പാലക്കാട്: ജില്ലയില്‍ കഴിഞ്ഞ അഞ്ച് വര്‍ഷക്കാലയളവില്‍ കൃഷി വകുപ്പ് മുഖേന നടപ്പായത് 270.84 കോടിയുടെ കാര്‍ഷിക വികസനം. ഇതില്‍ നെല്‍കൃഷി വികസന പദ്ധതിക്കായി 112.50 കോടിയാണ് ചെലവായത്. ഇതുവരെ 16,07450 ലക്ഷം ടണ്‍ നെല്ല് ഉല്‍പാദിപ്പിക്കുക വഴി 92936 കര്‍ഷകര്‍ക്ക് പ്രയോജനകരമായി. നെല്‍കൃഷി വികസന പദ്ധതിയിലൂടെ ഗ്രൂപ്പ് ഫാമിങ് പ്രോത്സാഹിപ്പിച്ച് ഉല്‍പ്പാദന ചെലവ് കുറയ്ക്കുന്നതിനായി ഒരു ഹെക്ടറിന് 5500 രൂപ ധനസഹായം നല്‍കിവരുന്നുണ്ട്. വര്‍ഷം തോറും ഇത്തരത്തില്‍ ഏകദേശം 8,000 ഹെക്ടറില്‍ ഗ്രൂപ്പ് ഫാമിങ് നടപ്പിലാക്കി വരുന്നു. 647.64 ഹെക്ടറില്‍ കരനെല്‍കൃഷി നടപ്പാക്കി വരുന്നു. കൂടാതെ തരിശ് കൃഷി വികസനം, കര്‍ഷകര്‍ക്ക് ഗുണനിലവാരമുള്ള വിത്ത് ലഭ്യമാക്കുക, നെല്‍വയലുകള്‍ക്ക് റോയല്‍റ്റി നല്‍കല്‍ പദ്ധതിയിലൂടെ നടപ്പിലാക്കിയിട്ടുണ്ട്.
* സുഭിക്ഷ കേരളം, മില്ലറ്റ് പദ്ധതികള്‍ ഊര്‍ജിതമായി തുടരുന്നു
കൃഷി-മൃഗ-മത്സ്യ-ക്ഷീരവികസന വകുപ്പുകള്‍ മുഖേന തരിശുനിലങ്ങള്‍ ഉപയോഗ്യമാക്കി ഭക്ഷ്യക്ഷാമം പരിഹരിക്കുക ലക്ഷ്യമിട്ട് 2020 മെയില്‍ ആരംഭിച്ച സുഭിക്ഷ കേരളം പദ്ധതി പ്രകാരം ജില്ലയില്‍ 57946.68 ഹെക്ടറില്‍ കൃഷി നടത്തി വരുന്നുണ്ട്. 51.93 കോടിയാണ് പദ്ധതിക്കായി വകയിരുത്തിയിട്ടുള്ളത്.അട്ടപ്പാടി മേഖലയില്‍ പോഷകാഹാരക്കുറവ് പരിഹരിക്കുന്നതിനും തനത് ഭക്ഷണരീതി പ്രോത്സാഹിപ്പിക്കുന്നതിനുമായി 2017 ല്‍ ആരംഭിച്ച മില്ലറ്റ് പദ്ധതിയിലൂടെ ഇതുവരെ 1963 ടണ്‍ ഭക്ഷ്യധാന്യങ്ങള്‍ ഉല്‍പാദിപ്പിച്ചു. 2017 - 20 വര്‍ഷങ്ങള്‍ കൃഷിവകുപ്പ് പട്ടികവര്‍ഗ്ഗ വികസന വകുപ്പിന്‍റെ സഹകരണത്തോടെ 71 ഊരുകളില്‍ ആയി 2760 ഭൂമിയിലാണ് മില്ലറ്റ് കൃഷിയിറക്കിയത്.
