മലപ്പുറത്ത് അശാസ്‌ത്രീയ ബണ്ടിനെതിരെ നാട്ടുകാർ രംഗത്ത്

അശാസ്‌ത്രീയമായി ബണ്ട് നിർമ്മിച്ചതിനാൽ ചെറിയ മഴ പോലും പ്രദേശത്ത് വെള്ളക്കെട്ട് സൃഷ്ടിക്കും.

മലപ്പുറം: അങ്ങാടിപ്പുറം ഓരാട്ടം പാലത്തിനുസമീപത്തെ പുഴയിൽ ബണ്ട് നിർമ്മിച്ചത് അശാസ്‌ത്രീയമായാണെന്ന് പ്രദേശവാസികൾ. ചെറിയ മഴ പെയ്‌താൽ പോലും പ്രദേശം വെള്ളകെട്ടിലാകുന്നാണ് ബണ്ട് നിർമാണത്തില്‍ അപാകതയുണ്ടെന്ന ആരോപണത്തിന് കാരണം. പ്രദേശത്തെ ഏക്കർ കണക്കിന് കൃഷി നാശത്തിനും ഇത് കാരണമായി.

കഴിഞ്ഞ വർഷമാണ് മലപ്പുറം ഓരാട്ടം പാലത്തിനു സമീപം ബണ്ടുകൾ നിർമ്മിച്ചത്. 100 മീറ്ററിനുള്ളിൽ രണ്ട് ബണ്ടുചിറകളാണ് നിർമിച്ചത്. ഒരു മീറ്റർ വീതിയിലുള്ള ബണ്ടിലൂടെ മാത്രമാണ് വെള്ളം കടന്നുപോകാൻ സാധിക്കുന്നത്. ഇതു മൂലം ചെറിയ മഴ പോലും ഒരു പ്രദേശത്ത് മുഴുവൻ വെള്ളക്കെട്ട് സൃഷ്ടിക്കുകയാണ്. ബണ്ടു പൊളിച്ച് പൂർവസ്ഥിതിയിൽ എത്തിക്കണമെന്ന ആവശ്യവുമായാണ് നാട്ടുകാർ രംഗത്തെത്തിയിട്ടുള്ളത്. പഞ്ചായത്തിന്‍റെ ഭാഗത്തുനിന്ന് തീരുമാനം ഉണ്ടായില്ലെങ്കിൽ ശക്തമായ പ്രതിഷേധ പരിപാടികൾ നടത്തുവാനാണ് പ്രദേശവാസികളുടെ തീരുമാനം.