മലപ്പുറം: നിലമ്പൂര്‍ ചാലിയാര്‍ പഞ്ചായത്തില്‍ കാട്ടാന ശല്യം രൂക്ഷം. ജനവാസ മേഖലയിലെത്തിയ കാട്ടാന വ്യാപകമായി കൃഷി നശിപ്പിച്ചു. വൈലശേരി, വേട്ടേക്കോട്, പെരുമ്പത്തൂര്‍, മണ്ണുപ്പാടം, മൊടവണ്ണ എന്നീ മേഖലകളില്‍ കാട്ടാന ശല്യം തുടങ്ങിയിട്ട് നാളേറെയായി.
ഇന്നലെ രാത്രിയും കാട്ടാന കൃഷി നഷിപ്പിച്ചു. വൈലശേരി സ്വദേശിയായ അബു എന്നയാളുടെ വിളവെടുപ്പ് പാകമായ വാഴകളാണ് കാട്ടാന നശിപ്പിച്ചത്. രാത്രി പത്ത് മണിയോടെയാണ് മേഖലയില്‍ ആനയിറങ്ങിയത്. വിവരമറിഞ്ഞതിനെ തുടര്‍ന്ന് ആര്‍ആര്‍ടി സംഘം സ്ഥലത്തെത്തി ആനയെ തുരത്തി.
മേഖലയില്‍ സ്ഥിരമായ ആനകളെത്തുന്നത് കൊണ്ട് പ്രദേശവാസികള്‍ ആശങ്കയിലാണ്. ഭയം കാരണം പുറത്തിറങ്ങാന്‍ പോലും കഴിയാത്ത അവസ്ഥ. റബ്ബര്‍ ടാപ്പിങ് തൊഴിലാളികള്‍ക്ക് രാവിലെ ജോലിയ്‌ക്ക് പോകാന്‍ കഴിയാത്ത അവസ്ഥയാണ്.
സ്‌കൂളിലേക്ക് നടന്ന് പോകുന്ന വിദ്യാര്‍ഥികള്‍ക്കും കാട്ടാന ശല്യം വലിയ പ്രയാസം സൃഷ്‌ടിക്കുന്നുണ്ട്. സംഭവത്തില്‍ ഉടനടി പരിഹാരം കാണണമെന്നാണ് നാട്ടുകാരുടെ ആവശ്യം.
