കോഴിക്കോട്: യൂത്ത് കോൺഗ്രസ് പ്രവര്‍ത്തകര്‍ കരിപ്പൂർ വിമാനത്താവളത്തിലേക്ക് ലുങ്കി മാർച്ച് നടത്തി. കരിപ്പൂരിലേക്കുള്ള തൊഴിലാളികളെ കണ്ടെത്താനുള്ള ഇന്റർവ്യൂ കൊച്ചിയിൽ നടത്തുന്നതിന് എതിരെയാണ് യൂത്ത് കോണ്‍ഗ്രസ് പ്രവര്‍ത്തകര്‍ മാര്‍ച്ച് നടത്തിയത്. വിമാനത്താവള വികസനം മൂലം പ്രതിസന്ധിയില്‍ ആയവര്‍ക്ക് വിമാനത്താവള പരിസരത്ത് വച്ച് തന്നെ ഇന്റർവ്യൂ വേണമെന്ന് ആവശ്യപ്പെട്ടായിരുന്നു മാര്‍ച്ച്.
നേതാക്കളും പ്രവർത്തകരും ലുങ്കി ധരിച്ചായിരുന്നു മാര്‍ച്ച് സംഘടിപ്പിച്ചത്. നയാബസാറിൽ നിന്ന് ആരംഭിച്ച മാർച്ച് പൊലീസ് തടഞ്ഞു. കരിപ്പൂർ വിമാനത്താവളത്തിലെ ജോലി ഒഴിവുകൾക്കുള്ള ഇന്റർവ്യൂ കൊച്ചിയിൽ നടത്തുന്നത് പ്രതിഷേധാർഹമാണ്. കൊച്ചിയിൽ ഇന്‍റര്‍വ്യൂ നടത്തുന്നത് കരിപ്പൂരിലെ പ്രദേശവാസികളോട് ചെയ്യുന്ന അനീതിയാണെന്നും പാർലമെന്‍റ് യൂത്ത് കോൺഗ്രസ് പ്രസിഡന്റ് റിയാസ് മുക്കോളി പറഞ്ഞു. ഹാന്‍ഡി മാന്‍, ഹാൻഡി വുമൺ എന്നീ തസ്‌തികകളിലേക്ക് ആണ് എയര്‍ ഇന്ത്യ എയര്‍ ട്രാന്‍സ്‌പോര്‍ട്ട് സര്‍വീസ് ലിമിറ്റഡ്(എഐഎടിഎസ്‌എല്‍) നിയമന ഇന്‍റര്‍വ്യൂ നടത്തുന്നത്.
