ സംഘങ്ങളില്‍ ഓട്ടോമാറ്റിക് പാല്‍ സംഭരണം നടപ്പാക്കിയിട്ടുണ്ട്. ഇന്‍റര്‍നെറ്റ് ഉള്‍പ്പെടെയുള്ള ആധുനിക സൗകര്യങ്ങളോടെ 275 ക്ഷീരസംഘങ്ങള്‍ക്ക് സ്വന്തമായി കെട്ടിടം നിര്‍മിച്ച് നല്‍കി.
പ്രളയത്തില്‍ നാശനഷ്‌ടമുണ്ടായ ക്ഷീര കര്‍ഷകര്‍ക്ക് 42 ടണ്‍ കാലിത്തീറ്റയും, 47 ടണ്‍ തീറ്റപ്പുല്ലും സൗജന്യമായി നല്‍കി. 15 ഹെക്‌ടർ തരിശ് നിലത്തില്‍ തീറ്റപ്പുല്‍കൃഷി ഒരുക്കി. പാലിന് സബ്‌സിഡി, കറവപ്പശു വിതരണം, കാലിത്തീറ്റ വിതരണം എന്നിവയും നടപ്പാക്കിയിട്ടുണ്ട്. ഇതിനായി കഴിഞ്ഞ അഞ്ച് വര്‍ഷങ്ങളിലായി 42.84 കോടി രൂപയാണ് ചെലവഴിച്ചത്. പ്ലാന്‍ പദ്ധതി പ്രകാരം അഞ്ച് വര്‍ഷങ്ങളിലായി 36.53 കോടി രൂപയുടെ ധനസഹായം ക്ഷീര കര്‍ഷകര്‍ക്ക് നല്‍കി. മില്‍ക്ക് ഷെഡ് ഡെവലപ്മെന്‍റ് പദ്ധതി, 3,641 കറവപ്പശുക്കള്‍, തീറ്റപ്പുല്‍കൃഷി എന്നിവയ്ക്കും ധനസഹായം നല്‍കിയിട്ടുണ്ട്.
സ്വയംപര്യാപ്‌ത പാല്‍ ഉൽപാദനം ലക്ഷ്യമിട്ടാണ് ക്ഷീരഗ്രാമം പദ്ധതി നടപ്പാക്കുന്നത്. പാല്‍ ഉൽപാദനത്തില്‍ മുന്‍പന്തിയിലുളള ഗ്രാമപഞ്ചായത്തിനെ തെരഞ്ഞെടുത്ത് മാതൃക ക്ഷീരഗ്രാമമാക്കി, പാൽ ഉൽപാദനത്തില്‍ സ്വയം പര്യാപ്‌തമാക്കുന്ന പദ്ധതിയാണ് 'ക്ഷീരഗ്രാമം'. ഇങ്ങനെ തെരഞ്ഞെടുക്കുന്ന പഞ്ചായത്തുകളില്‍ തീറ്റപ്പുല്‍കൃഷി വ്യാപിപ്പിച്ച് ഗ്രാമപഞ്ചായത്തിലെ ക്ഷീര സഹകരണ സംഘങ്ങളെ ശാക്തീകരിക്കുന്നു.
2017-18 വര്‍ഷത്തില്‍ പറളി, 2020-21 വര്‍ഷത്തില്‍ കരിമ്പുഴ ഗ്രാമപഞ്ചായത്തുകളെയാണ് പദ്ധതിക്കായി തെരഞ്ഞെടുത്തത്. 2018-19ല്‍ പറളി ഗ്രാമപഞ്ചായത്തില്‍ മൂന്ന് ക്ഷീര സംഘങ്ങളില്‍ നിന്നുള്ള പാല്‍ സംഭരണം 7.5 ലക്ഷം ലിറ്ററായി ഉയര്‍ന്നു. കരിമ്പുഴ ഗ്രാമപഞ്ചായത്തില്‍ ഇരുന്നൂറോളം ഗുണഭോക്താക്കളാണ് പദ്ധതിയിലുള്ളത്. തീറ്റപ്പുല്‍കൃഷിക്കുള്ള അനുകൂല സാഹചര്യം പഞ്ചായത്തില്‍ ഉള്ളതിനാല്‍ ലാഭകരമായ പശുവളര്‍ത്തലും സാധ്യമാണ്. നിലവില്‍ 42 ഹെക്‌ടറോളം തീറ്റപ്പുല്‍കൃഷി പഞ്ചായത്തില്‍ ചെയ്‌തിട്ടുണ്ട്.
ഇതര സംസ്ഥാനത്ത് നിന്ന് ഉരുക്കളെ വാങ്ങുമ്പോള്‍ ക്ഷീര കര്‍ഷകര്‍ അനുഭവിക്കുന്ന ചൂഷണം ഒഴിവാക്കുക ലക്ഷ്യമിട്ടാണ് ജില്ലയിൽ കിടാരി പാര്‍ക്കുകൾ ആരംഭിച്ചത്. കിടാരി പാര്‍ക്കുകള്‍ വഴി കര്‍ഷകര്‍ക്ക് വിറ്റത് 209 പശുക്കളെയാണ്. ക്ഷീരസഹകരണ സംഘങ്ങളാണ് പശുക്കളെ പരിപാലിക്കുന്നത്. ആകെ 276 കിടാരികളെ വാങ്ങി വളര്‍ത്തിയതില്‍ 72 എണ്ണമാണ് ബാക്കിയുള്ളത്.
സംസ്ഥാനത്ത് നടപ്പ് സാമ്പത്തിക വര്‍ഷം സ്ഥാപിക്കുന്ന നാല് കിടാരി പാര്‍ക്കുകളില്‍ രണ്ടെണ്ണം എരുത്തേമ്പതി പഞ്ചായത്തിലെ കുമരന്നൂര്‍ ക്ഷീര സംഘത്തിലും, പെരുമാട്ടി പഞ്ചായത്തിലെ മൂലത്തറ ക്ഷീര സംഘത്തിലുമാണ് തെരഞ്ഞെടുത്തത്. പാര്‍ക്ക് ഒന്നിന് 15 ലക്ഷം രൂപയാണ് ക്ഷീര വികസന വകുപ്പ് ധനസഹായമായി സംഘങ്ങള്‍ക്ക് നല്‍കി വരുന്നത്. നിലവില്‍ കൃഷ്‌ണഗിരി, ഹരിയാന, പല്ലടം, കുന്നത്തൂര്‍ എന്നീ സ്ഥലങ്ങളില്‍ നിന്നാണ് കിടാരികളെ എത്തിച്ചിരിക്കുന്നത്. ഇതോടൊപ്പം ഇതര സംസ്ഥാനങ്ങളില്‍ നിന്ന് കേരളത്തിലേക്കെത്തുന്ന പാലിന്‍റെ ഗുണനിലവാരം ഉറപ്പാക്കുന്നതിന് 30.18 ലക്ഷം ചെലവില്‍ മീനാക്ഷിപുരം ചെക്ക് പോസ്റ്റ് ലബോറട്ടറി നവീകരിച്ചു.
